Marta Somek

 

STENBOL - Tepişteya nêweşe Ayfer Çîçek ke dermanê aye nînê dayîş, mesajê ke ajansê ma rê şawit de da zanayîş, dimayê ke xebere ameya viraştiş û reaksîyonê rayapêroyî ra dermanê ci ameyê dayîş.

 

Goreyê dayeyê ÎHDyî 651 ci ra giran, bi pêroyî hezar û 517 tepişteyê nêweşî estê. Binpaykerdişê heqan ê zîndanan her ke şinê zêde benê û bi taybetî prosesê peyîn de întîxar û merdişê biguman zêde bîyê. Hema hema her hewte agahiya mergê tepişteyêk/tepişteyêke yeno/yena û sewbîna bi raporê ATKyî ke seba tepişteyanê nêweşan yeno dayîş û yeno vatiş ke eşkenê tepişte bimanê zî tepişteyî terkê mergî yenê kerdiş. Tepişteya bi nameyê Ayfer Ayçîçeke zî yew tepişteya nêweşa giran a ke bi serran o binê tecrîdî de ya.

 

Cigêrayîşê zitî û îşkence

 

Ayfere 2007ine de Edene de yena tepiştiş û goreyê dayeyê ÎHDyî Ayfer yew tepişteya nêweşa giran a zîndanê Marmarayî ya. Ayfere bi îdiayê endemîya rêxistine ameye muhakemekerdiş û 22 serrî û 11 mengî ceza ci rê ameye birnayîş. Ayfere nika Zîndanê Tîpê Myê Cinîyan ê Gebzeyî de tepişte ya. Ayfere prosesê tepiştişî de xeylêk rey bi îşkence û desteştişî dir rî bi rî mende. Ayfere ke 8 mengî tena hucreyê yew kesî de ameye tepiştene, surgunê xeylêk zîndanan ameye kerdiş û her cayî de zî binpaykerdişê heqî ciwîyaya.

 

Dewa ci rê ameye akerdiş

 

Ayfere seba şertê zîndanî problemê psîkolojîkî ciwîyaya û prosesê zîndanê Alanyayî de weşîya aye nêbaş bî û bi sûcdarîyê ‘zirar daya malê îstîmlakî’ dewa ci rê ameye akerdiş. Dima ra surgunê zîndanê Cinîyan ê Gebzeyî ameye kerdiş û mengêke û nîm Nêweşxaneyê Cigêrayîş û Perwerdeyî yê Sînîr û Weşîye Rûhî yê Bakirkoyî de ameye dermankerdiş. Ayfere uca de xeylêk binpaykerdişê heqan ciwîya. Ayfere demêkê bîn mecbûr mende dermanan bi xebitno û bi moral û motîvasyonê embazanê xo serê lingan de mende. Sewbîna Ayfere qet muracatê ATKyî zî nêkerd.

 

Cezaya dîsîplînî

 

Ayfere şertê zîndanî ra na nêweşîye kewte û di serrî û nîm antîdepresan şuxulna û pêwa nê 4 dermanê bînan zî şuxulna. Tepişteyê ke na rewşe de yê ganî bi tu hawa tepişte nêmanê. Ayfere 22yê Temmuze de mesajêke şawit ajansê ma û vat, memûrê zîndanî vanê ke verê çimanê ma de derman bore. Ayfere ke nê caardişî qebûl nêkerd, dermanê ci nêdayî û îşkenceyê psîkolojîkî ci rê kerdî. Ayfere dîyar kerdibi ke seba verê memûranê zîndanî de dermanê xo nêwerda, di mengî cezaya dîsîplînî dayê ci. Ayfere reyna mesaj şawit û dîyar kerd ke dimayê xebera ke ajansê ma viraşta, seba awanbîyayîşê reaksîyonê rayapêroyî dermanê ci ameyê dayîş û seba ajansê ma sipasîyê xo kerd.