Melîke Aydin

 

ÎZMÎR - Seba krîzê ekonomî ke hêzê girewtişê welatijan kewto, bazarê kanî tercîh kenê. Esnafê bazarê kanî zî dîyar kerdî ke krîzî tesîr serê înan de zî kerdo û vatî, kesê ke berardişê kanan tîya ra gênê mexazeyanê xo de reyna roşenê.

 

Pazaryerî yê Konakê Îzmîrî de her roja yewşeme saetê serê sibayî de bazaro kan awan beno û bazar de cil û belgan ra bigîrê heta firaqan, hacetê keyeyî ra  bigîrê heta pêkayan xeylêk berardişê kanî serê tezgahan de yenê rotiş. Seba krîzê ekonomî ke hêzê girewtişê welatijan kewto, bazarê kanî tercîh kenê.

 

Cinîyê ke bazar de bî, mîkrofonê ma rê qisey kerdî.

 

Êdî berardişê marka nênê vînayîş

 

Gulere ke nêwaşt peynameyê xo bido û 17 serrî yo bazar de şuxulêna, dîyar kena ke her hetî ra merdimî yenê bazarê kanî û wina vat: “Ez bazarê Hatay, Îne û Bostanli de zî rotiş kena. 7-8 serrî verê mi markayêkê namdar rotêne. Malê ci bi kalîte bî û rew ameyîne rotiş. Ma nika ê malan nêvînenê. Verê yê ke dayîne, xeylêk zêde bî û la nika nêdanê. Nika ma dikanê  antîka yê embazan yan zî xurdewanan ra gênê û roşenê.”

 

Zabita her tim problem o

 

Gulere dîyar kerd ke bi zabiteyan dir zî probleman ciwîyenê û wina vat: “Ez tezgahê xo bi hawayêke nîzam dana ro. Seba ke însanan bêzar nêkerî, wina kena. Bi 17 serrî yo ez nê karî kena, eke însanî nêgîrê, mi do senîn abikerdêne?”

 

‘Însanî êdî çîyêkê nêgînê’

 

Fatma Turut zî 15 serrî yo bazarê kanî de esnafî kena wina vat: “Tay rojan karê ma beno, tay rojan zî nêbeno. Ma bi qezencê tîya, lazimîyê xo gênê. Ma qezeyanê cîya ra ma dantêlan gênê û tîya vurnenê berardişê cîya. Keyeyê feqîrî seba mexazeyan de çî vayê, yenê tîya de tutanê xo rê gênê. Hîn yenê cilan gênê û benê serê înternetî de roşenê. Însanî êdî zêde nêeşkenê çîyan bigîrê. Zabitayî her tim ma rê benê problem. Sebebê nê zî wayîrê dikanan gerre kenê. Şar çîyêkê nêvano.”

 

Hacetê tîya erjan ê

 

Mukadder Şîmşeka 70 serrî zî mîkrofonê ma rê qisey kerd û vat: “Ez bi meaşê teqawîtbîyayîşî debara xo kena. Ez hacetê kanan hes kena. Meraqê mi vera nê zêde yo. Çîyê tarîxî û kanî tîya de estê. Verê mi de zî xeylêk estê. Ez xeylêk entîkayan ra hes kena. Entîka cayê bînan de xeylêk vay ê. Nimûne mi sindoqêke tarîxî tîya bi 150 TL girewte. La cayê bînan de mumkin nîyo ke însan nê vayî de bigîro.”