ÎZMÎR - Dadî û embazê  Denîz Poyraze ke serrêke verî di hêrişê hemverê HDPyî yê Îzmîrî de amî qetilkerdiş, qisey kerdî û eşkera kerdî ke Denîze emro qij de verpersîyarî girewta serê xo û bi têkoşînê ke daya, ciwîyena. 

 

Verguman Onûr Gencer serra vîyarteyî de hêrişê HDPyê Îzmîrî kerd û xebatkara partîye Denîz Poyraze qetil kerdbî. Denîze ke ciwîya aye bi têkoşîn derbas bî, dadîya aye Fehîme Poyraze û embazê aye Hayat Îzgî û Hulya Akman derheqê aye de qisey kerdî. 

 

Fehîme Poyraz û Abdullah Poyraz dewa Xerbêmirîşkanî ya Omerî ya Mêrdînî ra bî, tehdayê sîyasî ra ewilî barê Amedî kenê û dimayê ke zewejênê, Kadîfekaleyê Konakî yê Îzmîrî de ca gênê. Denîze di serra 1984î de Kadîfekale de yena dinya. 8 way û birayê Denîze estê û wexto Denîze 11 serrî bîya babê aye vera sîyayî yeno girewtiş.  Vera nê dadîya ci Fehîme xebetêna û Denîze zî seba biewno way û biranê xo ra dest mektebî ra vera dana. 

 

'Tûtîyîya xo nêciwîya' 

 

Fehîme da zanayene ke Denîze tûtîyîya xo nêciwîya ya û wina ci de şî: "Xo kerd herinda dadîyêke. Verpersîyarîyê tutan girewt serê xo. Her kar kerdê. Babê aye çend serrî pey ra zîndan ra vejîya. Ma se kerdêne Denîze verê ma de bî. Mekteb teber de qedêna. Wexto ameyêne keye kitab wendêne. Şan de ameyêne keye wayan û biranê xo dir wendêne. Merdimêka zerrî rehme bî. Aye merg heq nêkerd." 

 

'Xebatê HADEPî kerd' 

 

Fehîme wina dergî da qiseyanê xo: "Di emro qij de têkoşînê Kurdî nas kerd. Şîyêne Merkezê Kulturê Mezopotamyayî. Xebatê ciwanan de ca girewtêne.  Ma dir ameyêne partîya HADEPî. Her kar kerdêne. Nêvatêne ney. Wextêk kilm de hemserekîya HDPyê Konakî kerd. Hetkarî da çapemenî zî. Têkoşîn ra hes kerdêne. 

 

'Seba tewirê cenaze bîbî, ameye muhakemekerdene' 

 

2 wayî û birayê aye yenê tepiştiş û serê nê ra dadîya înan Fehîme xebetêna. Fehîme 3 serrî HDPyê Îzmîrî de karê kulin de dir eleqedar bena.  La vera ke Fehîme emelîyat bena, Denîze herinda dadîya xo de dest bi xebate kena. Roja ke Denîze yena qetilkerdiş dadîya aye seba pansumanê destê xo şina nêweşxane. Fehîme, a roje wina ana ziwan: "Panşeme bî. Roja îne zî roniştişê aye yê dewaya Dîlan Kortak ra bîbî. Seba ke tewirê merasîmê cenazeyê Dîlan Kortak bîbî dewa ro ci amîbî akerdiş. Embaza Denîze bî. Ma keyeyê welatparêzî yewbînan ra hes kerdêne. Babê ci vat ez bêra la aye vat meşte de bêre. Seete 11:05î de malûmatê qetilkerdişê aye ame." 

 

'Ê ke vatêne Denîze terorîst a, ê bi xo terorîst ê' 

 

Fehîme wina dewam kerd: "Verguman Onûr Gencer hîsê ey yê însanî çinî yê. Qetil keno sero vindeno û erzeno înternetî. Vano terorîst a. La o bi xo terorîst o. Kênaya mi zirar nêda tu kesî. Nê zî xayîne bî. Ez, ê ke kênaya mi  qetil kerdê şermezar kena. No zîhnîyetê merdimayî nîyo. Tena ro Kurdan ney, hemverê Elewî û bawerîyê cîyayî de zî nînan kenê.

