AMED - Bi tewrbîyayîşê partiyê sîyasî, sazgeh û rêxistinê komelî verê awanîya DFGyî de beyanatêk da û tepiştişê 16 rojnamegeran ame şermezarkerdiş. Hemsereka DFGyî Dîcle Muftîoglu qisey kerd û vat: "Şima bi tepiştişan nêeşkenê ma bêveng bikerê." 

 

22 kesê ke 8ê hezîrane de çarçewaya cipersayîşê ke Serdozgerîya Komara ya Amedî dabî destpêkerdiş û amebî destbendkerdiş de 16 rojnamegerî ameyî tepiştiş. Hemserekê Komeleya Rojnamegeran ê Dîcle Firatî Serdar Altan, Mudûra JINNEWSî Safiye Alagaş, Mudûrê Karê Nuşteyî yê Rojnameyê Xwebûnî Mehmet Alî Ertaş, muxabirê Xwebûnî Zeynel Abîdîn Bulut, edîtorê Ajansê Mezopotamyayî (MA) Azîz Orûç û rojnameger Omer Çelîk, Lezgîn Akdenîz, Mehmet Şahîn, Sûat Dogûhan, Ramazan Gecîken, Neşe Toprak, Îbrahîm Koyûncû, Mazlûm Dogan Guler, Elîf Ungur, Remziye Temel û Abdurrahman Oncu ke  dozgerî înan sewqê Dadgeha Sulhî ya Nobedar kerd, ameyî tepiştiş. Sewbîna edîtora ajansê ma Gulşen Koçuk, rojnamegere Esmer Tûnç, Kadîr Bayram, Mehmet Yalçin welatiyê bi nameyê Feynaz Koçûk û Îhsan Ergulen zî bi şertê kontrolê edlî ameyî veradayîş.

 

Komeleya Rojnamegeran ê Dîcle Firatî (DFG), hemverê tepiştişê 16 rojnamegeran verê bînaya xo de beyanatêk da çapemenîye. Partiya Demokratîke ya Şaran (HDP), Partîya Mintiqaya Demokratîke (DBP), Komeleya Kultur, Yewîye, Paştdayîş û Hetkarîya Keyeyê ke Merdimê xo Dergûşê Şaristanî de Vînî Kerdê (MEBYA-DER), Komeleya  Cigêrayîşê Kultur û Ziwanê Mezopotamyayî (MED DER), Komeleya Paştdayîşp bi Keyeyê Tepişte û Hikûmwerdoxan dir (TUHAYDER) û xeylêk rojnamegerî tewrê beyanatî bî. Metnê beyanatî hetê Hemsereka DFGyî Dîcle Muftuoglu ra ame wendiş.

 

‘Vizêr ma qetil kerdî ewro ma tepişnenê’'

 

Dîcle diyar kerd ke bi 30 serrî yo rojnamegerê kurdî serê rêça heqîqetî de yê û vat: "Roje ameye meslegdarê ma ameyî qetilkerdiş, ajansê înan ame bombavarankerdiş, roje amî berê înan ame mohrkerdiş. Belê reng û metodê hêrişan ame vurnayîş labelê eslê înan nêame vurnayîş. Yê ke vizêr ma serê rayîran de qetil kerdî ma tepişnenê û şawenê zîndan. Ma baş zanê bi doz û qeraran meslegê ma yeno tewanbarkerdiş. Wazenê karê ma krîmînalîze bikerê. Bê tehemulîyê înan yê hemverê ma eşkere bi. Tepiştişê meslegdaranê ma seba hînan kerdî xelat.”

 

‘Şima nêeşkenê ma bêveng bikerê’

 

Dîcle, vat tu tehdîd nêeşkeno rojnamegeran bêveng bikero û wina vat: "Çapemenîya binê şert û mercê zehmet de hewil dana ke biba vengê her wareyî. Erdogan her beyanatê xo de Abdulhemît xo rê keno referans. Wazeno sîstemê îstixbaratî yê demê Abdulhemît bikerê. Her ca de fotografê Erdoganî ameyê daliqnayîş û bi nê rengî wazenê hewrêk tersî serê ma de awan bikerê. Seba rastîyê caardişê xo dîyar nêkerê zî hêrişê çapemenîya azad kenê. La ma şima ra vanê, ma do bi înat, pêwa heme astengiyan ma do xebata xo bikerê. Ma rojnameger ê û şima nêeşkenê ma bêveng bikerê."

 

Beyanat dimayê çalakiya roniştişî yê 5 deqiqeyan bi peynî bi. Çalakîya roniştişî de sloganê sey "Amed wurze, wayîrê rojnamegeranê xo vejî", "Çapemenîya azad bêveng nêbena", "Hêrişî nêeşkenê ma bêveng bikerê" ameyî berzkerdiş.