STENBOL - Sîyasetmedarê ke dîyar kerdî bi hêrişê serê HDK û GOÇÎZDERî yenê kerdiş, seba vernîya raye ra şîyayîşê Gemlikî ya 12ê Hezîrane de bêro padayîşî yo û vatî: “Ganî rayaumumî ya demokratîke raye ra şîyayîşî de bibê yew û têkoşînê hempar bikerê.”

 

Çarçewaya cipersayîşê hetê Serdozgerîya Komare ya Tekirdagî ra ame kerdiş de vizêr polîsan eşt serê Kongreya Demokratîke ya Şaran (HDK) ê Beyogluyê Stenbolî. Çarçewaya cipersayîşî de qerar ame dayîş ke 11 bajaran 42 kesî bêrê destbendkerdiş. Sewbîna  polîsan dest dayî serê hîn hacetê bînaya HDKyî. Reyna hetê Serdozgerîya Komara ya Stenbolî ra cipersayîş de derheqê Komeleya Taqîbkerdişê Koçberî (GOÇÎZDER) de ame destpêkerdiş û polîsan eşt serê bînaya GOÇÎZDERî. Sewbîna 5 bajaran de derheqê 28 kesî de qerarê destbendkerdişî ameyo dayîş. Derheqê sereştişan de eynî wextî de heta nika avukatan tu zanayîş bi dest nêkerdo. 

 

‘Nê hêrişî verê ra ameyê plankerdiş’

 

Vervatoxa HDKyî Esengul Demir dîyar kerd ke nê hêrişî verê ra ameyê plankerdiş û wina vat: “Seba tecrîdê Îmrali bişîkî yo û rayaumumî bêro awankerdiş, ê do 12ê Hezîrane de raye ra şîyaşîyêk ver bi Gemlîkî de bikerê. Coka ma eşkenê vajê, hêrişî verê ra ameyê plankerdiş. Sewbîna Batman de 15 cinî ameyî destbendkerdiş. Bi no hawa têkoşînê cinî kenê hedef. Tirkîya de hemverê siyasetê şerî de rayaumumîya xurt nêameya awankerdiş. HDP û HDK wazenê rayaumumî awan bikerê. Nê dir zî zanê ke do reaksîyonê şarî zî vejîyo vernî. Coka waştî vernîya nê padê. Nê hêrişî ma rê peyser game nêda eştiş. Do têkoşînê ma pîl bibo û dewam bikero. Ma bi qerar ê ver bi Gemlikî de şêrê.”

 

‘Seba aştî, huqûq, edalet, çareserîyî ganî her kes di rayîrşîyayîşê Gemlîkî de bo' 

 

Parlementera Partîya Demokratîke ya Şaran(HDP)yî Dilşat Canbaze zî qal kerd ke bi hêrişan yeno waştiş ke vernîyê rayîrşîyayîşê Gemlîkî bêro padayîş û wina vat: "Operasyonê yenê kerdiş ma zanenê bi çi amancî yê.  Wazenê vernî ro hinî çîyan bigîrê. Nika ra pey ma derbasê prosesêke hema xidar bibê. Hêrişê Êlihî yê TJAyî zî tesaduf nîyê. Îqtîdar nêwazeno aştî bêro nê welatî. Ma bi îqtîdarêke bi şer, qirkerdiş, heyfgirewtiş, nefret, nîjadperestîya xo weyî keno rî bi rî yê. Coka şerê di Kurdistanî de nê hêrişan ra cîya nîyê.  Nê heme pêwa girêdayeyê. Hêrişê serê dadîyan ê Nobeta Edaletî, Kobanî, Gezîyî tê dir girêdaye yê. Kurdistan de pêro heme hêrişan têkoşîne domnenê û do bi operasyonan do nêeşko ma manî bikero.  Seba aştî, huqûq, edalet, çareserîyî ganî her kes di rayîrşîyayîşê Gemlîkî de bo." 

 

'Do 12ê Hezîrane de destpêkêk bo' 

 

Endame ya Kordînasyonê Cinîyan ê Merkezê HDKyî Arîfe Çinare da zanayene ke tehda yenê kerdiş seba manîkerdişê rayîrşîyayîşê Gemlîkî yê û wina ro ci zêde kerd: "Heta Tirkîya de meselaya Kurdî nêro helkerdiş, pêvînayîşî bi Birêz Abdullah Ocalanî dir nêrê ca  do hêrişî bidomê. Seba Tirkîyayî sîyasetê demokratîkî bi tewirêke azad bêrê kerdiş ma do seke Şarê Kurdî û muxalîfî têkoşîna xo bidomnê. Ma do rayîrşîyayîş bikerê. Na tena bi 12ê Hezîrane nîna çareserkerdiş. Do 12ê Hezîrane destpêkêk bo."