Medya Uren 

 

AMED - Uzehîr Kûrt di serra 90yî de ame destbendkerdiş û  dima ra ame vindîkerdiş. Kênaya ey Aynûr Akdag, da zanayene ke wexto ame îdîakerdiş ke di binê Qereqola Bismilî ya Kane de esteyê ke aîdê insanan ameyê vînayîş bi hîsgêr bîyê û vat: "Beno ke nê esteyî yê nasanê ma bê. Bi tewirêke nimitkî esteyê ke ameyê vînayîş, reyna kerdê binê herdî. La ma nêverdenê ke reyêk bîn nê esteyî bêrê vindîkerdiş." 

 

Nîsane ya 2021î de Qereqola Polîsanê Bismilî ya Amedî ameye rijnayîş û ê wextî de ame îdîakerdiş ke esteyê aîdê însanan ameyê vînayîş û dima ra nê esteyî bi tewirêke nimitkî kerdê binê herdî. Serê eşnawitişê serebûtî, keyeyê ke merdimê înan serrê 90yî de ameyê vindîkerdiş û aqûbetê înan eşkera nîyê kewtê mîyanê cigêrayîşî. 

 

Uzehîr Kûrt di serra 90yî de ame vindîkerdiş. Kênaya Uzehîrî Aynûr Akdag, ajansê ma rê qisey kerd. 

 

'30 serrî yo aqûbetê înan persenê' 

 

Aynûre sere ra wina behsê prosesê tepiştişê babê xo kena: "Di serrê 90yî de eskerê Tirkî hêrişê dewa ma ya Bîrî ya girêdayeyê qezaya Bismilî  kerd. Ê wextî ez tute bîya, seke hewnî yeno vîrê mi. Dayêne babê mi ro, tehdît kerdêne û tewr peynî zî di wextê vêşnayîşê dewe de ey berdî. Şewe bî, eşt serê dewa ma. Ma uca ra vetî, bawera ke dewa ma ra pêwa babê mi 3 tenî berdî. Her 3 hema vindî yê. Aqûbeta înan eşkera nîyê. 30 serrî yo ma ro esteyanê înan gêrenê. Cigêrayîşê ma do dewam bikero." 

 

'Gor bi gor, welat bi welatî esteyê lajê xo gêraya' 

 

Aynûre eşkera kerd ke pîrika aye Koçer Kûrt, heta peynîyê emrê xo kewta dimayê esteyê lajê xo û wina qalê pîrika xo kerd: "Dimayê rojêke babê mi yeno destbendkerdiş, dadîya mi û pîrika mi şinê ey bivînê. Babê mi dadîya mi ra cixara wazeno. La dadîya mi bermena û vana banê ma ameyo veşinayîş û çîyêke ma nêmendo ke to rê bîyara. A roje ra pey ma xebere ci ra nêgirewt. Pîrika mi muracatê qereqolan, dadgehe, Komeleya Pawitişê Heqê Merdiman ê Tirkîya û Ewropayî kerd. Kamca şaristanî de esteyî vejîyayî pîrika mi şî uca. Pabeyê netîceyê DNAyî mende. Heta peynîyê emrê xo bi hesreta gorê babê mi şî. Vera ke ma qijî bî, dadîya mi ewnayêne ma ra. Pîrika mi şaristan bi şaristan, welat bi welatî seba asteyê lajê xo bivîno gêra. " 

 

'Ma fek dewa ra vera nêdanê' 

 

Aynûre eşkera kerd ke seba ê fek cigêrayîşî ra veradê her çî ameyo kerdiş û wina dewam kerd: "Waştî tazmînat bidê û ma îqna bikerê. Zaf reyan eşt serê keyeyê ma û tehdît ro ma kerdî. La çi beno wa bibo ma fek dewaya xo ra vera nêdanê. Heta ma cenazeyê xo nêvînê ma do her cayî de ro ci bigêrê. Ma do verpersîyaran ra hesab biwazê. Ganî cenazeyê ma bêrê vînayîş û verpersîyarî bêrê muhakemekerdişî. Ma nika nêvînenê, do tutê ma  şima ra hesab bipersê. Ma fek dewaya xo ra vera nêdanê." 

 

'Ganî reyêk bîn nêrê nimitişî' 

 

Aynûre tewr peynî wina vat: "Bismil de qereqola kane amî xerepnayîş û di bin de esteyê însanan vejîyayî. Beno ke nê ê nasanê ma bê. Wexto ma eşnawit asteyî ameyê vînayîş ma zaf hêsgir bîyî. Hetêke ra xemgînîyêke bîbî û hetêke bîn ra zî ma vatêne êdî hesreta ma peynî bî. Ma vanê do êdî mezelê babê mi zî bibo. Labelê bi tewirêke nimitkî esteyê ke ameyê vînayîş, reyna kerdê binê herdî. Ganî testê DNAyî bêro ca. Eke cenazeyê ma nêbê  zî beno ke yê hinî merdimanê bînan bê zî. Coka ke aqûbetê bi seyan merdiman eşkera nîyê, nimitişîya înan û binherdkerdişê lezkî, ramojneno ke tîya de çîyêke esto. Wa rastîya tîya vejîyo werte. Ganî nê esteyî vindî nêbê."