Medya Uren 

 

RIHA – Xebatkara Kooperatîfê Kîbeleyî Fatma Taşe derheqê xebatanê xo û tesîrê krîzî yê serê cinîyan de ercnayîş kerd û vat: "Ma xo bi 7 cinîyan dir kerd yew, bi deyn ma torbeyêke sewzî girewt û ma dest bi berardişî kerd. Ma bi sloganê, "Ma do sînorê ke cinîyan rê ameyê ronayîş, birijnê û cinîyan keye ra vejê" dest pêkerd. Ma nika 30 cinî xebityenê û ma bi tonan berardiş kenê. Seba bidestkerdişê azadîya xo ya ekonomîye, ma rê na game muhîm a."

 

Kooperatîfê Cinan ê Kîbeleyî vernîya 4 serran de Pirsûs de ame awankerdiş û dest bi xebate ame kerdiş. Koperatîfo ke 7 cinîyan dir destpêkerdibi nika 30 cinî ci de xebityenê û seba cinîyanê mintiqa zî beno nimûne.  Her çiqas krîzê ekonomîye, pêro komelî bikero binê tesîrê xo zî, cinîyê ke kolektif xebityenê a bawerî de yê ke do bieşkê çareserî awan bikerê. Fatma Taşa ke awankerdoxan ra yew a, derheqê xebata xo, tesîrê komelî û krîzê ekonomî de ajansê ma rê qisey kerd.

 

‘Ma bi 7 kesan dest pêkerd, ma nika 30 cinî yê'

 

Fatma sere de qalê prosesê destpêkerdişê xebatan kerd û vat: “Demo ke ma newe dest bi xebatan kerd ma 7 cinî bî. Mintiqa de cinî mîyanê sînoranê keye de, yan zî rewşêke ke azadîya înan ya ekonomîye ameya desteserkerdiş de ciwîyenê. Coka ma rijnayîşê înan ê sînoran û vetişê cinîyan xo rê kerd wezîfe.  Ganî cinî serê payan de bimanê û seba  bidestkerdişê azadîya xo ya ekonomîye xo ver bidê. Ma bi nê sloganî dest pêkerd û ma eşkenê vajê ke ma serkewtişê pîlî zî bi dest kerd. Ma nika 30 cinî pîya xebityenê. Na babete seba ma xeylêk muhîm a.  Rexmê nê de ma zehmetîyê pîlî antî. Tedayê komelî, derûdor û bi taybetî zî tedayê camêrdan serê ma de bi. Nê hişmendîyê îqtîdarî ma rê zorîyê pîlî vet."

 

‘Ma bi torbeyêke sewzî dest pêkerd'

 

Fatma vat, cinî biwazê eşkenê heme zordarîyan derbaz bikerê û vat: "Pêwa tedayê derûdorê ma hetê ekonomî de zî problem ciwîyenê. Ma bi torbeyêke sewzî dest pêkerd. Ma torbeyê sewzî zî bi deyn girewtib. Ma 4 serrî pey xo de verda û her ke şino zî ma pîl benê. Xebatê ma her ke şino  bi paştdayîşê cinîyan dir weşêr beno. Ma bi çuwalêke dest pêkerd, ma nika bi tonan beradiş arêdanê. No seba ma hîsêk weş o. Her çiqas xeylêk kesan ma ra bawer nêkerdêne zî xeylêk kesan ma rê paştdayîş da. Ma sipasîya înan kenê. Eke cinî biwazê eşkenê heme zordarîyan derbaz bikerê û biresê serkewtişî.”

 

‘Ma rotişê berardişan de probleman ciwîyenê'

 

Fatma wina dewam kerd: "Ma berardişê xo arêdanê. Sey çareserî zî ganî ma bazaran de berardişê xo bidê rotiş û kooperatîfê rotişî awan bikerê. La yê rotişî çin ê û ma berardişê xo marketan rê nêroşenê. Demo ke cayê rotişî çinbo, tu êdî nêeşkena berardiş zî bikerî. Ti wina nêeşkena cinîyan zî bîyarê têhet. Xora rewşa ekonomîya Tirkîya zî dîyar a. Kes nêeşkeno nanêke zî bero keye."

 

‘Ma do bieşkê serbikewê'

 

Fatma tewr peyîn wina vat: “Rewşa normal de ma nê mewsimî de dest bi berardiş kenê. Seba krîzê ekonomîye ma  hema dest bi xebata xo nêkerda. Rexmê ke ma nîmeyê hamnanî de yê, firingî xeylêk vay ê. Sey firingiyan, her sewzîyêk vay o. 2 serrê peyînî de zî ma nê probleman ciwîyenê. Par nê wextî de ma dest bi wuşkkerdişê balîcanan û salçe kerdibi. Krîzê ekonomî destur nêdano ke ma dest pêbikerê. Bi ramitiş û berardişî ma ancax eşkenê xebata xo dewam bikerê. Ganî ma paştdayîşê yewbînan bikerê. Eke wina bo, ma do bieşkê serbikewê."