COLEMÊRG – Keyeyê Suleyman Kaçar ke netîceyê xîyanetê PDKyî de 2021î de ame qetilkerdiş, nêzdîyê serrêke yo cenazeya lajê xo gêrena. Dayîka Suleyman Gule Kaçar, reaksîyon vera hemkarîya PDKyî ya bi dewleta tirkî dir û nêdayîşê cenazeya lajê xo da. Gule vat, "Êdî bes o xîyanetî rê û ez cenazeya lajê xo wazena.”

 

Artêşa Tirkî bi hemkarîta Partîya Demokrate ya Kurdistanî (PDK) 17 nîsane de operasyonê leşkerî serê mintiqayanê Zap, Avaşîn û Metîna yê giredayê Mintiqaya Federe ya Kurdistanî de da destpêkerdiş û nê hêrişanê xo dewam kena. Serê xeta sînorî yê mabêne vakur û başûrê Kurdistanî de şer û pêrdayîşê xidarî virazyênê û mintiqayê ke nêzdîyê xeta sînorî yê zî hêrişan ra negatîf tesîr benê. Keyeyê serê sînorî seba hêrişê ke yenê kerdiş bi reaksîyon ê.

 

Nînan ra yew zî keyeyê Suleyman Kaçaro ke HPGyîj o. Suleyman serra 2012ine de tewrê mîyanê hereketî beno û serra 2021î de o û 4 embazê xo demo ke wazenê derbasê hetê Colemêrgî bibê, netîceyê hêrişê PDKyî de dinyaya xo bedilnenê. Dimayê ke Suleyman dinyaya xo bedilneno, serrêke yo keye cenazeya lajê xo gêreno û hema zî tu xebere ci ra nêgirewta.”

 

Dayîka Suleyman Kaçar Gulê Kaçar derheqê aqûbetê lajê xo de qisey kerd.

Gule da zanayene ke şîya Mintiqaya Federalî ya Başurê Kurdistanî pêwa heme wezîfedaran têkilî ronaya û vat, pêwa ke heme îmkanê destê xo de yê xebetnayê zî malûmatêke hetê cenazeya lajê xo ra nêgirewta. Gule eşkera kerd ke, a nizdîyê serrêke yo seba cenazeya lajê xo bivîno hewl dana û wina qisey kerd: "Nê merdimê ke lajê mi qetil kerdê ez cenazeya lajê xo înan ra wazena. Waştişê mi no yo ke cenazeya lajê mi bidê û ez bieşka rey-rey şêra serê gorê lajê xo. Menga Teşrîna Verîne de ma malûmat girewt ke lajê mi dinyaya xo bedilnayo. Ê wextî ra heta nika, seba ke ma cenazeya lajê mi bigîrê, ma mîyanê hewldayîşan de yê. Ma hêzê PDKyî ra pers kenê û ê zî ma ra vanê,  'Ma nêkişto, nêvînayo û ma ra mepersê'. Ma zî baş zanenê ke înan kişto û ma bawerê zî. Ma nêzanê çi ro cenazeya ma kerdê, la reyna zî ma cenazeya xo înan ra wazenê. Beno ke cenazeya ma veşinabê û berzê cayêke zî." 

 

'Bi destê birayê xo ame kiştiş' 

 

Gule dewamîya qiseyanê xo de vat: "Gonîya lajê mi destê eskerê Mesût Berzanî de ya." Gule qiseyanê xo wina dewam kerd: "Ez baş zanena ke lajê mi înan qetil kerdo. Wa ma ra vajê 'Ma qetil kerdo û cenaze di destê ma de ya', qet nêbo wa zerra ma rehet bibo. Şerm nêkeno hema xîyanet keno!  PDK seba Kurdan bêwîjdan o. Wa bes xeletîyan bikero! Bes o êdî wa biranê xo nêkişo! Heta kînga do mîyanê îxanetî de bo? Lajê mi dewleta Tirkî bikiştêne, ez a fam bikera. La çi heyf ke bi destê birayê xo ameyo qetilkerdiş." 

 

'Wa rayîr nêdê neyarî' 

 

Gule Kaçar reaksîyon ramojna hetkarîya PDKyî yê Dewleta Tirkî dir, operasyonê serê mintiqayê; Zap, Avaşîn û Metînayî şermezar kerd û qiseyê xo wina peynî kerd: "Heq nîyo ke PDK tewirê operasyonanê kiştişê birayê xo bibo. Ez veng kena ke lezkî dest na xeletîya xo ra vera bidê. Mesût Berzanî do heta kînga Kurdan dir şer bikero? Wa lezkî cenazeya ma bido! No ca herdê Tirkîya nîyo, herdê Şarê Kurdî yo. Berzanî herdê ma dano destê Tirkîya. Eke PDK û Berzanî wina dewam bikerê, do herdo ke destê xo de yo zî vindî bikerê. Êdî wa rayîr nêdê neyarî û wa neyarî herdê ma ra vejê!"