Sîdra Mamo

 

ŞEHBA - Cinîyê Efrînijî ke bi zor ameyî koçkerdiş û nika bajarokê Til Rifatî de hêrîşê dewleta tirkî serê înan de dewam kenê wina vatî: "Dewleta tirkî merkezê weşîye ke nêzdîyê wareyê bazarî de hedef girewt. Wazena bi nê hêrişan, her wext sivîlan bitersino la ma tu wext nêtersenê. Ma wazenê ke dewletê mîyanneteweyî fek bêvengîya xo ra vera bidê û tedayê serê Tirkîya bikerê ke hêrişî bêrê vindarnayîş û dewleta tirkî herra ma ra vejîyo."

 

Dimayê ke 18ê Adara 2018ine de dewleta tirkî Efrîn kerd binê kontrolê xo, şar seba pawitişê xo mecbûr mende verê xo bido Kantonê Şehbayî. No derbasê serra 5ine beno ke şarê Efrînî Şehbayî ra koçber o, la pêwa nê artêşa tirkî û komê girêdayê ci rojane herêma Şehba û Qezaya Şêrewaya Efrînî dana verê topan. Vizêr serê sibayî derûdorê saetê 8.00ine dironêke merkezêko weşîye yê Bajarokê Til Rifatî yê Kantonê Şehbayî hedef girewt. Netîceyê nê hêrişê de xeylêk zirarê madî virazyayê. Derheqê babete de cinîyê Efrînî yê koçber ke bajarokê Til Rifatî yê Kantonê Şehbayî de manenê ajansê ma rê qisey kerd.

 

‘Ma nêverdenê ke waştişê dişminî bi ca bêro’ 

 

Efiyet Mihemed Hemo Efrînije ke nika Til Rifatî de manena derheqê topvaranê dewleta tirkî û hedefgirewtişê erdê ramitişî de wina vat: "Dewleta tirkî ya îşxalkerdoxe û çeteyê ci hêrîşê xo yê serê ma vindarnê. Saetê sibayî de reyna dewleta tirkî ya îşxalkerdoxe merkezê weşîye ke nêzdîyê wareyê bazarî yê bajarokê Til Rifatî bi topan hedef girewt. Ma tîya de koçber ê, dewleta tirkî bi nê hêrişan wazena ke reyna ma koçber bibê û Bajarokê Til Rifatî îşxal bikero. Sewbîna dewleta tirkî erdê ma hedef gêna, bi taybetî erdê ke genim û berardişê ramitişî yê hedef gêna. La çiqas dewleta tirkî hêrîşê ma bikero zî ma tîya ra nêvejênê. Seba agêrayîşê serê herra xo ma her wext xo ver danê.”

 

‘Bi 5 serrî yo hêrişî nêvindertê’ 

 

Leyele Şêx Muse ke koçberê Efrînî ra ya û nika Bajarokê Til Rifatî de ciwîyena dîyar kerd ke hêviya agêrayîşê Efrînî yê û vat: "Dewleta tirkî ya îşxalkerdoxe her tim hêrişê herême kena û bi taybetî hêrişê bajarokê Til Rifatî kena. Seba ke wazena bi nê ma tîya ra koçber bikerê û şar bitersinê. Serê sibayî dewleta tirkî merkezêk weşîye cinîyan hedef girewt. Tîya de merkezê weşîye û derman xeylêk kêm o, sewbîna hûmara doktoran zaf kêm o. Dewleta tirkî merkezê ke şar xo derman keno hedef girewt, no hemverê merdimayî yo. Seba nê no derbasê serra 5ine beno ke ma Efrîn ra koçber bîyê, verê û heta nika hêrişê dewleta tirkî serê ma de dewam kenê."

 

‘Dewleta tirkî hêrişê cayê weşîye kena’

 

Fatîme Şêxo ke Efrîn ra ya dîyar kerd ke dewleta tirkî cayê ke sivîl ci de kom benê hedef gêna û wina vat: "Saetê sibayî de dewleta tirkî merkezê weşîye ke nêzdîyê wareyê bazarî hedef girewt. Wazena her tim bi nê hêrişan, sivîlan bitersino la ma tu wext nêtersenê. Doktorî karê merdimayî kenê seba dermankerdişî û xizmetê komelî la dewleta tirkî reyna hêrişê doktoran reyna hêrişê doktoran zî keno. Her tim hêrîşê keye û milkê sivîlan kenê û xeylêk zirarî virazênê. Ma çi ma ra wazenê? Ma wazenê ke dewletê mîyanneteweyî zî bêvengîya xo ra vejîyê û teda serê Tirkîya de bikero ke hêrişan vindarno û herra ma ra vejîyo.”