KOBANÊ - Derheqê tehdîd, hêriş û hedefgirewtişê cinîyê siyasetmedarî yê Vakur Rojhelatê Sûrîye û Şarê Kurdî Hemsereka Meclîsê Qanûnsazî yê Mintiqaya Firatî Fewiza Ebdî dîyar kerd ke aye hêrişê dewleta tirke ya serê Mintiqa de sey girewtişê heyfê DAÎŞî ercnenê û vat: “Hêrişî her wext bîyî la dimayê kombîyayîşê Tehranî hêrişê serê Rojawanî de tewr zêde bi. Vernîya ê wextî zî dewleta tirke vat, ê do hêrişê Rojawanê Kurdistanî bikera û îşxal bikera. Yanî stratejîyê xo yê îşxalkerdişî her tim wazena hîra bikera.”

 

Hêrişê dewleta tirke yê serê Vakur û Rojhelatê Sûrîye dewam kenê. Bi hêrişan dir cinîyê siyasetmedarî, tutî, merdimê emr pîlî pêro hedefê înan de yê. Derheqê hêrişan de Hemsereka Meclîsê Qanûnsazgehî ya Mintiqaya Firatî Fewiza Ebdî ercnayîş kerd.

 

'Bi çend serrî yo her rewşe bi nê rengî derbaz bena’

 

Fewiza destpêkê qiseykerdişê xo de qalê rayîr û metodê hêrişê dewleta tirke kerd û wina vat: "Xora mintiqayê ma de hedefgirewtişê kesê ke wareyê leşkerî, sîyasî û sîvîl de yê dewam keno. Kesê ke Asayîş de kar kenê zî benê hedef. Bi xususî hêrişê serê mintiqayê ma yê serê sînorî de yenê kerdiş. 2012ine ra heta roja ma ya ewro na mintiqa tu wext hizûr nêdî û bi hêrişan dir şehadet virazya. Bi çend serrî yo her rewşe bi nê rengî şina. Pêwa Îdarekarîya Xoserî destê xo yê aştîye dergê derûdorê xo kerd zî la reyna hêrişî dewam kerdî."

 

'Dimayê kombîyayîşê Tehranî de hêrişê serê Rojawanî tewr zêde bî’

 

Fewiza dewam de wina qal kerd: "Ma tu wext nêwazenê kesî dir şer bikerê, la demo ke şer serê mi de bêro, ez mecbûr a pawitişê xo zî bikerî. Demê peyîn de zî hêrişî zêde bîyê. Roje de cinîyêke yena qetilkerdiş. Bi nê hêrişan wazenê vajê ke şima tim hedefê min de yê. Hêrişî her tim bîyê la dimayê Tehranî hêrişê serê Rojawanî tewr zêde bî. Verê nê demî zî dewleta tirke vat, do hêrişê Rojawanê Kurdistanî bikero û îşxal bikero. Yanî stratejîyê xo yê îşxalkerdişî tim wazena hîra bikera.”

 

'Têkoşînê ma tewr pîl beno’

 

Fewiza vat, dewleta tirke binê kirîzan de menda û vat: "Dewleta tirke nika xeylêk kirîzan ra derbaz bena. Krîzê ekonomî, sîyasî estê. A nika ver bi weçînayîşî şina. Êdî peynîya seserra Hempeymana Lozanî zî yena. Erdogan wazeno ke wexto ke şêro weçînayîşan bi serkewtiş şêro. Wazeno vajo, ha mi serê sînorê xo asayîş û hîra kerdo. Seba nê zî wazeno kirîzê xo yê zerrî binimino û teberî virazno. Wazeno raştîyan şarî ra binimino. Hempeymanê Lozanî seba ke 2023ine de peynî beno, dewleta tirke wazena ke serê masa de vajo ma sînorê Mîsaki Mîlî pawenê. Xeylêk amancê dewleta tirke estê. Seba bireso amancê xo zî cinîyê sîyasetmedarî yê sey Hevrîn Xelef, Zehra Berkel kerdî hedef. Nê dir waşt zorê îradeyê ma bero, la têkoşînê ma tewr zêde beno.”

 

'Ma do tim serê rayîrê şehîdan de bê'

 

Fewiza tewr peyîn qiseykerdişê xo de mesajêkê wina da: "Ma do her tim serê rayîrê şehîdanê xo de bê û fek dewaya embazanê xo yê şehîdan ra vera nêdê.”