Rojda Aydin  

 

ŞIRNEX – Keyeyê ke qedexeyê tebervejîyayîşê kuçeyan yê Cizîrî de tutanê xo vînî kerdî, reaksîyon vera qerarê AYMyî dayî û vatî: “Birînê zerrîya ma reyke bîn kûr bi. No qerar qerarêk bi edaletî nîyo. AYMyî qerarêk sîyasî da. La ma fek dewa ra vera nêdanê û heta kiştoxî bêrê muhakemekerdiş, ma do serê dewa da vinderê.”

 

Dadgeha Qanûnê Bingehînî (AYM), muracatê derheqê binpaykerdişê heqê cuye ya kesê ke  qedexeyê tebervejîyayîşê kuçeyan de 14ê kanûna 2015 de qezaya Cizîrî ya Şirnexî de ame neqlkerdiş ke dinyaya xo bedilnayî, vizêr qerar da. AYMyî muracatê sey, “nîno qebûlkerdiş” dî û binpaykerdişê heqê welatijanê ke ameyê qetilkerdiş zî nêdî.

 

Keyeyê ke tutê xo bodrumê Cizîrî de vînî kerdê, reaksîyon vera qerarê AYMyî dayî û dîyar kerdî ke no çî qerarêk sîyasî yo.

‘Qerar dir birînê zerrîya ma reyna kûr bi’

 

Bodrum de Hacer Arslan û Mehmet Saît Arslan zî kesê ke ameyî qetilkerdişî yê. Cenazeya Hacere bi 6 serrî yo hemverê heme hewldayîşê keyeyê zî vînî ya. Dayîka înan Heznî Arslan dîyar kerd ke bi nê qerarî birînê zerrîya înan reyke bîn kûr bîyo û wina vat: “Her çiqas dewlete vajo, ma nêkişto zî no wehşet verê çiman de ame kerdiş. Bi serran o dayîkî cenazeya tutanê xo gêrenê. Hesretê înan oyo ke biresê cenazeya xo. Bi 6 serrî yo ez hema cenazeya kênaya xo gêrena. Kênaya mi wendekara na dewlete bî û di mengî bi ke serê ambûlanse de xebityayîne. Dewlete memûra xo qetil kerd. Çend rey mi gonî da la vanê, cenaze verê ma de nîya. Her rey yenê keye persê kênaya mi kenê. Tutê ma qetil kerdî û dima ra vatî, ma terorîstan kişto. Ê tutê nê welatî bî. Ma qerarê AYMyî şermezar kenê û qebûl nêkenê. Mi soz dayo tuta xo ke heta kerdoxê înan nêrê cezakerdiş ez o fek dewa ra vera nêdî. Peynîya peynî helbet ma do biresê heq û huqûqî xo. Ez o muracatê Ewropa û dewletê mîyanneteweyî bikerî û fek na dewa ra vera nêdana. AYMyî paştdayîş da kiştoxê tutanê ma. AYMyî goreyê huqûqî qerar nêdayo, goreyê sîyasî qerar dayo. Heq, huqûq, têduştî û edaletê na dewlete çin o. Heta peynî ez o serê teqîbkerdişê dewaya tutanê xo bî. Ê çiqas red bikerê zî ez o reyke muracat bikerî. Ma do bi avûkatanê xo dir muracatê AÎHMyî bikerê. Heta kiştoxî bêrê cezakerdiş, ma nêvindenê.”

 

‘Ma qerarê AYMyî nalet kenê’

 

Kesê ke bodrum de dinyaya xo bedilnayî nînan ra yew zî vilakerdoxê Rojnameyê Azadîya Welatî Omer Baran o. Dayîka ci Fatma Baran bêhuqûqîyê AYMyî şermezar kerd û vat: “Lajê mi serra 2013ine heta 2016ine vilakerdoxê rojnameyî kerdêne. Lajê mi zî bodrum de ame qetilkerdiş. Înan bi hawayêke wehşet qetil kerdî. Tutê ma sivîl bî. Heta ma saxb ê, a xo vîr ra nêkenê. Ma do heta peynî wayîrê na dewa vejîyê. No qerar bi edalet û huqûqî nîyo. Tirkîya de edalet nêmendo. Ma qerarê AYMyî nalet kenê. Di mengî verê mektubêke ame û vatî ke şima nêeşkenê dewa abikerê. Heme dewletê mîyanneteweyî hemverê nê wehşetî û bêhuqûqî de bêveng mendê. Nê roşanî de reyke bîn zerrîya ma veşnayî. Zerrîya ma birîn a.”

 

‘Ma do qet nê rayîrî ra nêagêrê’ 

 

Bodrum de Adîl û Egîd Kuçuk zî dinyaya xo bedilnayî. Dayîka înan Nafiye Kuçuk zî da zanayîş ke dewlete hem tutanê înan qetil kena û hem zî qerarêk bê huqûqî dana û wina vat: “Bi tank û topan hêrişê tutanê ma kerdî û qetil kerdî. No wehşetî heme dinya dî. La AYMyî wuşt qerarêk sîyasî da û vanê, çîyêk bêhuqûqî yo. Cizîra Botan de tutî, cinî, kal û pîran heme kiştî. Cizîre dorpêç kerdî û bi kîmyasalan qetil kerdî. Senîn beno no bi huqûqî bo. Heta ke edalet cayê xo bigîro, ma do bibê taqîbkerdoxê dewa. Ser de zî AYMyî muracatê ma red keno. Heta ke ez saxe bî, ez o wayîrê na dewa vejîyî. Seba ke kiştoxî bêrê muhakemekerdiş, çi destê ma ra bêro ma do bikerê. PKK ney, dewlete tutanê ma kişt. Ma do destûr nêdê ke serê na dewa padê. Heta peynîya emrê xo ez o serê na dewa de vinderî. Heta Ewropa zî ma do dewaya xo berê. Heme kes zî zano ke wehşetêk ameyo kerdiş. Ma do qetî nê rayîrî ra anêgerê.”