Tirkîya vizêr Dewa Perexî ya Zaxoyî bombavaran kerd. Bombavaran de 9 kesî dinyaya xo bedilnayî û 22 kes zî birîndar bî. Rêxistina Partîya Demokratîke ya Şaran (HDP) ya Şirnexî bi eşkerayîyêke reaksîyon  ramojna. Eşkerayîye verê qezaya HDPyî ya Silopî de ameye dayene. Rêxistinê qezayanê HDPyî, Meclîsê Dayîkanê Aştîye û parlementerê HDPyî yê Şirnexî beşdarê eşkerayîye bî. Girseyî pankartê "Ma qirkerdişê Zaxoyî yê Başûre Kurdîstanî şermezar kenê” akerd.

 

‘Hêrişêk hemverê sîvîlan o'

 

Metnê eşkerayîye hetê Hemserekê HDPyî yê Şirnexî  Abdullah Gungenî ra ame wendiş. Abdullah, destpêkê qiseykerdişê xo de hêrişê hemverê Zaxoyî şermezar kerd û wina vat: “No hêriş seranserî hemverê şarê sivîlî ameyo kerdiş. Seba nê zî vengdayîşê ma partî, sazgeh û dezgehê kurdî yo ke bi yew zerrî, yew vengî bi hawayêk şîdet hemverê hêrişî ramojnê û bi hawayêke lezabez bîyayîşê eskerî yê dewleta tirkî ke mintiqaya Kurdistanî de ya, reaksîyon bêro ramojnayîş û helwestê xo dîyar bikerê."

 

Abdullahî qiseykerdişê xo wina qedêna: "Ma venga rayapêroyî yê mîyanneteweyî, Yewîya Ewropayî, Neteweyê Yewbîyaye û Rêxistina Taqîbkerdişê Heqê Merdiman û pêro şarê Tirkîya, rêxistinê sivîlî û partîyê sîyasî kenê ke hemverê nê hêrişan vengê xo berz bikerê û nêbê şirîkê nê qirkerdişan."