STENBOL - Rêxistinê cinîyan ê derheqê prosesê wedaritişê destnêdayîşî yê Hemsereka Pêroyî ya DBPyî Saliha Aydeniz de qisey kerdî û vatî, cinîyê ke sînoran rijnenê sey 'Terorîst' yenê binamekerdiş û vatî, cewabo tewr xurt yê hemverê îqtidarî têkoşînê hempar ê cinîyan o.

 

Bi waştişê azadîya fîzîkî ya Rayberê PKKyî Abdullah Ocalan ke Îmraliyî de binê tecrîdêk giran de yo 12ê Hezîrane de bi sloganê, "Hemverê sîyasetê tecrîdî seba pawitişê azadîye ma ver bi Gemlikî de rayîr ra şinê" rayîr şîyayîşê Gemlîkî bi ca ame. Polîsan hêrişê rayîr ra şîyayîşo ke xeylêk cinî mîyan de bî û parlamenterî zî estbî, kerd.  Hemsereka Pêroyî ya Partîya Mintiqaya Demokratîke (DBP) Saliha Aydeniz hemverê hêrişê polîsan xopawitişê xo kerd û bî hedef. Dima ra cipersayîş ame destpêkerdiş û 5 fezlekeyê cîya ameyî amadekerdiş. Komîsyonê Edalet û Qanûnî yê Meclîsî dîyar kerd ke wedaritişê destnêdayîşê Saliha Aydenize bikerê rojeve. No komîsyon 5ê Temmuze de kom bi. Pawitişê Salîha, Serekwekîla Kome ya Partîya Demokratîke ya Şaran (HDP) Meral Daniş Beştaş kerd. 

 

Netîceyê kombîyayîşê 6ê Temmuzede hetê Komîsyonê Amadekarî ra bi ca ame, seba wedaritişê destnêdayîşê Salîha rapor bêro amadekerdiş. Do no rapor pêşkêşê Komîsyonê Têkelî bêro kerdiş. Demê pêvînayîşê raporî de do yan Salîha yan zî parlameterêk/e rê ameyo/a dîyarkerdiş, pawitiş bêro girewtiş. Komîsyonê Têkel qerarê wedaritişê destnêdayîşî bido, do no proses şêro heyetê pêroyî. 

 

Rêxistinê cinîyan ê derheqê prosesê wedaritişê destnêdayîşê Hemsereka Pêroyî ya DBPyî Saliha Aydeniz de qisey kerdî, vatî, cewabo tewr xurt ê hemverê îqtîdarî têkoşîno hempar ê cinîyan o.

 

'Cewabê ma yo tewr xurut hemverê îqtîdarî de têkoşîno hempar o'

 

Endama Cinîyan ê Demokrate ya Newe Nurgul Uci da zanayîş ke zîndanan ra tabût vejênê û teber zî bîyê zîndanê akerdeyê û yê Şarê Kurdî teber de vengê pêro hetan o. Nurgule bale ant serê sîstemê hemserekîya û vat, AKP-MHP wazeno sîstemê hemserekî wedarno û wina vat: "AKP-MHP tecawuzê leşker û polîsan ê Kurdistanî nêdîyaye yeno. Tehemulê înan hemverê vengê  cinîyan de çin o. Cewabê ma yo tewr xurt ê hemverê îqtidarî têkoşînê ma yo hempar o."

 

'Cinîyê ke sînoran rijnenê sey 'Terorîst' yenê binamekerdiş'

 

Endama Paştdayîşê Morî Tulay Cengiz dîyar kerd ke cinîyê sînoran rijnenê sey 'Terorîst' yenê binamekerdiş û wina vat: "No zihnîyetê şerî hemverê cinî dano destpêkerdiş. Ma şîdetê camêrd dewlete her ca de vînenê. Ma nê dişminê cinîyan baş nas kenê. Labelê ê zî ma nas kenê. Ê ma têkoşînê ma û îradeyê ma nas kenê. Wazenê wareyê cinîyan ê kurdan ê sîyasetmedaran teng bikerê. Labelê ma do hemverê nê zîhnîyetî têkoşînê xo dewam bikerê."

 

'Ma paradîgmayê Birêz Ocalanî esas gênê'

 

Aktivîsta Hereketê Cinîyan ê Azadan (TJA) Filiz Peştek dîyar kerd ke ê paradîgmayê Birêz Ocalan esas gênê û wina vat: "Polîtîkayê tecrîdî zîhnîyetêk lêşin o. Şexsê Birêz Abdullah Ocalanî de tecrîdê serê kurdan û Rojhelatê Mîyanên ferz kenê. Ma paradîgmayê demokratîke, a azadîya cinîyan û ekolojî esas gênê. Yê ke nê paradîgma dayo werte zî Birêz Ocalan o. Coka ma hemverê tecrîdê serê ey de vejênê. Ayşe Gokkan, Gultan Kişanak, Figen Yuksekdag, Aysel Tugluk sere de xeylêk embazê ma yê cinî zîndanan de yê. Wazenê tedayê serê nasnameyê cinî bikerê. Ma zî hemverê nê de bêveng nêmanê."