AMED - 6ê tebaxe de Amed de mîtîngê “Çareserî ma yê, şer û îşxalkerdişî rê ney” yeno organîzekerdiş. Endamê Meclîsê Dayîkan ê Aştîye ya Amedî venga tewrbîyayîşê mîtîngî kerd û vatî: "Hemverê zulm û tedayan ma do Wareyê Îstasyonî de bê.”

 

Partîya Demokratîke ya Şaran (HDP) 6ê tebaxe de Amed de, 7ê tebaxe de zî Stenbol de bi sloganê “Çareserî ma yê, şer û îşxalkerdişî rê ney” organîze bikerê, mesajê xo bidê. Mîtîngo ke do Amed de bêro organîzekerdiş, do Meydanê Îstasyonî yê Yenîşehirî de bêro kerdiş û Hemserekê Pêroyî yê HDPyî Mîthat Sancar û Hemsereka Pêroyî ya Partîya Mintiqaya Demokratîke (DBP) Salîha Aydenîz tewrê mîtîngî bibê. Seba mîtîngî mintiqayan de tewrbîyayîşê 20 parlamenterê HDPyî xebatî yenê kerdiş.

 

Endamê Meclîsê Dayîkan ê Aştîye ya Amedî venga tewrbîyayîşê mîtîngî kerdî û fikrê xo ajansê ma rê ardî ziwan.

 

Afîfe Kartal endama Meclîsê Dayîkê Aştîye ya wina qal kerd: "Seba aştîye hemverê şerî de meydanê mîtîngî de kom bibê. Ez venga Amedijan kena ke meydanê mîtîngî veng nêverdê. Şewe û roje teyareyê şerî koyanê Kurdistanî bombavaran kenê. Keyeyê şarî rijnayî, tutanê înan kiştî. Ma êdî nêwazenê dayîkî bibermê.”

 

'Seba pereyî herra xo roto’

 

Afîfe, bale ant serê hemkarîya Partîya Demokrate ya Kurdistanî (PDK) a bi Tirkîya dir û vat: "Mesût gelo qet şerm nêkeno, seba pereyî xo û herra xo roto? Wa Mesûd Barzanî nêvajo ez kurd a. Tena seba berjewendîyê xo têgêrenê. Wa destê xo serê tutanê ma ra bianco. Her cayê Kurdistanî de qereqolî ameyî viraştiş. Ma venga Barzanî kenê ke wa fek şerî ra vera bido.”

 

'Nê welatî de zilm û teda zêde bîyo'

 

Endama meclîsî Nafiye Kartal zî wina bale ant serê mîtîngî: "6ê tebaxe de seba aştîye mîtîngêk yeno organîzekerdiş. Her kes zano ke nê welatî de teda û zilm zêde bîyo. Sewbîna seba kurdan zî her tim şer est o. Seba nê sebebî ganî sere de kurdî beşdarê mîtîngî bibê. Ez sey dayîkêke hemverê şerî vejêna. Ma venga dewlete kenê û vanê êdî bes o!"

 

'Tecrîd tesîr serê ma hemine de keno'

 

Nafîye, tewr peyîn wina qalê tecrîdî kerd: "Şima zî zanê Îmrali û zîndananê bînan de tecrîdêkê pîl est o. No tecrîd tesîr serê ma hemîne de keno. Ez sey dayîkêke wazena wa no şer vindero. Seba nê sebebî ma do 6ê tebaxe de Meydanê Îstasyonî de bê.”