ŞIRNEX - Dadîya Halîl Dogalî ke HPGyijbi û Bestayî de dinyaya xo bedilna Asîye Dogale, ard ziwan ke bi serran o Kurdî yenê qetilkerdiş û vat: "Ma şer ney, azadî wazenê. Ma ciwîya ke adilane û aştîyane wazenê. Ma nêwazenê zerrîya tu dadîyêke bîn bivêşo. Hemverê şerî û zilmî de bêveng memanê." 

 

Dimayê ke di lejkerdişê 30ê Nîsane de Koyê Cûdî de 8 eskerî ameyî kiştiş, planê Tirkîya apey şî û operasyonêke newe dest pêkerdî. Di destpêkerdişê nê operasyonan de di Cûdî, Gebar û Bestayî de lejî dest pêkerdî. Di netîceyê nê lejkerdişan de reyna xeylêk eskerî ameyî kiştiş û xeylêk înan ra zî birîndar bîyî. 

 

Di 23yê Gulane de mintiqaya Bestayî de di mabênê HPGyî û eskeran de reyêke bîn lej vejîya û Narîn Algune ya YJA-STARî û Mehmet Halîl Dogalo HPGyî ciwîya xo bedinayî. Cenazeyê wurdî şerwanan zî di eynî roje de hetê keyeyê înan ra ameyî girewtiş û definkerdiş. 

 

Dadîya Mehmet Halîl Dogalî Asîye Dogale ya 50 serrî ke dadîya 7 tutan a, tutîyîya xo ra heta nika tim zilmê dewlete dir rî bi rî menda. Ajansê ma rê behsê têkoşînê xo ya ciwîye kerd. 

 

'Barker benê' 

 

Asîye ard ziwan ke vera qatilê babê aye hetkarê dewlete bîyê û înan ra tu kes nêameyo cezakerdiş û wina dewam kerd: "Dimayê ke babê mi ame kiştiş keyeyê mi Dêrgule ra bar kerd û ma ameyî Şirnexî de ca bî. Verîyê ke babê mi bêro kiştiş ciwîya ma xeylêke weşe bî. La axayê dewe, dimayê kiştişê babê mi ciwîye ro ma heremna. Wexto babê mi ame kiştiş ez 11 serrî bîya û vera ke qatilê babê mi hetkarê dewlete bî nêameyî cezakerdiş. Ma 7 wayî bî. Ma û dadîya xo wextê ameyîşê Şirnexî de, ke bi ca bîyî ciwîye seba ma xeylêk zamet bîyî. Dewlete her tim ro ma zilm kerdêne." 

 

'Lajêke aye zî ameyo sirgûnkerdiş' 

 

Asîye ke wexto 19 serrî bîya zewejîyaya, dîyar kerd ke dimayê ke zewejêna zî zilmê dewlete serê aye û keyeyê aye de reyna dewam kerdo. Asîye wina dewam kerd: "Mêrdeyê mi 2 reyî kewt zîndan û bi pêroyî 4 serrî û 7 mengî di zîndan de mend. Lajê ke mi zî 2 serrî di zîndan de mend û vera ceza  ci rê ame waştiş, o zî vejîya teberê welatî. Lajêke mi dinyaya xo bedilna û Lajêke mi zî sirgun bî." 

 

'Xelîl şehîdê Kurdistanî yo' 

 

Asîye da zanayene ke vera zilmê dewlete, lajê aye Mehmet Halîl tewirê mîyanê Hereketê Azadîyî beno û wina qisey kerd: "Lajê mi verîyê 8 serran tewirê PKKyî bî. Lajê mi tutêke xeylêk baş û jîyatî bî. Tu reyî mi adiz nêkerd. Wexto tut bî her wext waştê verê mi de bo. Ez bişîyêne ça o zî mi dir ameyêne. Her tim rîyê ey bi huwayîş bî. Her tim hetkarîya mi kerdêne. Embazîya ey bi embazanê ey dir zî xeylêk baş bî. Embazê lajê mi yenê vanê ma do tu reyî Xelîlî vîrî ra nêkerê. Tu reyî zirarê ey çinîbî. Tu reyî zerra mi nêşikna. Pîlan dir pîl bî, qijan dir qij bî. Lajê mi duştê zilmî de tewirê hereketî bî. Lajê mi dimayê ke mi rê vîrameyîş verda. Mi vat wereka rojêke mi lajê xo bivînayêne. La o xem di zerra mi de mend. Tu reyî neheqî qebûl nêkerdêne.  Xelîl şehîdê Kurdistanî yo." 

 

'Hemrayê mi bî' 

 

Asîye eşkera kerd ke Mehmet Halîl 7 tutê aye ra 4in bî û nê çîyî vatî: "Tu reyî embazî û hogirê xo nêşiknayêne. Lajê mi tu reyî neheqî û zilm qebûl nêkerdêne. Pêwa emrê xo yê qijî zî tutêke hêsgir bî. Tehemulê ey xirabî rê û neheqî rê çinî bî. O tutêke zaf zerrîgeş û bi huwayîş bî. Antişê govende ra xeylêk hes kerdêne. Qijkekîya xo ra heta şîyayîşî her tim hetkarîya mi kerdêne. Di emrêke qij de neheqî û bêedaletîya duştê Kurdan de ya, nas kerd. Dimayê ke babî û birayê ey kewtî zîndan,  ey tewirbîyayîş kerd. Her ke ez seba pêvînayîşî şîyêne zîndan, lajê mi zî mi dir ameyêne. Duştê zilmî de sere wedarit û şî. Xelîl tutêke mi ra zêdeyêrî sey hemrayê mi bî. Wexto ke şî ez xemgîn bîya, la duştê neheqî de ey şer kerdêne. O tutêke zaf xebatkar û bi hêz bî. Ma do serê rêça Xelîlî de bê." 

 

'Wa êdî şer vindero' 

 

Asîye qal kerd ke Kurdî bi serran o bi zilm û tehdayî dir rî bi rî manenê û wina peynî ro qiseyanê xo ard: "Ma tutî bî no zilm ameyêne kerdiş û ma pîl bîyî zî no zilm hema dewam keno.  Şarê Kurdî çi kerdo ke no zilm ro ci yeno kerdiş? Tutê ma zî vera nê zilmî xo ver danê. Ma wazenê no şer vindero. Ma nêwazenê zerra dadîyan bivêşo. Ma dadîyî ciwîyêka azade, aştîyane û weşe wazenê. Ma şer nêwazenê. Ma edalet û azadîyî  wazenê. Wa hêrişê dewlete ya Tirkî ya ke serê Vaşurî de yê zî vinderê. Wexto şer virazîyeno zerra mi vêşena. Ma nêwazenê êdî gonî birişîyo. Ma nêwazenê êdî tu şaristanî de şer bibo. Ma nêwazenê koyê ma bêrê gulevarankerdiş û tutê ma bêrê kiştiş. Coka şerî ma nêeşkenê şêrê koyanê xo bi rehetî bigêrê. Hemverê nê zilmî de ganî heme dadîyî û Şarê Kurdî wurzê serê payan. Wa tu kes hemverê nê zilmî de bêveng nêmano."