AMED - Mudura xeberê ajansê ma Safîye Alagaş zî ci de 16 rojnamegêrî ameyî tepiştiş. Reaksîyonê duştê tepiştişê rojnamegeran de zî domenê. Cinîyan eşkera kerd ke tepiştişê Safîye Alagaş hêrişê hemverê JINNEWSî de yo û bi krîmînalîzekerdişê JINNÊWSî hewl danê vengê têkoşînê cinîyan bibirnê. 

 

Çarçewaya cipersayîşê ke hetê Serdozgerîya Komare ya Amedî ra amebî destbendkerdiş de polîsan di 8ê Hezîrane de 20 ci ra Rojnamegêrî 22 tenî destbendkerdî û 8 rojî nezaret de mendî. Di 15ê Hezîrane de vejinayî dadgehe û 16 merdimî bi îdîayê endamîya rêxistine û propagandayê rêxistine kerdê ameyî tepiştiş. Rojnamegerê; Serdar Altan, Mehmet Alî Ertaş, Safîye Alagaş, Azîz Orûç, Omer Çelîk, Sûat Doguhan, Ramazan Gecîken,  Neşe Toprak, Zeynel Abîdîn Bûlût, Mazlûm Dogan Guler, Mehmet Şahîn,  Elîf Ungur, Îbrahîm Koyûncû,  Remzîye Temel, Abdurrahman Oncu û Lezgîn Akdenîz bi îdîayê 'Endamîya Rêxistinî' ameyî tepiştiş. Rojnamegerê; Esmer Tûnç, Mehmet Yalçin, Kadîr Bayram û Feynaz Koçûk û Îhsan Ergulen zî bi şertê kontrolê edlî ameyî veradayîş. 

 

Wextê îfadeyê emnîyetî de 22 merdimî di nezaret de heqê bêvengîyê xo xebetnayî û di cipersayîşê persêrîyî de midura ajansê ma Safîye Alagaş ra muhtevayê xeberan ame persayîş. 

 

Sazgeheê Komeleya Sivîlî (STK), muşahîdê partîyê sîyasî û organîzeyê demokratîkî reaksîyon ramojnayî tepiştişê rojnamegeran. La balanteyo ke sazgeh û merdimê ke xo ra vanê ma muxalîf ê, tu beyanatêk înan ra nêame dayîş. 

 

'Ma do fek heqîqetî ra vera nêdê' 

 

Rojnamegere Fatoş Sarikaya ya ke wayîrê rojnameyî û keyepelê Kadindan Haberî ya Mêrsîn de weşan kena, eşkera kerd ke 16 rojnamegerî eksê huqûqî de ameyê tepiştiş û wina ci de şî: "No tepiştiş yeno manaya tepiştişê rojnamegerî û heqîqetî. Ganî ma ewro bibê vengê rojnamegeran. No tepiştiş tena hemverê rojnamegeran de nîyo, hêrişêke hemverê heqê girewtişê xeberan ê şarî de yo. Ma sey rojnamegerî bêveng nêmanenê. Ma do duştê polîtîkayê pelçiqnayîşî de bi têkoşîn û hetkarî bibê verpers. Ma do tu reyî dest heqîqetî ra vera nêdê." 

 

'Wazenê JINNEWSî krîmînalîze bikerê' 

 

Fatoşe peynîya qiseyê xo de bale ante serê tepiştişê Safîye Alagaş û wina peynî ro ci ard: "Tepiştişê Safîye hêrişêke duştê JINNEWSî yo. Wazenê JINNEWSî krîmînalîze bikerê û vengê cinîyan bibirnê. Ma zî seke rojnamegerê cinîyî tim pey heqîqetî bê. Rojnamegerî sûc nîya." 

 

'Hewl dayî JINNEWSî bêveng bikerê' 

 

Avûkate û endama Platfomê Demokratîke ya Dîlokî Dîlan Aydin zî qal kerd ke fealîyetê rojnamegeran benê babetê sûcî û wina dergî da qiseyanê xo: "Pêwa heqê azadîya çapemenîye bi destûrê asasî yeno pawitiş zî nika yeno muhakemekerdiş. Na babete de destûrê asasî di binê ningan de yo. Îqtîdar nêwazeno rastî vejîyo werte. Coka rewşa welatî werte de ya. Wazeno heme şaran bieceqno. Heto bîn ra zî bi operasyonan wazeno JINNEWSî bêveng bikero. Seba çapemenîya azade bêveng bikero, her çî yeno kerdiş.  Rejîmêke verê rijnayîşî yo. Coka hêrişê cinîyan, Kurdan û rojnamegeran keno. Ma sey huqûqnasan do çapemenîya azade dir di hetkarîyî de bê." 

 

'Lezkî veradê' 

 

Sereka Komeleya Cinîyan ê Mîmoza Çîgdem Gorsoy zî wina bale ante serê babete: "Îqtîdar 20 serrî yo serê cinîyan de polîtîkayê cîyayî keno dewre. Nînan dir hewl dano ke cinîyan bieceqno. Weznê rojnamegerîya cinîyan keno hedef û yenê tepiştiş. Tepiştişê rojnamegeran bi xusûsî tepiştişê rojnamegerê cinî, qerarêke eksê huqûqî yo. Ganî kedkarê çapemenîye lezkî bêrê veradayîş."