Gulîstan Şahîn 

 

QAMIŞLO  - Muxabîra Jîn TVyî  Ferîda Zada ya di belgefîmê rojnamegere Nûjîyan Erhan de rolê Nûjiyane kay kerdo wina qalê belgefîlmî kerd: "Asan nê bî ke rolê cinîyêke têkoşêre yê seke Nûjîyan Erhan kay bikera. Nûjîyan Erhan seba dewaya Şarê Kurdî kedêke pîl daya. Şehadetê Nûjîyane serê komeleya Êzîdî de tesîrêke pîl kerd. No belgefîlm di şexsê şehîd Nûjîyane de ganîkerdişê cinîyê têkoşêrî û wayîrvejîyayîşê Nûjîyan Erhane yo." 

 

Seba belgefîlmê Rojnamegere Nûjîyan Erhan di serra 2019î de dest bi hadreyîyê xebate ameyo kerdiş û di serra 2021î de temam bîyo. Dîrektorîya Belgefîlmê Nûjîyane, Jînda Asmîn, Averfînayîş Zinarîn Zinar û Jînda Asmîn kenê. Kaykerdoxa belgefîlmî zî Ferîda Zada kena. Belgefîlm serê têkoşêr û rojnamegere Nûjîyan Erhane ya ke di 3yê Adare ya 2017î de bi hêrişê çeteyê rojî, bi giranî birîndar bî û 22yê Adara 2017î de Şaristanê Hesekî de dinyaya xo bedilna. Nûjîyan Erhan di mîyanê komeleya Êzîdî de xusûsî seba cinîyê Şengalî xeylêk têkoşîn kerd û hemverê wehşîyîyê DAÎŞî yê duştê cinîyê Êzîdî de xo ver da û nê wehşîyî dinya rê neql kerd. Bî çimeyê ciwîye, eynî wextî de bî veng û rengê cinîyê Şengalî. Belgefîlm do di 17ê Hezîrane de şaristanê Hesekî yê Rojawanê Kurdistanî de bêro mojnayîş. 

 

Seba ke ma muhteva û amancê Belgefîlmê Nûjîyane nas bikerê, kaykerdoxa belgefîlmî, muxabîra Jîn TVyî Ferîda Zada ajansê ma rê qisey kerd. 

 

'Seba vîrameyîş û têkoşînê Nûjîyan Erhan belgefîlm ame hadrekerdiş' 

 

Ferîda Zada ya ke di rolê Nûjîyan Erhan de kay kerda, eşkera kerd ke Belgefîlmê Nûjîyane seba vîrameyîşê ked û xoverdayîşê Rojnameger Nûjîyan Erhan de ameyo hadrekerdiş û wina dest bi qiseyê xo kerd: "Nûjîyan Erhan wayîrê şexsîyetêke şorişgêre bî. A rojnamegere û şaîre bî. Aye hewl da şarê Şengalî rê bibo paştêke. Şengalo ke her hesî fek ci ra vera dabî, Nûjîyane heta peynîyî de zî di oxirê dewaya şarê xo de şehîd kewte. Seba vîrameyîşê kede ya Şehîd Nûjîyan Erhan, xebatêke ameye kerdiş. Na xebate zî Belgefîlmî Nûjîyane bî. Belgefîlm di serra 2019î de Şengal de ame destpêkerdiş. Ekîbo ke Belgefîlmê Nûjîyane dir mijûl bîne; Seke Zinarîn Zinar û Jînda Asmîn, ma hewl da bi îmkan û ekîpmanê kemî na xebate ser de bifînê. Antişê dîyayîşkîyan û kaykerdoxî nizdê 4 mangan Şengal de, cayê ke Nûjîyan Erhan ci de şar aye nizdî ra nas kerdêne û xo ver da, ame kerdiş. Di eynî wextî de roportaj kesê ke Nûjîyan Erhan nas kenê dir ame viraştiş. No roportaj têkilîyê bivîramayîşê aye û helî yê ke hemverê çeteyê Pêşmergeyê Rojî û PDKyî de têkoşîn kerdo, ame girewtiş." 

 

'Zametîyê ke vernîyê belgefîlmî de vejîyayî' 

 

Ferîda Zada wina qalê zametîyê ke vernîyê belgefîlmî de vejîyayî kerd: "Çîyêke asan nêbî ke no belgefîlm bêro viraştiş. Hem hetê zorîya serdê Koyê Şengalî ra û hem zî hetê kemîya îmkananê teknîkî ra. Sewbîna şero ke di 2019î de serê Şengalî de ame kerdiş, vernîyê karî de bî manî. Roportaj û dîyayîşkîyê heqîqetî seba belgefîlmî muhîm bî. Vêşêrê nê manîyan zî israrê ma yê kerdiş û dewamkerdişê na xebate nêame vindarnayîş." 

