RIHA - Keyeyê Şenyaşar ke Nobeta Edaletî dewam kena û nê mesajî da: "Mîyanê mekanîzmayê edaletî de ma bi bêedaletîyê tewr pîlî rî bi rî mendî. Dozgerî ke hesabê qetlîamî bipirso çin o."

 

Nobeta Edaletî ya Emîne Şenyaşar û lajê ci Ferît Şenyaşar (Keyeyê Şenyaşarî) verê Dadgeha Rihayî de 9ê Adare 2021î ra dewam kena, roja 506ine de dewam kerd.

 

Keye, sey her roje ewro zî keyeyê xo yê qezaya Pirsûsî ra ame verê Dadgeha Rihayî û dest bi nobete kerd.

 

'Edaletê nê hukmatî çin o'

 

Emîne Şenyaşare nobete de qisey kerd û vat, 2 serrî yo ê verê Dadgeha Rihayî de pabeyê edaletî yê û vat: "Edaletê nê hukmatî çin o. Bi serran o lajê mi mîyanê zereyê hucreyî de yo. Mi tutê xo kerdî binê herrî. Serrêke û nîm o sey binê erdî de bî. Ez pabeya ke lajê mi Fadil bireso azadîya xo. ŞExsê ey de ez seba her kesî edalet wazena. Gelo çira keyeyê mi ame qetilkerdiş? Heta ke edalet bi ca nêro, ez tîya ra nêşina."

 

'Do rojêke no zulm biqedîyo'

 

Heto bîn ra keyeyê serê hesabê xo yê Twitterî de mesajêkê pare kerd û vat: "Mîyanê mekanîzmayê edaletî de ma bi bêedaletîyê tewr pîlî dir rî bi rî mendî. Nêweşxaneyê Dewlete ya Pirsûsî de qetlîam ame kerdiş. Dozgero/a ke hesabê qetlîamî bipirso çin o/a. Helbet do rojêke no zulm biqedîyo."