Medya Uren  - Şîrîn Çinar 

 

AMED - Rojnamegerê Kurdî duştê tepiştişê 16 meslegdaranê xo de reaksîyon ramojnayî û vatî: "Ma qelema heqîqetî herd de nêverdenê." 

 

22 merdiman ra ke 8ê Hezîrane de di çarçewayê cipersayîşî ke Serdozgerîya Komare ya Amedî dabî destpêkerdiş ameybî destbendkerdişî û 16 rojnamegêrî ci ra ameyî tepiştiş. Duştê tepiştişê rojnamegeran de zî her wareyî de reaksîyonî berz benê. Meslegdarê rojnamegeran û Vervatoxa Platformê Rojnamegerê Cinîyan ê Mezopotamyayî (MKGP) û edîtora JINNEWSî Roza Metîna, edîtora Ajansê Mezopotamyayî Arjîn Dîlek û edîtora rojnameyê Xwebûnî Medya Bal erjnayîşê xo pare kerdî û vatî ma qelema embazanê xo herd de nêverdenê. 

 

'Do xoverdayîşê ma her cayî de dewam bikero' 

 

Roza Metîna bi  nê vatişan, tepiştişê 16 meslegdaranê xo şermezar kerd: "Bi tepiştişê 16 meslegdarê ma wazenê bêvengîyêke mîyanê komele de awan bikerê. Eynî wextî de zî wazenê çapemenîya azade zî bêveng bikerê. Coka têkoşîn muhîm o. Keyeyî û meslegdarê 16 rojnamegêrê ke ameyê tepiştiş heta serê sibayî verê edlîyeyî de pabeyê qerarî de mendî û mesajê hetkarî dayî. Dimayê qerarê tepiştişî ke ame dayîş, keyeyî û meslegdarê rojnamegeran bi sloganê 'Xoverdayîş ciwîyayîş o' û 'Şima nêeşkenê çapemenîya azade bêveng bikerê' verpers dayî qerarê tepiştişî. Tarîxî ra no wina yo. Xoverdayîşê çapemenîya azade her tim dewam kerdo. Çapemenîya azade pêwa heme tehdayan bêveng nêbîya. Ewro ra pey zî çi bikerê wa bikerê do çapemenî bêveng nêbo. Do nêeşkê bi nê rengî û metodê cîyayî zî îradeyê Şarê Kurdî bişiknê. Ê do tu reyî nêresê amancê xo. Eynî wextî de cinîyê rojnamegerî zî ameyê destbendkerdiş, bi nê rengî zî ma vînenêke hêrişêke xusûsî duştê cinîyan de zî yeno kerdiş. Wazenê vengê cinîyan zî bibirnê. Labelê xoverdayîşê ma her cayî de do bidomo. Eynî wextî de hemverê bêhuqûqîyê duştê çapemenîye de paştgirewtişêk pîl virazîya. Seba azadîya meslegdarê xo ma venga hetkarî û pîlkerdişê têkoşînî kenê." 

 

'Ma do herinda înan de binusnê' 

 

Arjîn Dîlek zî prosesê destbendkerdişî û tepiştişê 16 rojnamegêran ard vîr û wina eşkera kerd: "Demêko derg ma nêzana gelo meslegdarê ma seba çi ameyê destbendkerdiş. Goreyê hinî xeberê di medyaya hetkarî de vejîyabî ma bandêr bîyî ke embazê ma seba xeberî viraştê û seba xebatê xo yê rojnamegerî ameyê destbendkerdiş. Xeberî û programê ke embazê ma viraştê di dosyaya înan de seke sûc ameyê cakerdiş. Eya, 16 embazê ma ameyî tepiştiş. Bi nê rengê akerdeyî  îqtîdarê AKP û MHPyî seba polîtîkayê xo yê lêşin binimnê gelo çiqas kewenê mîyanê hewldayîşan? Labelê ma do destûrê nê çîyan nêdê. Ma do polîtîkayê înan ê lêşinî vejê werte. Ê do nêeşkê binimnê. Nê rojê ke embazê ma zere de yê ma do hewl bidê herinda înan de zî xeberan virazê. Bi nê rengî, ê do nêresê amancê xo. Nê welatî de heq û huqûq heme qismî rê lazim o. Çîyêke ewro bi destê hukmî  ro ma kenê, do meşte de bêro sereyê înan zî. Ma do herinda embazanê xo de binusnê û bi têkoşînê xo înan zîndanan ra vejê." 

 

'Ma qelema heqîqetî herd de nêverdenê' 

 

Medya Bal zî destbendkerdişê rojnamegeran ard vîr û vat: "Demê destbendkerdişî ra heta nika hendêke bêhuqûqîyêke pîl ro rojnamegeran yeno kerdiş, eşkera yo. Şima tu cayî de nêvînenê ke rojnamegerêk vera ke karê xo keno/a, xeberan virazeno/a yeno/a tepiştiş. Na rewşe tena Tirkîya de yena kerdiş. Na zî rastîya Tirkîya ramojnena ma. Tehdîd û tehdayê serê rojnamegeran de rewşa komele zî eşkera kena. Wazenê  bibêvengkerdişê rojnamegeran dir komele bêxeber verdê. Wazenê komelêka kor û lale awan bikerê. Labelê do qelema 16 meslegdarê ma herd de nêmano. Heta ke ê bêrê mîyanê ma, ma do di rayîrê înan de dewam bikerê. Ma do qelema înan herd de nêverdê. Ma qelema heqîqetî herd de nêverdenê."