Sema Çaglak

 

ŞIRNEX - Fatma Babat (29) ke qezaya Hezexî ya Şirnexî de manena. Fatma hem bi rotişê kitaban debara xo kena û hem zî seba kulturê wendişê kitaban aver bera hewl dana. Fatma vana, wa cinî tena xo wareyêkê de sînordar nêkerê û pey xeyelanê xo de bê.

 

Bi averşîyayîşê teknolojî û hacetê teknîkî hîn aktîvîteyê komelî her ke şinê qels benê. Wendişê kitaban zî ê aktîvîteyan ra yo ke kêm beno.  Fatma Babat (29) ke qezaya Hezexî ya Şirnexî ra ya, hem bi rotişê kitaban debara xo kena û hem zî seba kulturê wendişî yê kitaban aver bero, hewl dana. Fatma eynî wextî de karê tekstîlî de xebityena, xeyalê aye o yo ke seba xo kitabêkê kitaban abikero.

 

‘Wextê xo yê mende dana kitaban'

 

Fatma, serra 2018ine de beşê îdarekarîya înformatîk qedênaya. La seba ke demêk derg o goreyê beşê qedênaya karêkê nêvînena êdî hêvîya xo beşê wendişî rê vînî kena û karê tekstîlî de şuxulêna. Fatma hetêkê ra zî wendişê kitaban ke ci ra hes kena dewam kena. Fatma wina vana: "Ez roje 11 saetan karê tekstîlî de xebityena û gam ake yena keye zî wextê xo yê bînî dana wendişê kitaban. Kitabê ke wanena serê medyaya dijitale de pare kena. Nê dir hem dayîşşinasnayîşê nê kitaban kena û hem zî înan roşena. Hetêkê ra zî seba mi benê alternatîfê debare.”

 

‘Dayeyê wendişê kitaban kewto'

 

Fatma, dewam de wina vat. “Teknolojî her ke şino, aver şino û îmkanê cuye her ke şinê zêdeyêr benê. Neslê newe nê çîyan ra tesîr benê û dayeyê wendişê kitaban keweno. La reyna zî kesê ke kitaban wanenê estê. Gama kesê ke kitaban wanenê û bi kitaban dir eleqedar benê, vînena kêfê mi zaf yeno. Nika zî seba ke xeyalê xo bi ca bîyarî, bi saetan xebityena. Ez bawer a ke ez o xeyalê xo bi ca bîyarî. Xeylêk embazê min ê ke bal û eleqeyê mi serê kitaban de zanenê, seba paştdayîş bidê mi kitaban danê mi."

 

‘Wa cinî pey xeyalanê xo de şêrê'

 

Fatma, tewr peyîn wina vat: "Berardiş û awankerdiş xozaya cinîyan de est o. Coka mi nêwaşt ez  pasîf bimanî û wazena ke karê ke ci ra hes kena bikerî. Her tim bi kitaban dir eleqedar bena. Xeyalê min o pîl akerdişê kitabroşîyêkê pîlî yo. Nika ez seba nê xeyalê xo yê gama yewin erzena. La hîn wareyan de zehmetîyan ancena. Xo sey dara goze hîs kena. Seba ke kokê dara goze xeylêk bi quwet ê û bingeyê xeylêk çîyan awan kenê. Tewr peyîn zî wazena nê vengdayîşî cinîyan rê bikerî; wa cinî qîmetê xo bizanê û hayeya înan wa hêzê înan rê bibo. Cinîyan xeylêk sînordar kenê. Lazim o cinî xo wareyê ke înan rê ameyo sînorkerdiş xo bixelisnê. Nê çî zî cinî eşkena bi xo bikero. Goreyê mi ganî heme cinî bawerîya xo, xo rê bîyarê û pey xeyal û waştişanê xo de şêrê."