Sema Çaglak

 

ŞIRNEX - Îdarekara HDPyî ya Cizîre Songul Kuçuk vat ke nêzdîbîyayîşê hemverê Salîha Aydenîz nêno qebûlkerdiş û vat: "Îqtîdarê AKP-MHPyî sîstemê hemserekî ra bêzar o coka hêriş keno.” Îdarekara MED TUHAD-FEDyî ya Cizîre Meryem Eşkara zî da zanayîş ke îqtîdar hêz û îradeyê cinîyanê kurdan ra terseno û nêwazeno ke cinî sîyaset de aver şinê.

 

Komîsyonê Têkel ke hetê Komîsyonê Edaletî û Makeqanûn ra ameyo awankerdiş, derheqê 5 fezlekeyê derheqê Hemsereka Pêroyî ya Partîya Mintiqaya Demokratîke (DBP) û Parlamentera Amedî Salîha Aydenîze de kom bî û qerar da ke destnêdayîşê Salîhaye bêro wedaritiş. CHP û Partîya Demokratîke ya Şaran (HDP) şerh dayî serê raporê hetê komîsyonî ra ameyo amadekerdiş û bi no hawa pêşkeşê Heyetê Pêroyî yê Meclîsî ame kerdiş.

 

Reaksîyon û nêrazîbîyayîşê hemverê qerarê wedaritişê destnêdayîşê Salîha dewam keno. Îdarekara Partîya Demokratîke ya Şaran (HDP) ya qezaya Cizîre Songul Kuçuk û Aktîvîsta Tevgerê Cinîyan ê Azadan (TJA) û îdarekara Federasyonê Komeleyê Paştdayîşê Huqûqî yê bi Keyeyê Tepişteyan û Hikumwerdoxan ê Medî (MED TUHAD-FED) ê Cizîre Meryem Eşkara derheqêq babete de ajansê ma rê qisey kerd.

 

‘Hêrişê nasnameyê cinîya kurde kerdî' 

 

Meryeme, destpêkê qiseykerdişê xo de qeraro ke ameyo dayîş şermezar kerd û vat: "Seke şima zî zanê 12ê Hezîrane de Stenbol de hemverê tecrîdî rayîr ra şîyayîşêkê amebi organîzekerdiş û polîsan hêrişê parlementeran kerdibi. Salîha Aydenîze zî uca de xopawitişê xo kerd. Labelê selahîyetdaran nê çî xo rê kerdê bahane û hemverê Salîha Aydenîze de xebitnayî. Wexto ke sîyasetmedarê kurdî çalakîyêke bikerê, her tim bi hêrişan dir rî bi rî manenê. Hêrişê hemverê Salîha hêrişê hemverê Şarê Kurdî yo, hêrişê hemverê nasnameyê cinîya kurde yo û hêrişê hemverê îradeyê siyasetê kurdî yo.”

 

‘Sîstemê hemserekî hedef ame girewtiş’

 

Meryeme, dewam de wina vat: “Îqtîdarê AKP-MHPyî û hemkarê ci bi hawayêke bêhuqûqî û bêexlaqî bi lezabez waştî ke parlamenterîya Salîha Aydenîze betal bikerê. Bi hawayêke kêfî zî nê fezlekeyî amade kerdî û netîce de qerarêkê bêhuqûqî vejîya werte. Ma sey cinîyê kurdî nê qerarî nas nêkenê. Salîha Aydenîze eynî wextî de îradeyê sîyasetê kurdî û têkoşînê cinîyan ê kurdan a. Ê hêrişî de sîstemê Hemserekî zî hedef ame girewtiş. Îqtîdarê AKP-MHPyî sîstemê hemserekî ra bêzar o coka hêrişê xo bi her şiklî keno. Nêwazeno ke o sîstem mîyanê sîyasetê Tirkîya de vila bibo. Bêguman têkoşînê ma yê cinîyan zî hemverê nê zîhneyetê pederşahî û yê ke îradeyê cinîyan qebûl nêkeno dewam bikero.”

 

‘Ma do hemverê nê qerarî têkoşînê xo pîl bikerê’

 

Meryeme, wina qiseykerdişê xo qedêna: “Îqtîdar bi tu şiklî nêeşkeno têkoşînê cinîyanê kurdan bido vindarnayîş. O çiqas hêrişê xo zêdeyêr bikero, do cinîyê kurdî zî hemverê ci de têkoşînê xo tewr pîl bikero. Îqtîdar zano ke sîyasetê cinîyanê kurdan seba akerdişê vernîya sîyasetê demokratîke gamêke yo coka her tim hêrişê xo zêdeyêr serê cinîyanê kurdan de keno û înan keno hedef. Kîlîdê sîyasetê demokratîke û cuyêka têduşt destê cinî de yo. Ma zî a bawerî de yê ke cinî do têkoşînê xo yê hemverê nê sîstemê yewperest û cinsperest pîlêr bikero.”

 

‘Hêzê cinîyanê kurdan ra tersenê’

 

Songul Kuçuk zî wina qal kerd: “Bi xususî hemverê cinîyanê kurdan de hêrişê ke yenê kerdiş, hemverê sîyasetmedarê bînan de 3 qatî zêdeyêr o. Wexto ke Salîha Aydenîze pawitişê xo kerd, o memur ferq de nêbê ke hêrişê hemverê parlementere û Hemsereka Pêroyî ya DBPyî keno? Polîs ê cesaretê hêrişkerdişî çara gêno. Çira pêro sîyasetmedarê cinî yê kurdî zîndan de yê? Hêz û îradeyê cinîya kurde ra tersenê. Nêwazenê cinî komel de û sîyaset de aver şêrê. Coka her wext hêzê xo hemverê cinîyan de kenê.”