Marta Somek-Safîye Alagaş

 

STENBOL - Tepişteya nêweşa girane Fatma Tokmak 22 serrî yo tepişte ya û Sazgehê Tipê Edlî di serrî ra dima raporê, ‘zîndan de eşkena cuya xo tena dewam bikera' da.

 

Zîndanan de binpaykerdişê heqan û tecrîd her ke şino giran beno. Goreyê Komeleya Heqê Merdiman (ÎHD) 651 ci ra giran bi pêroyî hezar û 517 tepişteyê nêweşî estê. Aşmanê peyînî de zîndanan de merdişê bigumanî zêde benê û sewbîna tacîz, tehdîd, ajanî û îşkenceyê serê tepişteyan zî dewam keno. Heto bîn ra caardişê bi kêfî înfazê tepişteyan yeno veşaneye. Heto bîn ra sazgehê Tipê Edlî (ATK) seba tepişteyanê nêweşan raporê ‘eşkeno/a tepişte bimano/a' dano û tepişteyan terkê mergî keno. Nimûneyê ci yê peyîn, rojê vîyarte de ame ciwîyayîş û ATK’yî raporê ‘eşkena tepişte bimana' da tepişteya nêweşe Fatma Tokmaka ke zîndanê Cinîyan ê Bakirkoyî de manena.

 

Seba cezaya hucreyî yê 14 rojan nêeşkaye şêro ATKyî

 

Fatma Tokmak ke 22 serrî yo zîndan de ya, nêweşa qelbî ya û seba ke gonî baş nêşina qelbê aye, ganî hewteyêk ra reyke gonîya ci bêra vurnayene û nêweşa şekirî ya. Fatma Tokmak bi serran o pêwa nêweşîya girane, şertê tecrîdî yena tepiştene. Avûkatanê Fatma; hemsereka pêroyî ya ÎHD’yî Eren Keskîn, Jiyan Kaya û Jiyan Tosune 2020’î de seba pandemî muracatê ATK’yî kerdî û waştî ke înfaz bêro taloqkerdene û tahlîyeya aye waştî. Fatma seba butonê lezkî yê zîndanî amebî padayîş, seba agêrayîşê nêweşxaneyî de  14 rojan karantîna de mendêne û seba nêweşîya xo nêwaşt tena bimana, nêeşka şêro ATK’yî.

 

Bi tena sereyê xo eşkena biciwîya?

 

Dimayê di serran aşma Gulane de ke ci ra nêvatî aye benê ATK’yî, Fatma zî fikrayya ke şina nêweşxane û xebere nêdaya avûkatan. La dima ra Fatma musena ke serê waştişê avûkatan de şina ATK’yî. 20 û 30’ê Gulane de di rey Fatma berdî ATK û netîceyê raporî 13’ê Hezîrane de dîyar bi. ATK’yî nêweşîya giran a Fatma nêvîna û vat, ‘eşkena tena cuya xo dewam bikera."

 

Nêweşîya aye çin a!

 

Rapor de ame vatiş ke rewşa dîyetêk bi baş, dermankerdiş û kontrolê polîklînîkî bêrê kerdiş de eşkena înfazê xo dewam bikera. Rapor de qerar ame dayîş ke Fatma nêweşa girane nîya û îdia kerdî ke nêweşîya aye ya her tim çin a û nêweşîya bîyaye zî nêvîna.