Sîdra Mamo

 

ŞEHBA - Keyeyê Şehîdan ê Efrînî derheqê qirkerdişê Zaxoyî de vatî ke kurdî ça bibê, dewleta tirke hêrişê uca kena û wina vatî: "Ganî dewletê mîyanneteweyî û Rêxistinê Heqê Merdiman lezabez bi wezîfeyê xo wurzê û vernîya û vernîya suc û tedayê dewleta tirke bigîrê." Heto bîn ra keyeyan vatî, ganî dewleta tirke seba hêrişan bêro muhakemekerdiş.

 

20ê temmuze de dewleta tirke bi topan hêrişê cayê ke turîstî mendêne kerd û netîceyê hêrişî de 9 kesî ameyî qetilkerdiş û 27 kesî birîndar bî. Seba nê hêrişanê  dewleta tirke yê ke rojane mintiqa de rî danê, tehlukeyê pîlî vejenê werte. Eynî wextî de nê hêrişî Vakur û Rojhelatê Sûrîye de yenê kerdiş û xeylêk mintiqayê Pawitişê Medyaye de zî yenê kerdiş. Amancê dewleta tirke o yo ke nê mintiqayan veng bikero û seba nê zî sîvîlî hedefê aye de yê. Heta nika zî PDKyî tu reaksîyonêkê û helwestêk cidî hemverê nê hêrişan de nêdayo. Derheqê babete de Keyeyê Şehîdan ê Efrînî ercnayîş kerd.

 

'Ça de kurd bibê, hêrişê uca kenê'

 

Maya cangorîyê bi nameyê Amed û Rojhat, Hêvîn Elûşe qirkerdişê  Zaxoyî şermezar kerd û wina vat: "No serebût  û hêrişê dewleta tirke ya îşxalkere ke hemverê Zaxoyî de kerda ma bi şîdet şermezar kenê. Her tim dewleta tirke wazena ke şarê ma qirkerdişan ra derbaz bikero û hêrişê mintiqayanê ma bikero.  Dewleta tirke ça kurdî bibê hêrişê uca kena, wazena şarê kurdî werte ra wedarno. Şarê Erebî zî nê qirkerdişî qebûl nêkerd û reaksîyonê xo ramojna. La keyeyê Berzanî pêwa ke no serebût welatê ci de qewimîya zî tu helwestêk cidî nêmojna ra. No zî mojneno ke PDK zî hemkarê dewleta tirke yo."

 

'Ganî dewlete tirke bêra muhakemekerdiş'

 

Hêvîn Elûş dîyar kerd ke qirkerdişê hemverê sîvîlan sucêkê pîl o û vat: "No reya ewil nîyo ke dewleta tirke qirkerdişan hemverê sivîlan de kena. No qirkerdiş sucî merdimayî yo. Seba nê ganî  cipersayîş derheqê dewleta tirke de bêro destpêkerdiş û hesab dewleta tirke ra bêro perskerdiş. Ganî dewletê mîyanneteweyî û Rêxistinê Heqê Merdiman lezabez wezîfeyê xo bi ca bîyarê û vernîya suc û tedayê dewleta tirke bigîrê."

 

'Bicakerdişê dewleta tirke ya Îraqî yeno manaya îşxalkerdişî'

 

Zelûx Mamo zî wina reaksîyon ramojna: "No qirkerdişê ke Zaxo de bi ca ameyo, ma bi şîdet şermezar kenê. Bicakerdişê dewleta tirke ya Iraqî bi xo yeno manaya îşxalkerdişî. Sewbîna bêvengîya Mesûd Berzanî ke serê qirkerdişê Zaxoyî de yeno manaya hemkarîya PDKyî ya bi dewleta tirke dir. Seba kesê ke qirkerdiş de şehîd bîyê ereb ê, şarê Erebî helwest û nêrazîbîyayîşê xo mojnayî, la heta nika Mesûd Berzanî tu eşkerayîyêke bi helwest nêmojnayo ra."

 

'Ganî wareyê hewa vernîya dewleta tirke rê bêro girewtiş'

 

Zelûx Mamo venga şarê Başûrê Kurdistanî kerd û wina vat: "Hemverê nê hêriş û binpaykerdişê dewleta tirke yê serê mintiqaya Başûrî Kurdistanî û heme herêmê ma, ganî şarê ma uca de bêveng nêmano û serê payan de bo. Sewbîna ganî cematê mîyanneteweyî helwestêk rast hemverê nê serebûtî de ramojno. Ganî wareyê hewayî vernîya dewleta tirke de bêro girewtiş. Seba ke dewleta tirke sucê merdimayî kena."