ANQARA - Parlamentera HDPyî ya Mûşî derheqê endamîya Swêd û Fîlandiyayî yê NATO’yî de qisey kerd û vat: “Bi taybetî blokê DYA û Îngîlîstanî xeylêk wareyê Rojhelatê Mîyanênî seke qerekolê NATO’yî Tirkîya xebitnena. Tirkîya her rey serê kurdan de tawîz dana û polîtîkayêkê mîyanneteweyî ke kurdan keno qurban esto. Sebebê nêsafîkerdişê problemê kurdî zî pozîasyonê NATO’yî yo." 

 

Serekkomar û serekê AKP’yî Tayyîp Erdogan, serekomarê Fîlandiyayî Saulî Nîînîsto, serekwezîrê Swêdî Magdelena Andersson û sekreterê Pêroyî yê NATO’yî Jens Stoltenberg 28’ê hezîrane de pêvînayîşêk kerd. Mabêne Tirkîya, Swêd û Fînlandiyayî de derheqê prosesê endamîya Fînlandîya û Swêdî yê NATO'yî de memorandum (nuşteyê hişyarî) ame îmzakerdene. Serekkomarê Fînlandiyayî Saulî Nîînîsto qebûl kerd ke Tirkîya paştdayîş daya endamîya Fînlandîya û Swêdî ya NATO’yî. Sekreterê pêroyî ya NATO’yê Magdelena Stoltenberg neql kerd ke seba Swêd û Fînlandiya tewrê NATO bibê, bi Tirkîya dir resayê mutabakatî û do qesawetê Tirkîya werte ra wedarîyê.

 

Parlamentera Partîya Demokratîke ya Şaran (HDP) a Mûşî Gulîstan Kiliç Koçyîgît derheqê babete de ercnayîş kerd.

 

‘Qertê duştê kurdan...' 

 

Gulîstane vat ke Tirkîya her kozê destê xo de duştê kurdan de xebitnena û vat: "AKP û MHP her cayê dinya de hêrişê heq û  qezencê kurdan kenê. AKP bi îşxalkerdişê herra kurdan, polîtîkayê tedayî yê hemverê  kurdan de tatmîn nêbeno, zerrîya ci rehet nêbeno. Seba nê zî Swêd ra bigîrê heta Fînlandîya û Japonya her çar hetê dinya de destkewtişê kurdan hedef gênê. Ma nê nêzdîbîyayîşê Tirkîya baş zanê ke bi hawayêke sîstematîk kena. Îşxalkerdişê Grê Spî, Serêkanî û Efrînî zî eynî prosesî ra derbaz bî û naqokîyê mabêne Rûsya û DYA’yî de ame xebitnayîş û hewldayîşê îşxalkerdişî ame kerdiş. Nika zî bi bahaneyê lejê  mabêne Rûsya û Ukraynayî dir  Ewropa de ewnîyayîşêk asayîşî yê cidî esto. Welatê qijî yê sey Swêd û Fînlandiyayî de bi hawayêke lezkî qerar dayî ke bikewê NATO’yî.  DYA û Îngîlîstan paştdayîş danênê. La Tirkîya tîya de qertê duştî yê vera kurdan da werte."

 

‘DYA’yî mabênçîye kerd'

 

Gulîstane dîyar kerd ke gelo Tirkîya pêvînayîşê NATO’yî de bi ser kewte? Yan nêkewte? û vat, no pers bi munaqeşe yo û wina dewam kerd: “No serkewtişêk nîyo. Tirkîya helwestê NATO’yî de bi polîtîkayê zereyî dir seba hetê  netewperestî bikero, xebitnaya.  Erdogan do vajo, ‘Ma vat, ey Swêd ey Fînlandiya û vaje ma qezenc kerd.’ La ma zanê ke çîyyêk winasî çin o. No nîno manaya ke Fînlandiya û Swêdî tawîz nêdayo Tirkîya zî. Pêwa ke tu faliyetê YPG û PYD’yî hemverê Tirkîya de çinê zî Tirkîya her tim terorîze kena û îşxal kena. Dimayê îşxalkerdişê Girê Spî û Serêkanî, Swêdî Tirkîya rê çek nêrot. Derheqê rotişê çekan de zî ambargo ame wedaritene. Na peymana memorandumî de hamleyo tewr muhîm zî mabênçîya  DYA’yî bî.”

 

‘NATO, Tirkîya sey qerekolî Rojhelatê Mîyanên de bi ca kena'

 

Gulîstane dewam de ard ziwan ke Tirkîya hetê NATO’yî de welatêkê jeopolîtîk a û seba nê muhîmîyê stratejîkî NATO nêwazena Tirkîya vînî bikero û vat: “Xaseten blokê DYA û Îngîlîstanî xeylêk wareyê Rojhelatê Mîyanên sey qerekolê NATO’yî  Tirkîya xebitnena. Tirkîya her reye de serê Kurdan ra tawîz dana û polîtîkayêk mîyanneteweyî yê ke kurdan kenê qurban esto. Sebebê nêsafîkerdişê problemê  kurdî zî pozîasyonê NATO’yî yo. NATO vera ke paştdayîş bido metodê aştîyane, paştdayîş dano operasyonanê eskerî û her tim vano, 'ma qesawetê Tirkîya fam kenê.'"

 

'Rûsya sey tehdîd ramojnenê'

 

Gulîstane tewr peyîn wina vat: "Hetê ercê demokratîke yê unîversal de zî kesê ke bêçare mendê Tirkîya ra vejîyê, ci rê wayîrî kerdê. Seba her di welatan zî hetêk ra qesawetê ercê unîversalî, heto bîn ra zî yê asayîşî estê. Mabêne nê her di tercîhan de zî înan danê zorî. Vanê ke şima  biwazê bikewê NATO’yî, şima do qesawetê Tirkîya verê çiman de bigîrê, yan zî rewşêka hêrişê Rûsya de şima do tena bimnaê. Ma qalê nê welatanê qijan kenê û ê zî seba nê qesawetî kewtê rewşêka wina. Rûsya sey tehdîd ramojnenê."