MERKEZÊ XEBERAN - Hemverê qirkerdişê xoza û birnayîşê daran ê Cûdî û Bestayî dewam keno de, Baroyê Şirnexî do bi 300 avûkatan dir şêro mintiqa.

 

Bi nêzdîyê 2 serrî mintiqayê Koyê Cûdî û Bestayî de qorîcî bêmabên daran birnenê. Qirkerdişo ke binê muşahadeyê eskeran de yeno kerdiş, mintiqayê Keniyamîr, Birateto, Birapeşo, Deyndarok, Cinîwer, Belûzer, Rîsor, Serêrû, Tîkera, Qûrteka Pêşya, Girêdeyincê, Şerevan, Xirtkbestê û Navyan yê Bestayî dewam keno. Darê ke yenê birnayîş TIR û kamyonan rê yenê barkerdiş û benê bajaranê cîya.

 

Komîsyonê Derûdor û Bajarî yê Baroyê Şirnexî rojêke verê dîmenanê TIR û kamyonê daran barkerde weşan kerdî. Labelê rêxistinê derûdorî na babete de hema zî xo bêvengî de danê ro. Derheqê babete de Baroyê Şirnexî Greenpeace waşt ke bikewo mîyanê hereketî la sazgehî seba qirkerdişê xozaya mintiqa de cewabê, "nêkeweno verê wareyê ma yê pisporî” da. 

 

Goreyê xebera Ajansê Mezopotamyayî (MA) Baroyê Şirnexî do bi 300 avûkatan dir rojê ameyox de şêro mintiqa ke xoza yeno talankerdiş, dar û daristanî yenê birnayîş.