Şîrîn Çinar 

 

ÊLİH - Bi hetkarîya AKP-MHPyî û PDKyî hêrişê hemverê Mintiqaya Federe ya Kurdistanî de domnenê. Aktivîsta TJAyî Gulîstan Sonuke dîyar kerd ke ganî şarê mintiqayî bêvengîya xo bixerepnê û ganî şarê Vaşurî tevrê PDKyî qebûl nêkerê. 

 

Hêrişê bi hetkarîya AKP-MHPyî û PDKyî 17ê Nîsane de hemverê Mintiqaya Federe ya Kurdistanî de, serê mintiqayê; Zap,  Avaşîn û Metînayî de ameyê destpêkerdişî no mengêke yo domneno û duştê şerî de her hetî ra reaksîyonî yenê ramojnayîş. Reaksîyonê Şarê Kurdî duştê hetkarîya PDKyî yê bi AKPyî dir domnenê de yê û veng a pîlkerdişê xoverdayîşî kerdî. 

 

Aktivîsta Hereketê Cinîyan ê Azadan(TJA), Gulîstan Sonuke derheqê hêrişê hemverê Mintiqaya Federe ya Kurdistanî de ajansê ma rê qisey kerd. 

 

'Hêrişan de xeylêke texrîbatî virazîyayî' 

 

Gulîstane da zanayene ke AKP rojo ke  bîyo îqtîdar ra heta nika hemverê Kurdan de hêrişan ano ca û nê dir zî bi qerarê planê apeyfînayîşî yê 2014î de di Heyetê Ewleyîyê Neteweyî(MGK) de ameyo girewtiş hemverê wareyê Kurdan de şer ameyo destpêkerdiş û wina beyanat da: "AKP seba di şerî de bi ser bikewo PDKyî dir hetkarîye keno. Na reya ewilî nîya. Di serranê 90yî de zî hukmatê Tirkîya û PDKyî na hetkarîya yewbînan kerdî û hemverê mintiqa de operasyonê eskerî dayê destpêkerdiş. Tewr peynî 17ê Nîsane de bi seyan bi teyareyê şerî hêriş da destpêkerdiş. Cayêke hêrişî ameyî ca de zî ciwîya merdiman ra bigîro heta xozayî xeylêk texrîbatî ameyî ciwîyayîş." 

 

'Kurdî vindî bikerê do şarê Rojhelatê Mîyanên zî vindî bikero' 

 

Gulîstane dewamîye de bale ante serê bikarardişê sîlehê kîmyewî yê hêrişan ê hemverê Mintiqaya Federe yê Kurdistanî de ameyê xebetnayîş û wina ci de şî: "Hemverê Zap, Avaşîn û Metînayî de hêrişê xedarî yenê ca. AKP nê mintiqan de coka netîce nêgîno sîlehê kîmyewî xebetneno. La di serranê 90yî de zî sere de cinîyan dustê nê îxanetî û hêrişî de têkoşînêke pîl dayî. Ê wextî zî şarî sîyasetê PDKyî teşhîr kerd. Ewro zî duştê hêrişan ê serê Kurdistanî de û  di xeylêk şaristanê Tirkîya û Ewrûpayî de nê polîtîkayê muşterekî yenê protestokerdiş. Ma nê baş zanenê ke, eke AKP di hêrişan de ser bikewo do di şerî de tena Kurdî vindî nêkerê. Do heme şarê Rojhelatê Mîyanînî vindî bikerê."

 

'Hedefê AKPyî do reyna PDK bo' 

 

Gulîstane sewbîna ard ziwan ke AKP-MHP  seba îqtîdarîya xo hêrişan sey 'Şerê mergî û mendişî' vînenê û di rewşe ya bi ser bikewo de, do polîtîkayê tehdayî bidomnê. Gulîstane wina vat: "Tena AKP û PDK zî ney, do di şer de çîyêke bidest nêfîno. Ganî PDK nê bizano, eke AKP-MHP di nê şerî de ser de bikewo, do hedefê înan ê ewilî  PDK bo. Coka ê zî her tim nînan anê ziwan. Ganî PDK vatişê 'Kamcîn cayê dinya de bibo wa bibo ma duştê statu û serkewtişê Kurdan de yê' vîrî ra nêkero. Coka wina şêro do AKP ser de kewo. Eke ser de bikewo zî do heme hetê Tirkîyayî zî zirar bivînê. Seba nê ganî şar dustê nê operasyonan de vejîyo." 

 

'Semedê kaosî  tecrîdo' 

 

Gulîstane di peynîyî  de dîyar kerd ke, di Nîsane ya 2015î de, bi apeyşîyayîşê prosesê çareserîyî dir û qedexekerdişê pêvînayîşê bi Rayberê PKKyî Abdullah Ocalanî dir proses giran bîyo û no erjnayîş kerd: "Prosesê muzakereyî yê Birêz Ocalanî ke serekîya ci kerdbî ame destpêkerdiş. Îqtîdarî fam kerd ke no proses seba feydeyê şarî yo,  serê Birêz Ocalanî de tecrîd giran kerd. Nê tecrîdî dir xeylêk problemî vejîyayî werte.  Yew nê problemî ra tewr muhîmî yê huqûqî yo. Ewro dustê Vaşurî Kurdistanî de hêrişan domneno û kaos Tirkîya de yeno rayrayîş zî tecrîdî ra xoser  nîyo. Rayîrê vejîyayîşê nê kaosî ra wedaritişê tecrîdî yo. Ganî şarê Vaşurî tevrê PDKyî qebûl nêkerê û lezkî sere de cinîyî û heme şarî dustê nê hêrişan de sere wedarê."