Safîye Alagaş

 

AMED - Endama Basin-Îşî Dîlek Gul, reaksîyon ramojna tepiştişê 16 rojnamegeran û vat: "Meslegdarê ma vêşêrî ke sûcê înan bibo ameyê tepiştiş. Ma tepiştişê rojnamegeran qebûl nêkenê."

 

Amed de 8ê Hezîrane de 20 ci ra rojnamegerî, pêroyî 22 merdimî ameybî destbendkerdiş û 16ê Hezîrane de 22 merdiman ra 16 rojnamegerî bi îdîayê 'Endamîya rêxistine' ameyî tepiştiş. Rojnamegerî bi behaneyê kar û barê rojnamegerîye, muhtevayê xeberan, ziwanê xeberan û polîtîkayê weşanî ameybî tepiştiş. Her roje xeylêk komelî, pêameyî, partîyê sîyasî hetkarîya rojnamegeran kenê. Yew nê pêameyan ra zî DÎSK BASIN-ÎŞ o. Endama BASIN-ÎŞî  Dîlek Gul derheqê babete de ajansê ma rê qisey kerd.

 

'Roja wayîrvejîyayîşî ya'

 

Dîleke bi nê vatişan dest bi qiseyê xo kerd: "Ma seke rojnamegerî seba hetkarî bidê meslegdaranê xo yê ke ameyê tepiştiş Stenbol û Anqara ra ameyê Amed. Ma Anqara û Stenbol de xebetênê, meslegdarê ma tîya de. Hetê zametîyê meslegê xo de ma heme zî  eynî problem ciwîyenê. Seba nê zî ferqê ma yewbînan ra çinî yo. Ewro meslegdarê ma ameyê tepiştiş, meşte beno ke bi qanûnêke newe dir ma zî bêrê tepiştiş. Coka rojnamegerî sûc nîyo û ewro roja wayîrvejîyayîşê rojnamegeran o. Seba  nê ma gamêke bierzê, ma ameyê Amed. Çiqas ma wayîr ro meslegê xo vejîyê û barê meslegdarê xo yê ke tîya derê şenik bikerê, hende baş o."

 

'Bi xêrê rojnamegeran serebûtî vejîyayî werte'

 

Dîleke da zanayene ke beno ke Rojawanê Tirkîya ra baş nêro vînayîş, labelê ma vînenê ke rojnamegerê ke ameyê tepiştiş çiqas warê rojnamegerîye de kede danê û wina qal kerd: "Eke ma fînak bidê zî, meslegdarê ma yê ke ameyê tepiştiş nêbayêne ma, a serebûtê Îpek Er nêeşnawitêne. Reyêna xebera ma niştecayê ke  helîqobter ra ameyî eştiş nêbîyêne yan zî xeylêk babetê seke înan. Nê heme bi xêrê rojnamegeran ameyê girewtiş û vejîyayî werte. Ma babetê binpaykerdişê heqê merdiman înan ra bandêr bîyî. Vera nê yewî zî vêşêrî ma cîyayîyî bifînê mabênê nîjadî û merdiman de lazim o ma rojnamegerê ke karê xo kenê dir bibê hetkar. Ganî karê înan nêro îllegalîzekerdiş."

 

'Ma şahid ê'

 

Dîleke vat ke rojnamegerî bi tewirêke bêsûc ameyê tepiştiş vat ke şahidê rojnamegerîyê înan bîyê û wina dergî da qiseyanê xo: "Rojnamegerê ke ameyê tepiştiş rey rey ma wareyan de têreyde kar dayo rayîr ra şîyayîşî. Ma şahid ê, nê rojnamegerî yê. Ê di xete ya pawitişê heqê merdiman de kar danê kerdiş. Senîn ewro ma seke rojnamegerî, tepiştişê nê rojnamegeran nusnenê, meşte de zî do yê seba ma binusnê. Na babete de muhîmî yewbîyayîşî dir o û hetkarî ya. Ma sozê yewbîyayîşî dir danê. Ma do pêwa meslegdaranê xo kar bidê kerdiş."

 

'Ma tepiştişê meslegdaranê xo qebûl nêkenê'

 

Dîleke wina peynî ro qiseyanê xo ana: "A ke ma tewr zêde dejnena zî reaksîyonê duştê tepiştişê 16 meslegdarê ma de parekerdişê twitterê ke zêdeyêr nêşî. Şima ça yê dinya de ca bigîrê ferq nêkeno, eke 16 rojnamegerî bêrê tepiştiş do seke serebûtêk pîl bêro şermezarkerdiş. Ganî tîya de eynî reaksîyonî vejîyê werte. Ganî prosesê nezaretî de reaksîyonê pîlî biameyêne mojnayîş, beno ke rojnamegerî nêameyêne tepiştiş zî. Na babete de ma hinî bihêrs ê zî. Seba hetkarîyêk pîl bêro lazim nêkeno ke rojnamegero/e biname û bi veng bo yan zî populîst bo. Rojnameger/e, rojnameger o/a. Meslegdarê ma her tim nînan ciwîyenê. La çi heyf ke seba nasnameyê înan ê Kurdbîyayîşî vengê înan nêame eşnawitiş. Ma înan rojnameger vînenê. Di heme xebat û xeberan de, ma do hetkarîya înan bikerê. Ê tena seba karo ke kenê ameyê tepiştiş. Xeynê nê zî sebebêke tepiştişê înan çinî yo. Ma na nizdîyîyî qebûl nêkenê. Meslegdaranê ma sûc nêkerdê.  Ganî lezkî ê bêrê veradayîş."