Şehrîban Aslan 

 

AMED - Edîtora JINNEWSî Gulşen Koçûk ke 8 rojî nezaret de mende, derheqê embazanê xo yê ameyê tepiştiş de qisey kerd û vat: "Hemverê ma de çapemenîya hetkerdoxe sey artêşêke esta. La reyna zî hêzê ma înan tersneno û vera nê zî hêrişan kenê." 

 

Çarçewaya cipersayîşo ke hetê Serdozgerîya Komare ya Amedî ra amebî destpêkerdiş de polîsan 8ê Hezîrane 20 ci ra rojnamegerî 22 merdimî destbend kerdî û 8 rojî nezaret de mendî. 15ê Hezîrane de vetî dadgehe û 16 merdimî bi îdîayê 'Endamîya rêxistine û propagandayê rêxistine' kerdê ameyî tepiştiş. Nê rojnamegerî; Serdar Altan, Mehmet Alî Ertaş, Safîye Alagaş, Azîz Orûç, Omer Çelîk, Sûat Dogûhan, Ramazan Gecîken, Neşe Toprak, Zeynel Abîdîn Bûlût, Mazlûm Dogan Guler, Mehmet Şahîn, Elîf Ungur, Îbrahîm Koyûncû, Remzîye Temel, Abdûrrahman Oncu û Lezgîn Akdenîz bi îdîayê 'Endamîya rêxistinî'  ameyî tepiştiş. 

 

Edîtore ya ajansê ma Gulşen Koçûk ke, a zî amîbî destbendkerdiş û bi şertê kontrolê edlî amî veradayîş, derheqê tehdayê serê rojnamegeran de erjnayîş kerd. 

 

'Çi kenê wa bikerê edet dewam keno' 

 

Gulşene dîyar kerd ke îqtîdarê AKP-MHPyî demêk derg o hêrişê hetê muxalîfî keno û wina ci de şî: "Di prosesêke wina de zaf kemî sazgehê çapemenîye nê polîtîkayê şîdetî teşhîr kenê; JINNEWS, Ajansê Mezopotamya(MA) û çend sazgehê bînî yê weşanî. Îqtîdar sey çareserî bi hêrişan hemverê ma de vindeno. La verî zî xeylêk reyan tehda û tepiştiş ameyê ca; no ramojna ke bi serdegirewtiş û bi destserkerdişê ekîpmanan rojnamegerî bêveng nêmanenê. Ma vîna ke hêrişê hemverê çapemenîya azade de do peynî nêbê. 2011î de reyna di binê nameyê KCKyî de operasyon ame ca. La hetê rojnamegeran de tu çîyêk nêbedilîya. Edet dewam kerd." 

 

'Tepiştişê rojnamegeran caardişêke baş nîyo' 

 

Gulşene wina vat: "Her ke îqtîdar tehdayê xo bidomno, do çapemenîya azade binusno. Heta şîdetê mêrdeyî û dewlete bidomo, do çapemenîya azade binusno. Her ke ma binusnê, do hêrişî bidomê. Yew nê hêrişan ra zî 8ê Hezîrane de ame kerdiş. Wexto ma ameyî destbendkerdiş persê seke  'Şima şîdetê fizîkî vîna, sey kamco caardişê xirabî vînayî?' persayî. La manîkerdişê rojnamegerî zî caardişêk xirab o. Heqê şima çin o şima mesleg krîmînalîze bikerê. No zî binpaykerdişê heqî yo." 

 

'Duştê çapemenîya sey artêşî de çapemenîya azade' 

 

Gulşene dîyar kerd ke seba ke embazanê ci xeberî viraştê, programî antê û teqdîm kerdê ameyê tepiştiş û vat : "Hemverê ma de çapemenîya hetkerdoxe ya sey artêşî esta. Duştê nê de zî hêzê ma înan tersineno û coka nê hêrişî kenê. Hayîdarîyê ke avûkatê ma nêeşkabi xo biresnê, serê çapemenîya hetkerdoxe de ame weşenayîş. Yanê rojnamegerîya ma goreyê xo nerm kerdê û hewl dayî krîmînalîze bikerê. Rojnamegerî meslegê ke îqtîdarî goreyê xo şekl bikerê nîyê. Her tim vanê destnêdayîşê huqûqî û sîyasetî esto, la rojnamegerî ganî destnêdayîşê ci bibo." 

 

'Ganî têkoşîn bêro dewamkerdiş' 

 

Gulşene qal kerd ke do seba 16 meslegdaşanê xo yê ameyê tepiştiş têkoşîn bikerê û wina qal kerd: "Ma do qelem, klavye û kamerayê înan herd de nêverdê. Heta ê vejîyê ma do herinda înan de rojnamegerî bikerê. Verî zî 60 rojnamegerî tepişteyî bî. Verî ma seba înan têkoşîn kerdêne, nika ma seba heminan têkoşîn kenê. Ganî vêşêrî behane têkoşîn bêro kerdiş. Her paştî seba  ma muhîmêr û erjayêr a. Tîya ra pey zî no paştdayîş xeylêk muhîm o. Heta ma heme embazanê xo azad nêkerê, ganî no têkoşîn bidomo." 

 

'Tecrîd zî perçeyêke hêrişî bî' 

 

Gulşene peynîyê qiseyanê xo de dîyar kerd ke, karo ke kenê  sûc nîyo û bi nê vatişan qiseyê xo peynî kerd: "Ma di dosyayêka ke ganî derheqê ci de cipersayîş biameyêne akerdiş dir ameyê rî bi rî. Bêşik caardişê hemverê ma de zî wina bî. Ma hinî caardişê ke ma fînayî psîkolojîya sûcî ciwîyayî. Yew nê ra embazê ma yo mêrde seba wextê destbendkerdişê ci bêro dergkerdiş, wexto berdê edlîyeyî kelepçe kerdê. Netîceyê reaksîyonê embazî de ame akerdiş. Pêwa nê wexto ma berdî edlîye dorkerde dorkerde bi kelepçeyî, ma tehdîd kerdî. No tehdîd zî perçeyêke eynî hêrişî bî. No refleksêke şexsî bî. Ma zanayêne ke tu çîyêke bibo sebebê tepiştişê embazanê ma çinîbî û bi na hişmendeyî, ma prosesê destbendkerdişî derbas kerd."