AMED - 20 ci ra rojnamegerî 22 kesê ke dimayê 8 rojan sewqê dadgehe ameyî kerdiş. Derheqê babete  DFG û MKGP verê Edliyeyê Amedî de beyanat dayî û vatî: "Şima nêeşkenê ma bêveng bikerê." 

 

Komeleya Rojnamegeran ê Dîcle Firatî (DFG) û Platformê Rojnamegeranê Cinîyan ê Mezopotamyayî (MKGP) mîyan de Hemserekê DFGyî Serdar Altan, Mudura JINNEWSî Safiye Alagaş, Mudûrê Karê Nuşteyî yê Rojnameyê Xwebûnî Mehmet Alî Ertaş zî mîyan de di sereştişê keyeyan de 20 ci ra rojnamegerî 22 kesî ameyî destbendkerdiş, verê Edliyeyê Amedî de beyanat dayî çapemenîye. Keye û meslegdarê rojnamegeran, temsîlkarê sazgehê sivîl î û partiyê sîyasî beşdarê beyanatî bî.

 

‘Şima nêeşkenê ma bêveng bikerê’

 

Kadrî Esen, wayîrê îmtiyazî yê Xwebûnî qisey kerd û vat: "Bi 8 rojî yo embazê ma destbendkerde yê. Her çiqas sebebê ci ma ra nêvajê zî ma zanê ke nê hêrişî hemverê ziwanê kurdkî bi ca yenê. Ma ra vanê ke lazim o şima vengê xo nêvejê. La ma bêveng nêbenê. Ma zanê nê hêrişî vera kurdan bi ca yenê, nê hêrişî hemverê şarî yê. Seba ke xeberê rastî nêrê weşanayîş, ê muracatê nê rayîrî danê. No hêrişêk newe nîyo û peynî zî nîyo. Bê guman do viraz yo. Labelê rexmê pêro hêrişan ma xeta xo pawit, ma do ewro zî bipawê. Vera ke ma nê polîtîkayan de tesîr bibê, ma do xo ver bidê. Şima nêeşkenê ma bêveng bikerê.”

 

‘Ganî ma xoverdayîşê xo girs bikerê’ 

 

Hemsereka DFGyî Dîcle Muftuoglu zî qisey kerd û vat: “No demêk o embazê ma destbendkerde yê. Ma do dimayê 8 rojan bizanê ke gelo bi çi bahaneyî ameyê destbendkerdiş. La ma baş zanê seba rastî nêvejîyê, ê ameyî destbendkerdiş. 8 rojî yo şîrîkê ajansê ma binê ablûqa de yê. Labelê tu tehdîd û hêriş nêeşkeno ma bêveng bikero. Serranê 90î ra şima hêriş kenê û şima serkewte nêbî. Şima ewro zî nêresenê amancê xo. Seba ma rastî biresnê şarî, ma do xoverdayîşê xo girs bikerê. Ma taqîbkerdoxê rayîrê Apê Mûsa û Gurbetellî Ersoy ê."

 

Beyanat bi sloganê, "Çapemenîya azad nîna bêvengkerdiş" peynî bi.