 

Na serre de ma xeylêk zametîyî antî. La şarê ma wayîr ro Denîze vejîya. Denîze merg heq nêkerd. Pêwa ma veng nêkerd, bi hezaran merdimî verê ma de bî. Kênaya mi bê sûc amî qetilkerdiş. Kênaya mi ne a ewilî ya ne zî a peynîyî ya. Ez o her tim têkoşînê kênaya xo bidomnî. Her kes berxikê dadîya xo yo. Bêrê ma dest bidê yewbînan û nê şerî vindarnê!" 

 

'Çareserî Îmrali yo' 

 

Fehîme bale ante serê dewaya padayîşê derheqê HDPyî de û wina ard ziwan: "No hewldayîşêk tal o. Şarê Kurdî her tim dimayê têkoşînê xo bî. Çareserî Îmrali yo. Ganî ma yewbînan goştarî bikerê. Ma derdê yewbînan goştarî nêkerê do gonî birişîyo. Ma heme wayî û bira yê. Ma vera Denîz Gezmîş nameyê Denîze ro kênaya xo kerd. Nameyêke aye yo bîn zî bîbî, o zî Mizgîn bî. Dimayê kênaya mi ro 85 tutan nameyê Denîze ame ronayene. Denîze  şî, la hezar Denîzî ameyî dinya." 

 

'Mi Denîze di têkoşîn de nas kerd' 

 

Embaza aye Hulya Akman zî dîyar kerd ke Denîze 5 serrî ci ra pîl bîya û xeylêk çî aye ra bandêr bîya û nê çîyî qal kerdî: "Ez şîyêne Merkezê Kulturê Mezopotamyayî. A zî di baskê ciwanan de bî. Mi a uca de nas kerd. 10 rojî verîyê serebûte mi a vîna. La tu çîyêke têkoşîn û enerjîyê xo ra vindî nêkerdbî. Karê xo bi heskerdiş kerdêne. Di wextê tewr zamet de zî huwayêne. Tutan dir xoşeber kerdê, kal û pîrî zî goştarî kerdêne. Xeylêk ameyêne heskerdene. Ma Denîze her tim wina vîr fînenê." 

 

Hulya ard ziwan ke tu kes Denîze vîrî ra nêkeno û derheqê qetilkerdişê aye de zî wina vat: "Îqtîdar her tim vano 'Wextê ma de kiştişo kerdox eşkera nîyo, çinî yo'. Qatilê Denîze nêrema. Bi zanebîyayîş vindert. Vernîyê a awanîyî de çadire bîbî. Gelo seba pawitişê awanî bî yan zî seba pawitişê qatilî bî? Têkilîyê vergumanî dewlete dir estê na eşkera ya. Yanê tena bi sereyê xo no qetilkerdiş nêkerd. Ma bawer nîyê ke qatilî yenê muhakemekerdişî zî." 

 

Yewbînan dir ameyî destbendkerdiş 

 

Aktivîsta TJAyî Hayat Îzgî zî vat di serrê DEP û HADEPî de baskê cinîyan de ca girewto, Denîze zî di xebatê Konakî de vînayo û wina erjnayîş kerd: "Ma seba rojbîyayîşê Abdullah Ocalanî keyeyê înan de pîrozbayî kerdêne. Polîsan eşt serê keyeyî ma destbend kerdî. Ma 11 ciwanî bî. Denîze zî bîbî. Mi vat 'Emrê aye qij o veradê'. Aye vat bî 'Ez 18 serrî ya'. Ma 4-5 rojî nezaret de mendî. Denîze zî sey heme çîyê ke cinîyê Kurdî ciwîyayê, ê çîyî ciwîya. Eke ti Kurde bê û welatparêze bê ti do bêrê kerrakerdiş. Çimê dewlete de Kurdî terorîst ê. Merdimê bêsîleh senîn kişenê? Ê ke şer û krîz vejenê cayê xo de ronişteyê, la Kurdî terorîst ê. Terorîstî ê yê, ma nîyê. Kurdî serberz ê. Ma bi sayeyê têkoşînê şehîdê xo ameyê nê sewîyeyî."