MERKEZÊ XEBERAN - Cinîya sîyasetmedar Mehmet Zekî Çelebî, Nurten Çelebî seba vînayîş û muhakemekerdişê qatilî mîyanê tevgerî de ya û vat: “Kuçeyêkê qelebalix de verê dikanî de senîn yeno qetilkerdiş? Û nê kesî senîn mîyanê 37 deqîqeyan de vejênê û şinê? Qet kamera çin a? Heta ez ê qatilan nêvînî, hesab nêpersî û ê nêrê cezakerdiş, ez nêvindena."

 

Hêrişê hemverê Mintiqaya Federal a Kurdistanî ke hetê Arteşa Tirkî ra ameyo destpêkerdiş, bi hemkarîya Partîya Demokrate ya Kurdistanî (PDK) dewam kena. Pêwa hêrişan, mintiqa de hemverê multecîyê sîyasî zî hêriş yeno kerdiş. Sîyasetmenderê kurdî Mehmet Zekî Çelebî ke pîyê 2 tutan bi, serra 2010ine de seba teda û zordarî û cipersayîşê ke derheqê ey de ameyî akerdiş, mecbur mend ca û wareyê xo terk bikero. Zekî verê xo dano Silêmanî û uca de bi ca beno. 17ê gulane de netîceyê hêrişêk çekdarî de yeno qetilkerdiş. Cinîya Zekî Çelebî Nurten Çelebî, seba muhakemekerdişê qatilan venga selahîyetdaranê mintiqa kerd.

 

‘Hemverê welatperweran suîqast kenê’

 

Nurtene, diyar kerd ke xeylêk rey bi tehdîtan dir rî bi rî mendê û vat: "Dimayê serra 2010ine dosyaya mêrdeyê mi hetê Dadgeha Berzî ra ame tesdîqkerdiş, ma zî Wan ra vejîyayî. Ma koçberê Silêmanî bî, ê wextî ra heta nika ma tîya de ciwîyenê. Seke heme vakurîyê ke tîya de ciwîyenê, mêrdeyê mi zî bi telefon ameyîne tehdîtkerdiş. No tehdîd prosesê îşxalkerdişê  Efrînî de dest pêkerd. Pêwa ke ma tehdîdan bi belgeyan tespît kerd û teslîmê selahîyetdaranê mintiqa zî kerd, tu tedbîrî nêameyî girewtiş. Raşt o,  têkoşînê 40 serrî de dewlet û hêzê ci yê tarî tena wareyê şerî de ney, hemverê siyasetmedarê kurdî, hemverê welatparêzan qetlîamê bi nê rengî bi ca ardê. No sûîqesto ke hemverê mêrdeyê mi ameyo kerdiş zî parçeyek nê ra bi. No sûîqestêk hemverê nasnameyê welatperwerîyê mêrdeyê mi bi.”

 

‘Heta nika tu zanayîş nêdayî ma’

 

Nurtene, vat ke heta nika derheqê qetilkerdişê Zekî de asayiş tu zanayîş nêdayo û wina vat: "Belê, no sûîqest hetê dewleta Tirkî ra bi hetkarîya PDKyî de ame kerdiş. Pêwa ke nêzdîyê aşmêke serê qetilkerdişê mêrdeyê mi ra derbas bi zî heta nika kesêk nêame destbendkerdiş. Tena zanayîşê kesê ke serê motorsîklêtî de remenê û mîyanê 37 deqîqeyan de zî bi wesayit espar benê û sînorê Silêmanîye ra vejênê. Çîyo ke ez meraq kena û persena no yo; nê kesî dimayê nê sûîqastî Silêmanîye de mendê. Nê kesî ça mendê, kam ci otele de mendê û motorsîklet yan zî wesayitê ke xebitnayê senîn ameyê bidestkerdiş? Yanî ma qet nîno perskerdiş û nîno vînayîş?”

 

‘Ganî hesab bidê’

 

Nurtene vat, heta ke qatilî bêrê vînayîş do têkoşînê xo dewam bikero û vat: “Na rewşe zî bi hawayêke akerde mojneno ke no sûîqest ameyo plankerdiş. Ne PDKyî serê nê de beyanat da û ne zî ma beyanatêk cidî tîya dî. Ez wazena hesabê nê çî bidê. Ganî ê hesabê nê bidê mi. Mêrdeyê mi bi hetkarîya MÎTî ke  PDK paştdayîş dano, bajarêk roşnvîrî yê serê herra Kurdistanî ya Silêmanîye de yeno qetilkerdiş. Çira ez vana bi paştdayîşê PDKyî? Seba ke vanê ê kesî şîyê uca. La heta nika PDKyî derheqê babete de tu zanayîş nêdayo. No çî mojneno ke hetkarî kerdo.”

 

‘Ez nêvindena û ez o hesab pers bikerî’

 

Nurtene tewr peyîn wina vat: "Bi rastî ez tîya selahîyetdaran ra pers kena. Kuçeyêk qelebalix  seke cadeyê baxtiyarî verê dikanî de senîn yeno qetilkerdiş? Û nê kesî senîn mîyanê 37 deqîqeyan de bi motorsîklet vejênê û şinê? Qet kamera çin a? Tîya her kuçe de bi desan kamera estê. Senîn dîmenê înan çin ê? Ez pers kena. Di tutê mi estê. Seba vînayîşê qatilan, nê prosesê hukmî de çi destê mi ra bêro ez o bikerî. Seba hesab bipersî ma prosesêk da destpêkerdiş. Ez nêeşkena vinderî û ez nêvindena zî. Heta ez nê qatilan nêvînî, hesab nêpersî û ê nêrê cezakerdiş ez nêvindena.”