Melîke Aydin 

 

ÎZMÎR  - Multecîya A. da zanayene ke hem Tirkîya hem zî Sûrîye de ewleyî de nîya û vat, Tirkîya wazena multecîyê Sûrîyeyîjan di awanîyê ke Efrîn de ameyê viraştiş ca bikerê. A. da zanayene ke do weyra de zî multecî bê. 

 

Cinîya multecî ya bi nameyê A. da zanayene ke ewleyîya ganê multecîyanê Sûrîyeyijan Sûrîye de çinî yo û vat Tirkîya de zî seba vatişê nefretî û tehdîdê apey şawitişî ra, xo ewle hîs nêkena. A. dîyar kerd ke ê wazenê şêrê Ewropa.  Serekkomarê AKPyî eşkera kerdbî ke Efrîn de awanîyê TOKÎyî ke ameyê awankerdiş û do Sûrîyeyîjan weyra de ca bikerê. Multecîyan reaksîyon ramojna nê beyanatî. 

 

'Qismêke komele nefret hewênenê' 

 

A. da zanayene ke 2016î de Sûrîye ra seba ewleyîya ganê înan çinîbîya Dêra Zorî ra remayê û ameyê Tirkîya. O wext zî 33 serrî bîya û wina ard ziwan: "Wexto ma ameyî ma xeylêk zametî antî. Tirkîya de her çî zamet bî. Ma ziwan nêzanayêne. Ma heqê xo yê qanûnîyî nêzanayêne. Her kesî seyyewbînî hereket nêkerdêne. Ê ke başî zî bîbî, ê ke bi nefretî zî bîbî. Qismêke komele nefret hewênayêne." 

 

'Ciwîye her ke şîyêne zamet bîyêne' 

 

A. dewamîyî de behsê nê çîyan kerd: "Nizdîyîya nefretî zêdeyêr bîyî. Vatêne 'Şima rizqê ma dizna'. Ma xeylêke xebetîyayêne. Nika destûrê xebate zî zamet kerdê. Wexto ma newe ameyî ma rehetî bî la nika ters zafêr zêde yo. Nika kes nêwazeno tîya de bimano. Qismêke Sûrîyeyîjî wazenê tîya ra şêrê. Ma malê kesêke, rizqê kesêke nêgirewto, la ê wina nêfikirênê. Ma seba debara 24 seetan  xebetênê. Ma Aşma Sûre ra hetkarîyî nêgînê, vindarnayê. Nêweşxane ra zî hetkarîyî nêgînê." 

 

'Sûrîye de garantîya ciwîye çinî ya, Tirkîya zî ewleyî nîya' 

 

A. bale ante serê sûcê nefretî û wina dîyar kerd ke bi terso ke înan apey nêşawê ciwîyenê û wina dergî da qiseyanê xo: "Heta ke ma hinî ciwanan nêşawenê mekteban. Kênaya mi esta ez bena dibîstanî û ana. Vatişê nefretî zêdeyêr bîyî. Rewşêke bi xof o. Sûrîye de garantîya ciwîye çinî ya. Ez nêwazena heta peynîyê ciwîya xo tîya de bimana. Eke rayîrêke abibo, ez wazena şêra Ewropa." 

 

'Ma do Sûrîye de zî bibê multecî' 

 

A. bale ante serê prosesê awanîyan ê ke Sûrîye de ameyê awankerdiş û wina peynî ro ci ard: "Ez bi xo nêşina Sûrîye. Vera ke ez şêrî uca ez o reyna bibî multecî. Herinda ke ez şêrî uca, ez  tîya tercîh kena. Eke ewleyî bêro ca û vatişê nefretî kemî bibê ez eşkena Tirkîya de bimana."