ÎZMÎR - Dadîya Bayram Kaymazî, Medîne Kaymaz ke çalakîkera nobeta edaletî ya da zanayene ke heme merdimê ke edalet wazenê ganî hetkarîye bidê çalakîya înan û vat: "Vejîyayîşê cenazeyan ê zîndanan ra dewlete verpersîyar a. Çiqas zilm bikerê zî do nêeşkê biqedênê. Ma seba her kesî edalet wazenê.”

 

Merdimê tepişteyan bi amancê binpaykerdişê heqan ê zîndanan û tecrîdê serê Rayberê PKKyî Abdullah Ocalanî de wedarîyo Amed, Wan û Îzmîr de dest bi nobeta edeletî kerdîbî. Îzmîr de zî 12ê  Sibate de Baroyê Îzmîrî de ame destpêkêkerdiş. Dadîya tepişteyê bi nameyê Bayram Kaymazî ke nika zîndanê Tîpê Fyî yê Tekîrdagî de maneno, Medîne Kaymaz zî di nobete de cayê xo gêna û da zanayene ke no 2 mengî yo edalet gêrenê.

 

Medîne vat ke, a seba her kesî edalet wazena û venga tewirbîyayîşê çalakîye kerd û wina vat: "Ganî tepişteyê nêweşî bêrê veradayîş, tecrîdê serê Abdullah Ocalanî de yo bêro wedaritiş."

 

'Çimeyê bêedaletî şer o'

 

Medîne dîyar kerd ke, a seba her kesî edalet wazena û seba nê zî ganî şer peynî bibo. Medîne wina bale ante serê rewşa tepişteyan: "Cezaya giran danê tepişteyan û heqê înan destê înan ra gênê. Wa wijdan bibo, însanî bibo. Wa dinya bi aram bo. Do no zilm heta key cayî şêro? Çi bikerê zî do Kurdî fek têkoşînî ra  vera nêdê. Kezeba ma vêşena. Tutê ma tepişte yê û nêweş ê. No 40 serrî yo ma aştî wazenê. Rojnamegerî tepiştî. Gelo çi kerdê? Kurdî çira tepişte yê. Wa bizanê ke ma dest Kurdbîyayîşê xo ra vera nêdanê."

 

Medîne vat ke ziwan û kulturê Şarê Kurdî di hedef de yo û wina ci de şî: Ma seba ziwan û kulturê xo tepişte yê. Lîderê Kurdan binê tecrîdî de yo. Gelo çi sûcê ey esto? Vera ke aştî wazeno yeno tecrîdkerdiş. Êdî bes o. Ma Kurdê. Ma aştî û edalet wazenê. Ma tena seba xo ney, ma saba heme Şarê Tirkîya edalet wazenê."

 

'Zîndanan de zilm û tecrîd esto'

 

Medîneye wina derg kerd: "Tecrîd heme zîndanan de vila bîyo. Lajê mi 27 serrî yo tepişte yo û hîrê serrî yo ez ey nêvînena. Nan bi pere yo, telefon bi pere yo. 4 deqe heqê telefonî danê ma. Caardişê kêfîyî estê û zilm kenê. Heme nêweş ê û nînê dermankerdiş. Tu sûcê înan çinî yo. Seba ke Kurdê yenê tepiştişî."

 

'Ganî her kes tewrê çalakîye bibo'

 

Medîne bale ante serê Nobeta Edeletî û wina qedêna: "Xeylêk hetan ra merdimî yenê serdayîşê ma. Di sere de zî ganî merdimê tepişteyan hetkarîye bidê. Ganî dadîyê eskeran, dadîyê Tirkî, dadîyê ke edalet wazenê bêrê. Wa bêrê verê ma de ronişê. Zilm serê heme tepişteyan de esto. Ez venga Wezaretê Edaletî û Serekkomarî kena. Wa dinya rehet verdê. Wa êdî gonî nêrişîyo. Verpersîyarê cenazeyê ke zîndanan ra vejîyenê, dewlete ya. Çiqas zilm bikerê zî nêeşkenê biqedênê. Ma veng ro heme merdimê ke edalet wazenê, kenê. Bêrê ma têreyde biciwîyê. Bi nê tewirî do kesêk sereyê ma nedo tewênayîşî."