AMED - Ablûqakerdişê bînaya produksîyonê Pîya û Arî mengêke yo dewam keno. Polîs bi şewe û roje verê bîna de vinderteyê.

 

Amed de 8ê hezîrane de 20 ci ra rojnamegerî bi pêroyî 22 kesî ameyî destbendkerdiş û erzîya serê produkîyonî. Sereştişê kargehê çapemenîye de xeylêk kamera, computer û materyalê dijîtalî ameyî desteserkerdiş. Roja sereştişî ra heta nika bînaya produksîyonê Pîya û Arî binê ablûqa de yo. Wirdî bînayan de polîsî estê û şewe û roje verê berî de vindarnayeyê.

 

Destûr nîno dayîş ke xebatkarî şêrê kargeh. Ablûqakerdişê bîna mengêke pey xo de verda. Ame zanayîş ke cigêrayîşê şîrketan dewam keno. Sewbîna bahaneyê ke qerarê nimite serê dosya de esto, derheqê cigêrayîş û ablûqakerdişî de zanayîş nêdanê avûkatan.

 

Çarçewaya cipersayîşê Serdozgerîya Komare ya Amedî de 20 ci ra rojnamegerî bi pêroyî  22 kesî ameyî destbendkerdiş.  Rojnamegeran ra Mudûra JINNEWSî Safîye Alagaş, Hemserekê DFGyî Serdar Altan, Mudûrê Karê Nuşteyî yê Rojnamegerê Xwebûnî Mehmet Alî Ertaş, Edîtorê MAyî Azîz Oruç, edîtorê Xwebûnî Zeynel Abîdîn Bûlût, rojnameger Omer Çelîk, Mazlum Guler, Îbrahîm Koyuncu, Neşe Toprak, Elîf Ungur, Abdurrahman Oncu, Suat Doguhan, Remziye Temel, Ramazan Gecîken, Lezgîn Akdenîz û Mehmet Şahîn bi îdiayê “endamîya rêxistine” ameyî tepiştiş.

 

Heto bîn ra rojnamegere Gulşen Koçuk, Esmer Tunç, Mehmet Yalçin, Kadîr Bayram, Feynaz Koçuk û Îhsan Ergulen zî bi şertê kontrolê edlî amebî veradayîş.