Nîşmîye Guler

 

STENBOL - Goreyê dayeyê ma serê çapemenîye û çapemenîya komelî de arêdayî, menga temmuze de 31 cinî û 4 tutî hetê camêrdan ra ameyê qetikerdiş û 12 cinî û 5 tutî zî bi guman dinyaya xo bedelnayê.

 

Menga temmuze de zî şîdetê camêrdan dewam kerd û 31 cinî ameyî qetilkerdiş û 12 cinî zî bi guman dinyaya xo bedelnayî. Menga Hezîrane de zî 31 cinî amebî qetilkerdiş. 

 

Çeteleyê ma de menga temmuze ra dima, ma şîdetê dewlete bi sernameyê cîya gênê bi dest.

 

Dadgeha Berzî qerarê derheqê Peymana Stenbolî de

 

Serekkomarê AKPyî Tayyîp Erdogan 20ê Adara 2021î de Peymana Stenbolî fesh kerd û dimayê nê bi desan rêxistinê cinîyan û komeleyê sivîlî û baroyan seba vindarnayîşê qerarî miracatê Şûraya Dewlete kerdî. Muracat 28ê Nîsane û 7-14 û 23ê Hezîrane de bi roniştiş ame vînayîş. Dimayê dewa 10ine Daîreyê Şûraya Dewlete 19ê Temmuze de 38 rîpel weşana û vat, ‘qerarê serekkomarî nêeşkeno bêro muhakemekerdiş’ û qerarê antişê Peymana Stenbolî tesdîq kerd. Serê nê de cinî her çar hetê Tirkîya de vejîyayî kuçeyan û mesajê wayîrvejîyayîşê Peymane dayî.

 

Destnêdayîşê Salîha Aydenîze ame wedaritiş

 

Komîsyonê Edaletî û Makeqanûnî 5 fezlekeyî derheqê Hemsereka Pêroyî ya Partîya Mintiqaya Demokratîke (DBP) û Parlamentera Amedî Saliha Aydenîze ser o kombîyayîş kerd û qerar da ke destnêdayîşê Salîha bêro wedaritiş. Partîya Şaran ya Komare (CHP) û Partîya Demokratîke ya Şaran (HDP) şerh dayî serê raporê ke hetê komîsyonî ra ameyo amadekerdiş û bi no hawa pêşkeşê Heyetê Pêroyî yê Meclisî ame kerdiş. Goreyê Rêznameyê Zereyî yê Meclisî, seba kombîyayîşê Meclisî çi babete sey sebeb amebi mojnayîş, kombîyayîş de a babete yena munaqeşekerdiş û Meclîs dima ra yeno padayîş. Eke koma AKP-MHPyî seba roja bîn waştişê xebate bikero, o wext do mimkun bo ke seba munaqeşekerdişê wedaritişê destnêdayîşê Salîhaye pêvînayîş bêro kerdiş. AKP, MHP û HDPyî da zanayîş ke do beşdarê pêvînayîşan nêbê û partîyê bînî yê Meclisî zî neqlkerdibî ke do tewrê Heyetê Pêroyî yê Meclisî bibê. CHP vernîya venga kombîyayîşê awarte bikero, bi HDPyî dir nêşewiryabi û HDPyî zî nê sey “Bêihtiramiyê siyasî” ercna û qerar da ke tewrê pêvînayîşan nêbo.

 

31 cinî ameyî qetilkerdiş

 

Menga temmuze de 31 cinî hetê camêrdan ra ameyî qetilkerdiş û reyna cinî hetê camêrdê ke nêzdîyê înanê ra ameyî qetilkerdiş. Goreyê nê zî 8 cinî hetê camêrdê ke înan dir zewicnayeyê, 7 tenî hetê camêrdê ke sewîyeya veradayîşî de bî, 4 cinî hetê camêrdê ke nas kerdêne ra, 3 tenî hetê camêrdê ke fek vera dabî, 2 tenî hetê camêrdê ke fek vera dabî, 2 tenî hetê birayê xo ra, yewe hetê merdimê xo ra û yewe zî hetê cîranê xo ra ameye qetilkerdiş. Cinîyêke zî nêame tespîtkerdiş hetê kamî ra ameya qetilkerdiş. Sewbîna 12 cinî zî bi guman dinyaya xo bedilnayî.

 

Stenbol rêza yewine de yo

 

Stenbol de 8, Îzmîr de 3, Mugla de 2, Denîzlî de 2, Konya de 2, Yozgat de 1, Mersîn de 1, Balikesîr de 1, Muş de 1, Eskîşehîr de 1, Kirşehîr de 1, Amed de 1, Erzîncan de 1, Amasya de 1, Anqara de 1, Afyonkarahîsar de 1, Bursa de 1, Isparta de 1 ameye qetilkerdiş. Sewbîna na menge de 4 tutî ameyî qetilkerdiş û 5 tutî zî bi guman dinyaya xo bedelnayî. 8 tutî zî rastê îstîsmarê cinsî ameyî.