Sîdra Mamo

 

ŞEHBA - Cinîyê Minbicî derheqê şorişê 19ê Temmuze û tesîrê ci yê serê cuya înan de kerdo de nê çî qal kerdî: "Şorişê Rojawanê Kurdistanî bi xo şorişê cinîyan o. Seba ke cinî ci de cayêk pîl girewtî û xebatêke bi tesîr kerdî. Cinîyan pawitişê herra xo kerd û hemverê îşxalkerdişî xo ver dayî. Heme barê nê şorişî serê milê cinîyan de yo. Bi taybetî hêzê cinîyan ê eskerî hêz da ma. Demo ke ma dî, cinî çeke daya serê milê xo, no ma rê bi hêz û moral. No sebeb ra ma şorişê 19ê Temmuze zad pîroz vînenê. Dimayê ke ma ca şorişî de girewt, xeylêk vurnayîşî ma de ameyî meydan."

 

Hemverê koletî û pederşahî ke tim ameyo waştiş komelî goreyê berjewendîyê xo form bidê ci, xeylêk reyan cinîyan vera nê serewedarnayo. Zîhnîyetê pederşahî ke her tim waşt cinî bikero koleyê komelî û hacetê dayîş û girewtişî, tim nêheqî û şîdet cinî rê kerd. Her çî destê cinîyan ra girewtî û vatî ti tena ê keye û tutan a. No zîhnîyetê pederşahî seba nê hêz û îradeyê cinî û bîyayîşê ci pelçiqna.

 

La bi Şorişê 19ê Temmuze dir cinî newe ra serê payan de vindertî û tewrê şorişî bî. Cinî, şoriş de bîyayîşê xo bi heme hawayî vernîya heme dinya îspat kerd. Têkoşîn û xoverdayîşê ke 10 serrî destpêkê şorişê dewam keno, nika cinîyê Rojhelatê Mîyanên dir feyz bo. Cinîyan bi têkoşînê xo destkewtişê  pîlî bi dest kerdî û dişminî rê bîyî cewab. Cinîyê ke tewr zêde nê çî rê tesîr benê û waştî tewrê şorişî bibê cinîyê Minbicî yê. Dimayê hende îşxalkerdişî û asîmîlekerdişî verê xo dayî mîyanê şorişî û waştî bîyayîşê xo ispat bikerê. Derheqê babete de cinîyê Minbicî ajansê ma rê qisey kerdî.

 

'Bi tewrbîyayîşê şorişî vengê mi berz bi'

 

Endama Kombîyayîşê Cinîyan ê Zenûbiya yê Minbicî Rabia Bekro ke pêameyîşê ereban ra ya, dîyar kerd ke şorişê 19ê Temmuze hêz û îradeyêk pîl mîyanê înan de viraşto û vat: "Şorişê Rojawanê Kurdistanî bi xo şorişê cinîyan o, seba ke cinî ci de cayêk pîl girewt û xebatêke bi tesîr kerdî. Sewbîna cinîyan pawitişê herra xo kerd û hemverê îşxalkerdişî xo ver dayî û heta nika xo ver danê. Heme barê nê şorişî serê paşta cinîyan de yo. Bi xususî hêzê cinîyan ê eskerî hêz da ma. Demo ke ma dî, cinî çeke daya serê milê xo û bi cesart ê no ma rê bi hêz  û moral. Seba nê ma şorişê 19ê Temmuze zaf pîroz vînenê, seba eke no şoriş nêbîne, na rewşa ma nika wina nêbîne. Dimayê ke mi nê şorişî de ca girewt, xeylêk vurnayîşî şexsê mi de ame meydan. Êdî hêzê min ê helwestêk ramojnî virazya. Êdî mi eşkayîne her çî ra vajî ney û vengê min o ke hende serrî çinbi, berz bi. Mi xo nas kerd û fikrê rast nas kerd. Seba nê êdî wezîfeyê min o ke ez bi nê fikirî bi heme cinîyan bidî naskerdiş."

 

'Seba ispatkerdişî bîyayîşê ma, şoriş bi îmkanêk pîl'

 

Endama Kombîyayîşê Cinîyan ê Zenûbiya yê Minbicî Heyat Salêmî pêameyîşê tirkmenan ra da zanayîş ke bi xêrê Şorişê Rojawanê Kurdistanî yewbîyayîşê şaran û pêameyîşê Vakur û Rojhelatê Sûrîye ame awankerdiş û vat: "No şoriş sewîyeyêk zaf muhîm bi seba ma û temamê cinîyê Vakur û Rojhelatê Sûrîye, seba ke bi xêrê fikir û felsefeyê Rayber Apo û şorişê bîyaye heme şar û pêameyîşê Vakur û Rojhelatê Sûrîye bî yew û êdî projeyê Neteweyê Demokratîke xo rê esas girewtî. No şoriş, şorişêkê dinya bi. Tesîr serê temamê dinya de kerd, şoriş îmkanêko pîl da ma, seba ke ma bîyayîşê xo ispat bikerê. Seba nê ganî ma bi israr bê û xebata xo tewr pîl bikerê seba ke ma bieşkê welatê xo îşxalkerdişî ra xelas bikerê."

 

'Her kes bi neteweyê xo est o'

 

Endama Kombîyayîşê Cinîyan ê Zenûbiya yê Minbicî Senai Receb ke pêameyîşê çerkes ra ya û Şorişê Rojawanê Kurdistanî de sey şarê çerkes înan eşkayîne bîyayîşê xo îspat bikerê û wina vat: "Sey pêameyîşê çerkes, Şorişê 19ê Temmuze bi sebebê bîyayîşê ma. Seba ke demê îqtîdarî de yew ale, yew nîjad, yew ziwan, yew dîn û yew netew serê pêro şaran de amebi ferzkerdiş û ma amebî ççinkerdiş. La nika ma bi ziwanê xo û neteweyê xo estê. Nika pêro Vakur û Rojhelatê Sûrîye de her kes bi ziwan û neteweyê xo est o. No zî seba ma zaf bi mana yo. Seba nê zî waştişê ma cinîyan rê est o ke heta bi resê amancê xo têkoşîn bikerê."