AYDIN - Yew awankera Platformê Cinîyan ê Soke Tazegul Turkmen Kamîloglû da zanayene ke do îmkanê şaredarîye seba cinîyan bixebetnê û do wareyê sey îstîhdamî û stargehan awan bikerê. 

 

Platformê Cinîyan ê Soke 31ê Gulane de bi amancê têkoşînê duştê şîdetê serê cinîyan de ame awankerdiş û 8ê Hezîrane de  derheqê awankerdişê xo de eşkerayîyêke nuştekî da û eşkera kerd ke 1ê Hezîrane ra awankerdişê xo îlan kerdê. Platform, amanc keno ke vengê cinîyanê ke şaristan de û qezayê ci de rastê şîdetî û binpaykerdişan yenê bidê şinawitiş û organîzebîyayîşê cinîyan amanc keno. 

 

'Ma hewceyî bi nê platformî vîna' 

 

Tazegul Turkmen Kamîloglû ya ke di awankerdişê platformî de ca girewta, derheqê amancê platformî de qisey kerd û vat: "Ma nêseyyewbînîye sey sinife, dînî û netewî mintiqa de ciwîyenê. Ma nê bikerê ma do duştê her tewirê şîdetî de sere wedarê. Cinîyî beno ke şîdetê mêrdeyî zî bivînê. Ma cinîyan dir rayîrê çareserîyêkê muşterek bivînê. Hetê tesbîtkerdişê problemî û çareserkerdişê probleman de problemêk bîbî. Fikrê platformî eleqeyêko pîl vîna. Soke de komîsyonê cinîyanê sendîka û partîyê sîyasî estê la nê xoser nîyê. Ma embazê cinîyan dir nika hewl danê nînan tesbît bikerê û hel bikerê. Îdarekarîyê mintiqayî de kemanî virazîyayî. Seba ke meclîsê cinîyan binê kontrolê şaredarîyan de bîyî, çareserîyê xoserî nêameyêne ca." 

 

'Şîdetê hêzê asayîşî' 

 

Tazegule dewamîyî de bale ante serê problemê ameyê tesbîtkerdiş û wina dergî da qiseyê xo: "Cinîyê ke rastê şîdetî yenê bi tewirêke baş nêzanê muracatê kam cayî bidê. Nê hetî de problemêko cidî esto. La çîyê ke ma bikerê estê. Ma do bi îdarekarîyê mintiqayî dest pê bikerê. Ma wazenê bi şewe kuçeyî bêrê roşinkerdiş sîstemêke cinîyê ke şîdetî vînenê muracat bikerê, bêro awankerdiş. Kiştişê cinîyan girêdayeyê îdeolojîya mêrdeyî û mezgê dewlete yo. Duştê nê de hetkarî û têkoşînê cinîyan xeylêk muhîm o. Soke de Kurdî estê, Romenî estê. Ma munaqaşe kenê ke ma têreyde biciwîyê. Ma wazenê serê problemê muşterekî de aştî awan bikerê. Embazê Kurdî û Elewî problemê cidî ciwîyenê. Vernîya her çîyî de ganî ma bibê yew û tecrubeyê helkerdişî pêbîyarê. Ma nê bikerê, ma do duştê şîdetê hêzê asayîşî de zî vinderê." 

 

'Polîtîkayê neyarîyî' 

 

Tazegule sewbîna qal kerd ke, Soke cayêke kozmopolît o û merdiman hemverê yewbînan de kenê neyar û wina derg kerd: "Programê verî de ma prosesê seki  'Ê cinîyî beşdar bibê ma beşdar nêbenê' de derbas bîyî. Ma wazenê hişmendîyê cinîyan vejê werte. Ganî ewilî ma bivînê ke problemê cinîyan heme yewê. Ma do xeylêk probleman qisey bikerê. Ganî ma seba cinîyê Romenan bibê hetkar. Ganî ma wayîr ro keda înan vejîyê. Ma nê heminan munaqaşe kenê." 

 

'Do îmkanê şaredarî bêrê xebetnayîş' 

 

Tazegule wina peynî ro qiseyê xo ard: "Ma cayêkê aîdê şaredarîyê seba xo aqitnenê. Azadîya cinî bi şexsbîyayîşî mimkun nîya. Seba girewtişê karî yê seba şaredarîyan ganî seyyewbînî bibo. Ma do seba helkerdişê nê zî hewl bidê. Problemê krêşan esto. Ma do îmkanê şaredarîyî  seba nê bixebetnê. No wexto ke her çî vayo de, ma do wareyê îstîhdamî zî awan bikerê. Kuçeyê ma bi şewe tarî yê, ewnayena tutan û kal û pîran sey karê cinîyan yeno vînayîş. Na babete sero verpersîyarîya Îdarekarîyê mintiqayî esta. Ma nê babetan sero hewl bidê."