AMED - Avûkate Elif Tirenç dîyar kerd ke cinîyê ke komele de xebate kenê û rêxistinê cinîyan ke têkoşîn kenê, benê hedefê hukmî û wina vat: "Rojawanê Tirkîya de cinî bi bahaneyê, 'rijnayîşê keyeyî' yenê sucdarkerdiş, labelê mintiqa de zî  rêxistinê cinîyan bi 'rijnayîşê dewlete' yenê sucdarkerdiş. Bi nê rengî cinî benê hedef."

 

Avûkate û endama Komeleya Cinîyan a Rosaye Elif Tirenç Îpek Ulaşe seba faliyetê komele amebî sucdarkerdiş û 5. roniştişê dewaya ci rê amebî akerdiş, 8. Dadgeha Cezaya Giran ya Amedî de ame vînayene. Elîfe hem bale ant serê prosesê hukmî, hem zî bale ant serê nêzdîbîyayîşê dewlete ya hemverê rêxistinê cinîyan.

 

'Mintiqa de cinî bi rijnayîşê dewlete yenê sucdarkerdiş'

 

Elife dîyar kerd ke demê peyîn de hêrişê ke yenê ciwîyayîş, tena vera cinîyê aktivîstan de nîyo, eynî wextî de hemverê sazgeh û rêxistinê cinîyan zî hêrişî babeta vatişî yê Elîfe wina dewam kerd: "Camêrdêkê  bi sifatê mexdûriyetî, dewaya padayîşî Platformê Ma do Kiştişê Cinîyan Vindarnê akerd. Dosyayê derheqê Komeleya Cinîyan a Rosa zî sey nê ya. Wexto ke ma ewnîyenê dosyayan ra, bi beyanê camêrdê ke versucê şîdetî yê, cipersayîş dest pêkenê. Yanî rojawanê Tirkîya de cinî bi bahaneyê, 'rijnayîşê keyeyî' yenê sucdarkerdiş labelê mintiqa de zî rêxistinê cinîyan bi 'rijnayîşê dewlete' yenê sucdarkerdiş. Bi nê rengî cinî benê hedef. Nê ra dîyar o ke zîhnîyetê camêrdan, ma sey tehluke vîneno."

 

'Seba ke ez îdarekara komele ya no beno babeta muhakemekerdişî'

 

Elife dîyar kerd wexto ke merdim prosesê hukmî ewnîyeno, vîneno ke no proses seba kes û komeleyê ke yenê muhakemekerdiş beno sey îşkenceyêk û vat: "Sey nimûne; dosyaya ke ez ameyîne muhakemerkerdiş de beyanê şahidê nimte estb. Sewbîna beyanê kesê ke şîdetê cinîya ke muracatê ma kerdibi, estbi. Xêrcê nînan çîyêk dosya de çinbi. Seba ke ez îdarekara komele ya, no ma beno babeta muhakemekerdişî. Ma destpêkê muhakemekerdişî ra heta nika vat, ganî qerarê beratî bêro dayîş. Bi serrêke û nîm o muhakemekerdiş bi bahaneyê xususê kêmî yeno dergkerdiş. Bi dergkerdişê hukmî yeno waştiş ke mesajêk bêro dayene. Wazenê bi nê cuya merdiman felç bikerê û wazenê ma têkoşînê ma ra agêrênê. Seba nê bikerê zî tedaya psîkolojî kenê."

 

'Derheqê dosyaya qerarê nêtaqîbkerdişê seba aye ameyo dayene israr kenê'

 

Elife bale ant serê roja roniştişî û wina vat: "Dadgehe derheqê dosyaya qerarê nêtaqîbkerdişî seba aye ameye dayene israr kena ke reyna bêro akerdiş. No lazim nîyo û huqûqî nîyo. Ma îtiraz kerd. Dozgerî zî waştişê nê çî nêkerd. Dozgerî zî dîyar kerd ke çîyê dadgehe kerdo, lazim nîyo û huqûqî nîyo. Dadgehe xo rê vana belkî ma çîyêk derheqê na kese de bi nê rengî bivînê û aye mehkûm bikerê. Nika no edlîye de dewam keno."

 

'Ma pîl û bi hêz benê'

 

Elife bale ant serê sebebê dergkerdişê prosesê muhakemeyî û vat: "Dîyar o ke dosyayê ma ci ra yenê muhakemekerdiş, do ne vernî, ne zî peynî bibo. Roja ke ez beşdarê têkoşîn û rêxistinê cinîyan bîye, DOKHî ra bigîrê heta dimayê ci tim bi beşdarîya 8ê Adare Roja Cinîyan ê Dinya, 25ê Teşrîna Peyêne Roja Têkoşînê Hemverê Şîdetê serê Cinîyan ameya sucdarkerdiş. La ez vana, têkoşînê ma qetî erd de nêmend, nêqedîya. Her tim hînan ale dewr girewtî. Çike ma heqdar ê. Sewbîna roja ke no destdergîyê hukmî aver şîyo heta nika têkilî û paştdayîşê mabêne sazgeh, rêxistinê cinîyan tewr zêde bîyo. Her ke ê hêriş kenê, ma pîl û bi hêz benê."