Safiye Alagaş-Gulşen Koçuk

 

STENBOL - Sereka Merkezê Heqê Cinîyan ê Baroyê Stenbolî avûkate Şukran Eroglû, da zanayene ke ganî Daniştay derheqê antişê Peymana Stenbolî de qerarê betalkerdişî bido yan zî do sere ro DMMEyî  bidê û vat, ê do dest peymane ra vera nêdê. Bi qerarnameyê Serekkomar Tayyip Erdoganî di 20 Adare ya 2021î de Peymana Stenbolî ame feshkerdiş û derheqê betalkerdişê feshkerdişê peymane de di 10in Daîreyê Daniştayî de dewa amîbî akerdiş û dewaya hîrêyîn ewro(14ê Hezîrane) de do bêro vînayîş. 

 

7ê Hezîrane de Daniştayî muracatê Meclîsê Cinîyan ê HDPyî, ewilî cinîyî, Komeleya Tutan, Partîya Çepî, Baroyê; Malatya, Zongûldak, Qers, Artvîn, Denîzlî û Kirklarelî girewtî rojeve. Persêrê Daniştayî di roniştene de waştişê betalkerdişê antişê Peymana Stenbolî da û di salone de avûkatan mutealayê persêrî verpers bi çepikan da. 

 

Di roniştenan de hetkarî esta 

 

Sereka Merkezê Heqê Cinîyan ê Baroyê Stenbolî avûkate Şukran Eroglû da zanayene ke verî zî bi da-des reyî vatê bi qerarnameyê serekkomarîyî feshkerdişê peymane goreyê destûrê asasî nîyê û vat: "Seba betalkerdişê feshkerdişê peymana baroyan, rêxistinê cinîyan, partîyê sîyasî gamî eştî û dewa akerdî. 7ê Hezîrane de 15 dewayî ameyî vînayîş. Di 14 û 23yê Hezîrane de do dewayî reyna bi komî bêrê vînayîş. Merkezê Cinîyan ê baroyan, merdimê ke merdimê xo vindî kerdê, partîyê sîyasî yenê roniştiş û hetkarîyêka pîle yena ramojnayîş.  Roniştişî xeylêk qelebalix yenê ca. Serekê Daîreyê 10inê Daniştayî zî vat, o bi xo reya ewilî yo wina qelebalixî vînenê. Coka no têkoşînêkê yo. 

 

Ma teqîbdar ê 

 

Şukrane dîyar kerd ke roniştişê Daniştayî de çîyê yenê vînayîş, têkoşînê heqê merdiman ra cîya nêbeno bêro destgirewtiş û pêkerdiş mekanîzmayêke mîyanneteweyî yê vernî ro her tewirî şîdetî, vernîyê cinîyan de girewtêne û nê çîyî qal kerdî: "Welat de her roje cinîyî yenê qetilkerdiş ke feshkerdişê peymane nêbeno bêro qebûlkerdiş. Ma cinîyê huqûqnasî û rêxistinê cinîyan do heta peynî têkoşîn bikerê. Seba caardişê huqûqî ma do teqîbdarê dewa bê. Cinîyî nêwazenê bimrê û ciwîyêka azade wazenê. Di Destûrê Asasî û Beyannameyê Kaînatî yê Heqê Merdiman de madeyê derheqê seyyewbînî yê heqî de estê û no feshkerdiş duştê heqê merdiman de yo zî. Îqtîdarî qanûnan goreyê xo sererast kenê. Sîstemê serekîyî dir heqo ke goreyê xo hereket bikerê bidest fînayî. La ma reyna vanê Destûro Asasî di vîyartbarîyî de yo. Her kes hemverê Destûrê Asasî de seyyewbînî yo. Peymana mîyanneteweyî di hukmê qanûnî de yena qebûlkerdiş. Vera nê zî ganî Peymana Stenbolî apey bêro." 

 

'Dozgerî bi israr vanê qerar goreyê huqûqî nîyo' 

 

Şukrane wina dewam kerd: "Dadgehan heta nika qerarêke nêdayê. Dima ra ke ro nê dewayê bînan biewnê do qerarêke bidê. La eşkayêne sere de qerarêke bidayêne. Dozgerî sere ra zî vatêne no qerar duştê huqûqî de yo. Avûkatê serekkomarî goreyê xo pawitiş kerdê û no pawitiş goreyê rastîya welatijan nîyo. Îdîa kerdî ke na peymane bi tewirêke eksê huqûqî bî coka ameya vedaritiş, goreyê huqûqî ameya wedaritiş. Qet hetê înan ê huqûqî çinî bî. Pawitişêke Utopîk bî. Ma welatêke azad û bê şîdet nêciwîyenê." 

 

'Ganî heyet qerarê feshkerdişî betal bikero' 

 

Şukrane di peynîyê qiseyê xo de nê çîyî beyanat kerdî: "Heyetê dadgehe zî umîddara ke goreyê mutealayê persêrî hereket bikero û wina qerar bido. Dozgerê Daniştayî goreyê asasê ke ma vatê muteala hadre kerdê. Ganî heyetê dadgehe zî qerarê feshkerdişê peymane betal bikero. Eke qerarê betalkerdişî nêro dayîş, ma do sere ro Dadgeha Heqê Merdiman ê Ewrûpayî bidê. Ma do şêrê heyetê corî. Nê Welatî de her roje cinîyî yenê qetilkerdiş ke qet merdimêke nêeşkeno bêveng bimano. Dewlete mecbûra asayîşê ganê welatijanê xo bikero."