Dîlan Babat

 

ANQARA - Endama EŞÎKî Berrîn Sonmez qerarê 10ine Daîreyê Şûrayî yê Dewlete ke derheqê Pêkerdişê Stenbolî de dabi ercna û vat: "Şûraya Dewlete senîn vat, 'qerarê serekkomarî teberê kontrolê hukmî yo' dima, rejîmê dîktatorî rê zemîn awan kerd. Seba partîyê sîyasî zî pêşnîyaz kena çarçewaya xebatê weçînayîşî de derheqê Peymana Stenbolî de bruşorê 12 game ke ameyê amadekerdiş, vila bikerê.

 

Serekkomarê AKPyî Tayyîp Erdoganî 20ê Adara 2021î de Peymana Stenbolî fesh kerd û dimayê nê bi desan rêxistinê cinîyan û komelê sîvîlî baroyan seba vindarnayîşê qerarî, muracatê Şûraya Dewlete kerdî. Muracat 28ê Nîsane û 7-14 û 23ê Hezîrane de ame vînayîş. Dimayê dewayan 10ine Daîreyê Şûraya Dewletî 19ê Temmuze de 38 rîpel weşana û vat, 'qerarê serekkomarî nêeşkeno bêro muhakemekerdiş' û qerarê antişê Peymana Stenbolî tesdîq kerd. Nê ser de cinî her çar hetê Tirkîya vejîyayî kuçeyan û mesajê wayîrvejîyayîşê Peymanî dayî.

 

Endama Platformê Seba Cinîyan ê Têduştî (EŞÎK) Berîn Sonmez derheqê babete de qisey kerd.

 

 ‘No qerarêkê seretewênayîşî yo'

 

Berrîne dîyar kerd ke qerarê Şûraya Dewlete, ‘qerarê serekkomarî teberê kontrolê muhakeme yo' û vat: "Serekê Daîreyî çar roniştişê ke ameyê vînayîş de serê nameyê serekkomarî de pawitiş kerdo. Şûraya Dewlete hemverê îqtîdarî de sere tewênayo. 10ine Daîreyê Şûraya Dewlete de 10 huqûqnasî estê. 5 huqûqnasî hemverê rêxistinê cinîyan de Peymana Stenbolî de îdiayan danê werte û benê hempar. Di dozgerî, dadgerêk û di dadgehî ma di eynî fikrî de yê. Înan zî vatêne, qerar bêhuqûqî yo û ganî bêro betalkerdiş. Ganî goreyê na hûmare ma serbikewtêne. La ame redkerdiş."

 

‘No qerarêkê hemverê ameyoxê Tirkîyaye yo'

 

Berrîne wina dewam kerd: "No qerar derheqê ameyoxê Tirkîya de ameyo dayîş. No qerar yeno manaya ke sîstemê yew camerdî, tesdîq kerdo. Peymana Stenbolî heqê cinîyan, tutan, multecîyan û kal û pîran da werte. Têduştî pawit. Seba nê zî hemverê nê vejîyayî. Qerarê Daîreyê Şûrayî yê Dewlete mojna ke her çî qedîya yo."

 

Peymane dewam de ya

 

Berîne wina bale ant serê peymane û vat: "Proses derg o. Sewbîna qanûnê 6251 yê peymana Stenbolî tesdîq kerdo zî hema dewam de ya.  Nêeşkenê qanûn wedarnê. 90in maddeya Desturê Bingehîn de peymane parçeyêkê huqûqî ya. Roniştişo ameyo vînayîş de avûkatanê dewa, dîyar kerdî ke  serekkomar nêeşkeno peymane bi yew qerarî wedarno. Peymane yew metnê huqûqî yê heqê merdiman a. Heme referansê heqê merdiman esas ameyê girewtiş û peymane wina ameye nuştiş. Qerarê Şûraya Dewlete çi heyf şîdet hewêneno û şîdet teşwîq keno."

 

'Wa broşurî bêrê vilakerdiş'

 

Berrîne dîyar kerd ke dimayê qerarê  Şûraya Dewlete çalakî bêrêxistin ameyê kerdiş û vat: "Çalakîya cinîyan do plankerde dewam bikero. Her kes cayê xo ganî seba Peymane têkoşîn bikerê. Keye, sûke, kuçeyan, parkan de bi vatişê xo peymane bipawê. Bruşorê ma yê derheqê peymane de yo ’12 gamî’ estê. Wa nê bêrê vilakerdiş. Ganî partîyê sîyasî zî xebatanê weçînayîşî de nê broşuran vila bikerê. Ganî cinî têkoşînê xo bikerê. Ganî cinî bi destê xo peymane bîyarê, kesî rê nêverdê."