AMED - Çalakîya "Nobeta Edaletî" ya keyeyê tepişteyan verê Zîndanê Amedî de ewro ameye kerdiş. Keyeyan venga peynîkerdişê zulmî kerd.

 

Keyeyê tepişteyan seba tepişteyanê nêweşan û tepişteyê ke veradayîşê înan ameyo taloqkerdiş, seba bêrê veradayîş Amed de çalakîya "Nobeta Edaletî" roja 260ine de dewam kerdî. Keyeyê tepişteyan çalakîya xo ya ewro verê Zîndanê Amedî yê Tipa Dyî de kerdî. Endam û îdarekarê Komeleya Paştdayîş û Paştdayîşê Keyeyan ê Tepişteyan û Hikumwerdoxan (TUAY DER), Komeleya Yewîya Kultur Paştdayîşî û hetkarîya bi kesê ke Dergûşê Şaristanîyî de Merdimanê xo vînî kerdê (MEBYA-DER), Komeleya Cigêrayîşê Kultur û Ziwanê Mezopotamyayî (MED-DER), Îdarekarê Partîya Mintiqaya Demokratîk (DBP) û Partîya Demokratîke ya Şaran (HDP) yê Amedî zî paştdayîş dayî çalakîya keyeyan.

 

'Ma nê zulmî qebûl nêkenê’

 

Çalakî de ewilî waya tepişteyê nêweşî Hamdusena Ada, Reşahat Ada qisey kerd. Reşahat dîyar kerd ke pêwa hende mengî pey xo de verdayê zî partîyê sîyasî ke sozê paştdayîşî dabî înan bi ca nêardê û heta nika selahîyetdarê dewlete zî waştişê înan qebûl nêkerdo û çareserîyêrêkê nêvînayo.

 

Reşahate, tewr peyîn wina vat: "Êdî wa tedayê serê tepişteyan peynî bibê. Tepişteyê nêweşî nêrê dermankerdiş û pêwa ke cezaya înan qedîyaya zî tepişteyî nênê veradayîş. Poşmanî serê tutanê ma de  ferz kenê. La tutê ma dewaya xo de poşman nêyê. Heta gonî ganê ma de bibo, ma do pey dewaya înan de bê. Êdî bes o wa cenazeyî zîndanan ra nêvejîyê. Tepişteyê bi nameyê Nuar Kaymaz, Behçet Bayhan, Selahattîn Aslan, Arîf Onkol ameyê surgunkerdiş. Ma nê zulmî qebûl nêkenê. Êdî bes o. Tepişteyanê ma sirgûnê bajaranê dûrî kenê. No zî zulm o serê keyeyan de.”

 

Dayika tepişteyê Azîz Tufan, Yesûre Tufan zî qisey kerd. Yesûre dîyar kerd ke 4 tepişteyî sirgûnê bajaranê dûrî ameyê kerdiş û vat: "Ma nê zulmî qebûl nêkenê . Êdî bes o. Sirgûnkerdişê tutanê ma zî zulmê serê keyeyan de yo.”

 

Çalakîya keyeyan bi berzkerdişê sloganê, "Biciwîyo xoverdayîşê zindanan” û “Heq huqûq edalet" peynî bî.