 

'Kaykerdişê rolê Nûjîyan Erhan asan nêbî û barê mi giranêr kerd' 

 

Ferîda Zada qal kerd ke kaykerdişê cinîyêke têkoşêre, di oxirê dewaya şarêke de şehîd kewta asan nêbî û wina domna: "Seba mi sey şexsîyetî asan nêbî ke ez rolê Nûjîyan Erhan kay bikera. Mi nameyê aye eşnawit bî la mi a nas nêkerdbî. Mendişê min o di Şengal de bi merdimê ke a nas kerdêne, barê mi giranêr kerdê. Mi hîs kerdê ke ez o nêeşkî heqê na şehîde bida û nêeşkî cayê aye bigîra ke hende şer kerda û hende xoverdayîş daya kerdiş. Bi rastîyî zî, kaykerdişê rolê cinîyêke di oxirê şarêke de ke şehîd kewta asan nêbî." 

 

'Şehadetê Nûjîyane bi xusûsî seba şarê Şengalî bi tesîr bî' 

 

Ferîda Zada bale ante serê qehremanîya Nûjîyan Erhane ya ke beranberê Artêşa Iraqî û PDKyî,  sewbîna tesîrê şarê Şengalî yo bi şehadetê aye û wina vat: "Di hela şerî de wexto ke waşt rastîyî hêrişê Artêşa Iraqî û PDKyî yê serê şarê Şengalî de vejo û waşta dîyayîşkîyan bianco, a şehîd fînayê. Şehadetê Nûjîyan Erhan zaf bi dej û bi tesîr bî. Bi xusûsî seba şarê Şengalî ke, a xo rê seke serekêke vînayê ne. Heta roja ewro wexto nameyê Nûjîyan Erhan yeno serê ziwanî, bi yew tevrêke û yew heskerdene yena behskerdiş. Heta na hele zî a yena bivîrameyîş û şarê Şengalî serdayîşê gora aye bi gul û vilikan xemelnenê." 

 

'Ganî ma ro şexsîyetê fena Nûjîyane wayîr vejîyê' 

 

Ferîda Zada dîyar kerd ke milet wayîr ro şexsîyetê fena Nûjîyan Erhan nêvejîyeno, do dewa û heqê xo ra dûrî bikewê û wina ci de şî: "Her çiqas wextê cikewtişê belgefîlmî nizdî beno, kelejanê pîl ma dir virazîyeno. Beranberê nê yewî de zî fikirnayîşêke wina  bala merdimî anceno ke wexto hende merdim  belgefîlmî seyr bikerê, heta çi sewîyeyî ma do bieşkê wayîr ro nê şexsîyetî vejîyê û ganî bikerê. Yew amancê ma zî o yo ke, ma bieşkê ciwîye, têkoşîn û xoverdayîşê Nûjîyan Erhan her merdimî rê bidê naskerdiş. Coka ke tena nîyadîyayîşê kaykerdox, kamerawan û dîrektorî qîm nêkeno. Ancax şar bivîno û hukum bikero heta ke no şexsîyet bêro vîrameyîş û her kes derse ciwîya aye ra bigîro. Muhîm o ma di her hele de wayîr ro şehîd û têkoşêrê xo vejîyê. Eke ma nêeşkê wayîr ro şexsîyetê seki Nûjîyan Erhan vejîyê, o wext ma dewaya xo ra dûrî kewenê." 

 

'Do bergefîlm seba Nûjîyan Erhan  di 17ê Hezîrane de Hesekî de bêro weşênayîş' 

 

Ferîda Zada, da zanayene ke Belgefîlmê Nûjîyan Erhan do di 17ê Hezîrane de Hesekî de bêro weşenayene û wina ro ci zêde kerd: "Ma bi umîdê ke her şexsîyetêke seke rojnamegêr û heme şehîdê ma her wext bêrê vîrameyîş. Di eynî wextî de ma umîd kenê ke no belgefîlm goreyê ke yeno waştiş bo. Nûjîyane zaf reyan embazanê xo ra vatê ez eke şehîd kewta, wa vîrameyîşê mi bi viraştişê belgefîlmêke bo. Do di serra 2022yî de Belgefîlmê Nûjîyan Erhan bêro mojnayîş û do netîceyê ci bêro girewtiş. Belgefîlm Şengal de ame mojnayîş û do Rojawanê Kurdistanî de zî bêro ramojnayîş. Di 28ê Gulane de Xana Sorî ya Şengalî de ame ramojnayîş. Sewbîna di 17ê Hezîrane de do şaristanê Hesekî de, Vakur û Rojhelatê Sûrîyeyî de bêro mojnayîş û peynî de zî mintiqanê bînan de. Seba caameyê Ereban zî, hewldayîşê dublajê belgefîlmî bi Erebkî esto, heta ke her kes ciwîya aye nas bikero."