Rozerîn Gultekîn

 

STENBOL - Koma Cinîyanê KAYY-DERî, 11 serrî yo hemverê asîmîlasyonî bi Ziwanê kurdkî ke ziwanê înan ê dayîke yo kilaman vanê û vejênê serê sehne. Endama Kome Zeynep Kuloglu, dîyar kena ke ê deyndarê kesê ke seba kurdkî bedel dayê yê û venga her kesî kerd ke bi ziwanê xo yê êdayîke qisey bikerê.

 

Pêwa asîmîlasyon, qedexe û tedayê ke dewlete bi seserran o serê Ziwanê Kurdkî de dewam kena zî ziwan û kulturê kurdî bîyayîşê xo dewam keno. Komeleya Hetkarîya Komelî, Averşîyayîş û Kulturî yê Qezaya Kigî, Karakoçan, Adakli, Yayladere û Yedîsuyî (KAYY-DER) ke 31 serrî verê Stenbol de seba pawitişê kulturê kurdî ameye awankerdiş, xebatanê xo bêmabên dewam kena.

 

Koma cinîyan awan kerd

 

KAYY-DER seba kesê ke tedayê dewlete ra ameyê koçkerdiş, kulturê xo bipawê ame awankerdiş û sîstemê hemserekî est o. Mîyanê komela de koma muzîkî ya bi nameyê Koma Cinîyanê KAYY-DERî zî est a. Bi no hawa 11 serrî hunermendê cinî bi cil û belgê xo yê neteweyî û ziwanê dayîke hunerê xo pêşkêş kenê.

 

Ma bi endama Koma Cinîyan ê KAYY-DERî Zeynep Kuloglu dir serê amancê koma înan û muhîmîyê ganekerdişê kulturê kurdî de qisey kerd.

 

Seba kesê ke serranê 90î de koçber bîyê ame awankerdiş

 

Zeynebe, ard ziwan ke seba kurdê serranê 90î de hetê hêzê dewlete ra dewê înan ameyî vengkerdiş û ameyî koçberkerdiş seba ziwan û kulturê xo bipawê, KAYY-DER ame awankerdiş û wina vat: "Ders û perwerdeyê bi  kurdkî tîya de yenê dayîş. Dersê Erbane, saz, folklorî yenê dayîş. Koma ma ya ê cinîyan est a. KAYY-DERî de xeylêk xebatê tewir bi tewir yenê kerdiş. Seba ma zaf muhîm o ke ma bêrê têhet û  bi rehetî bi ziwanê xo yê dayîke qisey bikerê, tîya de yewbînan bivînê, dejê xo pare bikerê. KAYY-DER estune ma yo, pawitoxê mintiqa û kulturê ma yo."

 

'Ma kilmanê ke dayîkê ma verê vatê vanê'

 

Zeyneba ke îdarekara KAYY-DERî bî, dimayê cinîyê ke mîyanê Koma Cinîyan ê KAYY-DERî de bî kome ra vejîyayî, seba kome serê lingan de vindarno, tewrê kome bî. Zeynebe wina vat: "Koma Cinîyan ê KAYY-DERî 11 serrî yo est a. Embazê ma zaf baş bî. Nika vurnayîş virazyayo û komêke newe awan bîya. Koma Cinîyan ê KAYY-DERî kilamanê ke ma verê mîyanê dehl, rez, bejayî û çîmenan de vatêne, vana. Ma kilmanê ke verê dayîkê ma vatêne vanê. Cilûbelgê ma yê sehneyî zî ê mintiqayê ma yê. No seba ma esas o. Ma her wext muhîmî danê koma cinîyan û ma do bidê zî. Ma bi nê serberz ê.  Amancê ma oyo ke kultur û deyîranê xo yê adetî vajê. Her çiqas merdimî bivuryo z, rayîrê ma her tim yew o."

 

Kome bi 7 cinîyan yena meydan

Zeynebe vat koma înan bi 7 cinîyan yena meydan  wina qal kerd: "Seba ma xeylêk kesan mimkun nêbi ke vejîyê sehne la ma sehne de ca girewt. Ma nik anê karî kenê. No bawerîya cinîyan bi xo zêde keno. Xeylêk embazê ma vanê, 'Ma zî beşdar bibê, ma wazenê kilaman vajê.' Gamê qijî yê cinîyan do pîl bibê. Bawerîya înan bi xo zêde beno. Ganî cinî bizanê ke nika çiqas bi qîmet ê. Cinî nêbê, nêbeno. Cinî wayîrê kultur û ziwanê dayîke yê."

 

Cinîyî serê sehnî de bi cewherê xo benê yew

 

Zeynebe vat bi cilanê xo yê netewî serberz a û wina vat: "Wexto ke bi cil û belgê xo yê neteweyî vejêna sehne û wayîrê kulturê xo vejênahîsêko cîya dano mi." Sewbîna Zeynebe dîyar kerd ke verdayîşê kulturê xo tutan rê mîrasêko pîl o.

 

'Ma xo vînî nêkerê'

 

Zeynebe venga her kesî kerd ke ziwanê xo yê dayîke bipawê û venga cinîyan kerd ke tewrê Koma Cinîyanê KAYY-DERî bibê û wina vat: "Tu vile şaxê xo ra nêvejêna ke  îspat bikero bê boya ci çiqas weş a. Ganî tu kes seba ke xo îspat bikero  cewherê xo ra nêvejîyo. Eke her kes bieşko kulturê xo û ziwanê xo yê dayîke bipawo, do baş bo. Qiseykerdişê bi ziwanê dayîke bi hawayêke tewr xirab zî qiseykerdişê tirkî bi qîmetêr o. Ma wazenê hûmara xo zêde bikerê û komêke pîl awan bikerê. Ma her kesî bêferq û cîyayî ko kenê."