ANQARA - Parlamenterê HDPyî reaksîyon vera tepiştişê 16 rojnamegeranê kurdan da û dîyar kerdî ke rojnamegerî seba heqîqet şarî rê neql kerdê, ameyê tepiştiş û ganî komel  bi hawayêke topyekun vengê xo berz bikero.

 

Çarçewaya cipersayîşê ke hetê Serdozgerîya Komare ya Amedî ra amebi destpêkerdiş de polîsan 8ê hezîrane de 20 ci ra rojnamegerî 22 kesî destbend kerdî û 8 rojan destbenkerde mendî. 15ê Hezîrane de vetî dadgehe û 16 kesî bi îdiayê endamîya rêxistine û propagandayê rêxistine kerdê, ameyî tepiştiş. Serdar Altan, Mehmet Alî Ertaş, Safiye Alagaş, Azîz Oruç, Omer Çelîk, Suat Doguhan, Ramazan Gecîken, Neşe Toprak, Zeynel Abîdîn Bûlût, Mazlum Dogan Guler, Mehmet Şahîn, Elîf Ungur, Îbrahîm Koyuncu, Remziye Temel, Abdûrrahman Oncu û Lezgîn Akdenîz bi îdiayê ‘endamîya rêxistine’ ameyî tepiştiş. Rojnamegere Esmer Tunç, Mehmet Yalçin, Kadîr Bayram û Feynaz Koçuk û Îhsan Ergulen zî bi şertê kontrolê edlî ameyî veradayîş.

 

Parlamenteranê HDPyî reaksîyon vera tepiştişê rojnamegeran mojnayî û diyar kerdî ke ganî reaksîyon bêro pîlkerdiş.

 

‘Hedef çapemenîya azad a’ 

 

Parlamentera HDPyî ya Stenbolî Zuleyha Gulum reaksîyon vera hêrişî de mojna û vat: “Demo ke hewl danê hêrişê komelî bikerê, ewil çapemenî ra dest pêkenê. Çapemenî, azadiya fikr û fehmî ya. Şar xo  bi çapemenî îfade keno. Seba vernîya nê bêro padayîş zî hêriş kenê. No çîyêk newe nîyo. Demêk derg o bi bahaneyê cîya hêrişê rojnamegerê çapemenîya azad kenê. Tu hetê nê yê huqûqî çin o bi operasyonêk 16 rojnamegerî ameyî tepiştiş. No hêriş tena hemverê rojnamegerê kurdî bi.”

 

‘Ganî bi hawayêke topyekun veng bêro vetiş’

 

Zuleyha vat, xebatkarê çapemeniya azad bi pêlê hêrişan dir ameyê rî bi rî û vat: “Verdayîşê destbendkerdişê 8 rojan metodê îşkenceyî yo. Werte de xora sûcek çin o. Seba wezîfeyê xo kerdê ameyê destbendkerdiş. Dimayê 8 rojan 16 embazanê ma destbend kerdî. No helwest seba bêvengkerdişî yo. Seba nê zî ma bi hawayêke topyekun vengê xo berz bikerê. Ganî ma nê hêrişan ra vajê ney.”

 

‘Çapemenîya azad qelama Mûsa Anterî erd de nêverda’

 

Parlamentera Wanî Muazzez Orhan zî wina reaksîyon ramojna: “Serranê 90î qetilkerdişê Apê Musa ra heta nika hêrişê hemverê çapemenîya azad dewam kenê. AKPyî hêrişan tewr zêde xidar kerdo. Hemverê kurdan de operasyonê qirkerdiş, îmha û înkarî yenê kerdiş. Qirkerdişê cinî resayo sewîyeya tewr cor. Çapemenîya azad çinbo, xebera komelî zî çîyêk ra nêbeno. Bi xêrê çapemenîya azad ma musayî ke cenazeyî bi kargoyan keyeyî rê şinê. Ma bi xêrê çapemenî tecrîdê giranî ra xeberdar benê, polîtîkayê tecrîdî ra xeberdar benê. Îqtîdar seba vernîyaya nînan bigîro, verê xo dano çapemenîya azad. Şexsê rojnamegeran de wazenê komel bêveng bikerê. La çapemeniya azad tu wext bêveng nêmende û do nêmano. Ma zî bibê vengê embazanê xo.”

 

‘Ma fek têkoşînê heqîqetî ra vera nêdanê’

 

Parlamentera HDPyî ya Stenbolî Oya Ersoy vat ke AKP çapemenîye her tim hedef gêno û wina vat: “Îqtîdar rastiyan ra terseno. Nêwazeno rastî biresê şarî. Seba nê zî hêriş keno. Bi destbendkerdiş û tepiştişî hewl danê ke bikerê binê tedayan. Êdî hêvîya şarî AKPyî rê nêmenda. AKP rastiyan ra terseno. Seba nê zî rojnamegeran hedef gêno. 16 embazê ma tepiştî. Se kenê wa bikerê şarê ma pêro rastiyan vîneno. Ma do reaksîyonê xo berz bikerê û çi destê ma ra bêro ma do bikerê.”