Melîke Aydin

 

MUGLA - Cinîyê ke reaksîyon vera vistişê cezayê qatilê Pinar Gultekîn de dayî, dîyar kerdî ke êdî bawerîya înan bi edaletî nêmendo û ardî ziwan ke qerar bi taybetî do cinîyê ciwanî wareyê komelî dûr bikero.

 

Roniştişê dewaya qatilê Pinar Gultekîn, Cemal Metîn Avci ke bi îşkenceyî Pinare kişt, kesê ke ci dir bi hetkar Mertcan Avci, dayîka qatilî Ayten Avci, pîyê ci Selîm Avci, cinîya ci ke yewbînan rê visyabî Eda Karagun û şirîkêci  Gokhan Orhan ke seba pûçkerdişê delîlan ci ra yenê muhakemekerdiş, vizêr 3in Dadgeha Cezaya Giran ya Muglayî de ame vînayîş.  

 

Dimayê goşdarîkerdişê avûkatê hetan, heyetê dadgehe derheqê Metîn Avci de cezaya muebetê giran da, la dima ra na ceza bi bahaneya tahrîkî fîna 23 serran û derheqê gûmanbaranê bînan de zî qerarê beraetî da.

 

Xeylêk hetan ra derheqê qerarî de reaksîyon ame ramojnayîş û cinîyê ke 13  roniştişê dewa taqîb kerdî zî dîyar kerdî ke êdî bawerîya înan bi edalet nêmendo.

 

'Dewa nêqedîyaya seba ma newe dest pêkena' 

 

Partîya Kedkaran ê Tirkîya (TÎP) Îstem Akkoyunlu vat, "Êdî cinî asayîş de nîyê, dewaya kiştişê ke bi keyeyî dir ameyo kerdiş de û delîlî orte de yê qerarêk bi nê rengî dayîş yeno manaya ke êdî hukm vînî kerdo. Dewa seba cinîyan nêqedîyaya û newe ra dest pêkena."

 

'Kesê ke pêkerdişê Stenbolî fesih kerdê hemkarê sucî yê'

 

Weqfê Aştîye ra Bariş Aydogan zî wina vat: "Serê nameyê nê welatî de qerarê rîsîyayî ame dayîş. Kesê ke nê qerarî dayî û yê ke Peymana Stenbolî fesih kerdî, hemkarê nê sucî yê."

 

'Ma unîversîteyan de zî asayîş de nîyê'

 

Pîreboka Kampûsî ra Zîlan Kûbat zî vat: "Bi serran ma vatêne unîversîteyî asayîş de nîyê. Ma vînenê ke sîstemê serdestîya mêrdeyî tesîrê xo serê unîversîteyan de zî keno û ma kampûsê xo de asayîş de nîyê. Xo ra hetê sîstemî ra her tehda ro ma yeno kerdiş û yê mîyanê keyeyî de zî yeno zêdekerdiş. Rewşa ke ma xo asayîş de hîs nêkenê cinîyî wareyê komelî ra yenê dûrfînayîş. Senîn ke ma di 13in roniştene de seba cinîyan edalet waşt, ma cinîyê ciwanî do nê prosesî zî teqîb bikerê. Nê cînayetî tesaduf nîyê. Ma venga rêxistinî ro cinîyan kenê."

 

'Problemê ma yo muhîm o yo ke mêrdeyî muşahîdîya ma kenê'

 

Komeleya Hetkarî û Muracatî yê Cinîyan ê Mûglayî ra Gulsum Nazlioglû, ard vîr ke mudaxaleyê cinîyan nîno qebûlkerdiş. Avûkatê dewayan mêrde yê û bi tewirêke rêz beşdarê dewan ê cinîyan benê. Gulsume wina dergî da qiseyê xo: "Ma dewaya Zeynep Şenpinar û Guleda Cankel bîyarê vîrê xo. Dewaya Zeynebe de cezaya girane nêame dayîş. Pêwa ke delîlê somutî zî bîbî, tena cezaya muebetî ame dayîş. Pawitişê muşterekî yê qatilan cipersayîşkerdişê cuya cinîyan ê û teqîbkerdişê cuya înan ê. Eke avûkatê cinîyî bibayne eşkayêne rewşa bîyayeyî komelî ra bivatêne. Keyeyî dewan danê mêrdan. La dewaya Zeynebe de û yê Pinare de zî avûkatê femînîstî waştî pawitiş bikerê, la waştişê înan nêame qebûlkerdiş. Muşahîdîya ma mêrdeyî kenê."

 

'Cinî wexto red kena yena qetilkerdiş'

 

Gulsume tewr peynî zî nê çîyî vatî: "Pêwa ke ro Pinare zorî ameyo kerdiş. Seba ke keyeyî qatilê Pinare bi hêz o her kes vano, 'Çi karê Pinare verê mêrdeyê zewejnaye de esto?'. Cinîyî seba ke red kenê zî yenê qetilkerdiş. Qirkerdişêk bi keyeyî ameyo kerdiş o. Nê qirkerdişî, verî bi pere bi hinî merdiman ameyêne waştiş ke bêro kerdiş."