ANQARA - Bi wesîleya 8ine serrgêra Qirkerdişê Êzidîjan, Komîsyonê Avûkatanê Dewaya Qirkerdişî ya Anqara eşkerayîyêke da û vat: “Dadgehe û otorîter çiqas hewl bidê bibê asteng zî do pêro faîlî û terefdarê înan rojêke hesab bidê.” 

 

Komîsyonê Avûkatanê Dewaya Qirkerdişî ya Anqara yê 10ê Teşrîna Verêne bi minasebetê 8ine serrgêra  Qirkerdişê Êzidîjan ê DAIŞî ke 3yê Tebaxa 2014ine de Şengal de kerd, eşkerayîyêke nuşteyî da.

 

Eşkerayîye de ame vatiş ke DAIŞî qirkerdiş de bi hezaran êzidî qetil kerd û nê çî ameyî parekerdiş: “Bi teda û zorî koletîyê cinsî cinî û kênayanê êzidîjan rê ame ferzkerdiş. Bi des hezaran êzidî ameyî koçberkerdiş û bi hezaran zî bi komî înfaz kerdî. Komîserîyê Berzî yê Heqê Merdiman ê Neteweyê Yewbîyayeyî (NY) raporê xo de vat ke bi hawayêke plankerde sûcê qirkerdişî ameyo kerdiş. Komîteyê Edaletî yê Êzidîjan zî raporê xo yê 6ê temmuza 2022ine de eşkera kerd ke Iraq, Sûrîye û Tirkîya de seba vernîgirewtişê nê qirkerdişî îmkanê xo şuxulnayê. Na rewşe heta roja ma zî dewam kena.

 

3yê tebaxa 2018ine de dewaya sereyîn ê Qirkerdişê Anqarayî yê 10ê Teşrîna Verêne de qerar ame dayîş ke versûcî sûcê vera merdimayî de bêrê muhakemekerdiş. Dadgeha Berze zî no qerar tesdîq kerd la beno ke nê sûcî ra nêrê muhakemekerdiş. Dadgeha Berzî tewr peyîn zî qerar da ke versûcî  ‘sûcê vera merdimayî’ ney seba ‘binpaykerdişê sîstemê makeqanûnî’ bêrê muhakemekerdiş. Dadgehe û otorîte çiqas hewl bidê bibê asteng zî, do pêro faîlî û hetkarê înan hesab bidê. Ma pêro qurbanîyê qirkerdişî bi rêzdarî anê xo vîr.