Rozerîn Gultekîn

 

STENBOL- 775 avûkatan seba pêvînayîşê bi Rayberê PKK’yî Abdullah Ocalanî û hîrê tepişteyê bînan yê Îmraliyî, muracatê serdozgerîya Komare ya Bursa kerdibî û hema cewabê avûkatan nêameyo dayene. Yew nê avûkatan ra ke muracat kerdebî Necla Mizgîn Argiş da zanayîş ke pêvînayîşê bi dozgerî û mudurîyê zîndanî dir dewam kenê, eke cewabêko negatîf de, do muracatê Dadgeha Desturê Bingehîn bikerê.

 

Merkezê Pêroyî yê Komeleya Huqûqnasê seba Azadîye (OHD) derheqê qedexeyê pêvînayîşê avûkatan ê bi Rayberê PKK’yî Abdullah Ocalanî, tepişteyê bînî; Vesyî Aktaş, Hamîlî Yildirim û Omer Hayrî Konarî ser de 775 avûkatî ke 29 baroyan ci de bî,  mabêne 10 û 17’ê Hezîrane de muracatê Serdozgerîya Komare ya Bursa kerdibî. Serê muracatî ra 15 rojî derbaz bî la hema cewabêk nêameyo dayene.

 

Hîrê mengî cezaya dîsîplînî

 

Nê prosesî de avûkatê Buroyê Huqûqî zî musayî ke Serekîya Heyetê Dîsîplînê Îmraliyî 31’ê Gulane ra dima hîrê mengî cezaya dîsîplînê newe dayê muvekîlê înan. Na xebere zî 23’ê Hezîrane de muracatê avûkatan de dîyar bi.

 

Yew 775 avûkatanê OHD’yî ra Necla Mizgîn Argiş derheqê cezaya dîsîplînî, muracat û cewabê ke nêameyo dayene, ercnayîş kerd.

 

Ganî mekanîzmayê mîyanneteweyî însiyatîfan bixebitnê

 

Mizgîne dîyar kerd ke Rayberê PKK’yî Abdullah Ocalanî û hîrê tepişteyê bînî, bi serrêke yo zanayîş înan ra nîno girewtiş û Îmraliyî de polîtîkayêk taybet yeno kerdiş û muhtewayê sîstemê huqûqî yeno vengkerdiş. Mizgîne wina vat: "Tirkîya hemverê qanûnanê xo û peymananê mîyanneteweyî yê îmzakerde, têgêrena. Na rewşe hema wina rojêke de nêvejîyaya werte. Birêz Abdullah Ocalan 23 serrî yo tepişte yo. Kurdistan, Tirkîya, Ewropa û xeylêk cayê bînî de hemverê nê bêhuqûqî de çalakî yenê kerdiş, la no qîm nêkeno. Bêvengîyêk esto. Seba nê qîm nêkeno. Mekanîzmayê mîyanneteweyî însiyatîfê xo bi xebitnê do safîkerdiş hîna lezkî bo. La mekanîzmayê mîyanneteweyî wezîfeyê xo bi ca nêanê."

 

Ganî CPT Îmraliyî ziyaret bikero

 

Mizgîne vat, CTP zî cide ganî mekanîzmayê mîyanneteweyî hemverê tecrîdî de wezîfeyê xo bi ca bîyarê û vat: "Tena seba Îmraliyî ney, ganî seba pêro tepişteyan CPT wezîfeyê xo bi ca bîyaro. Seba CPT muracat bikero, pêwa ma dawet kerd zî CTP serê rewşe û pêvînayîşê bi wezaret û zîndanî dir keno, ercnayîş keno. CPT vindertişêk çarçewaya mîsyonê xo de nêmojneno ra."

 

Cezaya dîsîplînî yê kêfî

 

Mizgîne vat, dewlete seba avûkatî meslegê xo îcra nêkerê, astengîyê cîya vejena û rayîr ra şîyayîşê 12’ê Hezîrane ya Gemlîkî de nêverda avûkatî şêrê verê kesê ke ameyê destbendkerdiş. Mizgîne wina vat: "No het ra Îmraliyî de caardişêk  taybet esto. Cezaya dîsîplînî kenê bahaneyê pêvînayîşî. Ma do bibê taqîbkerdoxê cezaya dîsîplînî ke  muvekîlanê ma rê ameya birnayîş."

 

Muracatê 775 avûkatan

 

Mizgîne bale ant serê muracatê  775 avûkatan û wina vat: "Keye û avûkatî nêeşkenê pêvînayîş bikerê. Tewr peyîn qiseykerdişê telefonî yê bi Birêz ocalanî dir, çar deqeyan de bê bahane ame birnayîş. Demê peyîn de çapemenîyede derheqê weşîya Birêz Ocalanî de xeberî vejîyayî. Qesawetê Şarê Kurdî esto. Pêro rêxistinê netewî û mîyanneteweyî taqîbkerdoxê rewşe yê. Rewşa seba muracatê ma eke cewabo negatîf bêro dayene, ma do muracatê DDB’yî bikerê."