Rabîa Onver

 

COLEMÊRG - Îdarekara ÎHDyî ya Colemêrgî Pinar Kent da zanayîş ke Colemêrg û qezayanê ci de perwerde ra heta weşîye sîyaset ra heta ekonomîye her ware de binpaykerdişê heqan yeno ciwîyayîş û nê pêroyî parçeyêke polîtîkaya şerê xususî yê.

 

Bajaranê Tirkîya û mintiqa de binpaykerdişê heqan her ke şino zêde beno. Şirnex ra heta Colemêrg xeta sînor de bi serran o binê nameyê operasyonê leşkerî de zozanî yenê qedexekerdiş, dekewtişê dewan yenê astengkerdiş. Serê welatijanê mintiqa de tedayî yenê kerdiş.

 

Îdarekara ÎHDyî ya Colemêrgî Pinar Şene derheqê binpaykerdişê heqan de ajansê ma rê qisey kerd.

 

Pinare vat, Colemêrg û qezayanê ci de binpaykerdişê heqan zêde bîyê û wina vat: “Sebebê zêdebîyayîşê binpaykerdişê heqan zî polîtîkayê îqtîdarî yê. Colemêrg û qezayanê ci de binpaykerdişê dîyarkerde estê. Yê ke nênê vînayîş zî estê. Binê nameyê şerê xususî de bazirganîya şerî yena kerdiş. Bi no hawa îqtîdar hêzê xo yê asayîşî keno binê kontrolê xo.”

 

‘Eşîrî nêzdîyê îqtîdarî yê’

 

Pinare dîyar kerd ke weşîye ra bigî, heta perwerde û ekonomîye binpaykerdişê heqan zêde bîyê û wina vat: “Dewlete seba polîtîkayê şerê xususî hîn makanîzmayan pawena. Nê mekanîzmayî çî yê? Qoricîtî û eşîrê. Seba ke eşîrî nêzdîyê îqtîdarî de yê binpaykerdişê heqan zî zêde benê. Serranê peyîn de bajarî de xeylêk binpaykerdişî babeta vatişî yê. Sere de sûcê hemverê cinîyan. Xeylêk cinî binê nameyê fuhuşî de yenê îfşakerdiş. Xeta sînorî de merdişî yenê ciwîyayîş. Şiwanî yenê qetilkerdiş. Wareyê seyran û zozanan de binpaykerdişî yenê ciwîyayîş. Heto bîn ra ma vengê cinîyan nêeşnawenê. Sewbîna merdişê ke sînor de yenê kerdiş bi polîtîkaya dewlete ra yenê meşrûkerdiş.”

 

‘Doktorî wazenê mintiqa ra şêrê’

 

Pinare wina dewam kerd: “Yew wareyêkê binpaykerdişî yenê ciwîyayîş, weşîye yo. Nêweşxaneyan de doktorî nêmendê. Doktorî nêwazenê nêweşxaneyê bajarî de bişuxilîyê û yê pisporî zaf tay ê. Doktorê ke newe ameyê tayînkerdiş, wazenê mintiqa ra şêrê.”

 

Binpaykerdişê heqê perwerdeyî

 

Pinare bale ant serê binpaykerdişê wareyê perwerdeyî û vat: “Bajar de krîzê ekonomî zî bi hawayêke giran yeno hîskerdiş. Welatî dikananê xo padanê û bajaranê bînan rê bar kenê. Qerarê qedexeyê ke yenê dayîş zî cuye kenê zehmet. No zî  binpaykerdişêkê hemverê heqê welatijan o. Yewîneyê leşkerî goreyê kêfê xo her ware de qerarê qedexeyan danê. Bajar de hewl danê ke dewletêka qije awan bikerê. Sewbîna binpaykerdişê qeyûman zî her tim dewam kenê. Colemêrg, hetê turîzmî de zî bajarêko muhîm o. La walîyê bajarî bi hawayêke kêfî qeraran dano û no zî turîzm qedêneno. Merkezê bajar û qezayanê ci de qedexeyê çalakî û bernameyan dewam kenê. Ma sey şubeyê ÎHDyî wazenê heme binpaykerdişê heqan pare bikerê û nînan bivurnê.”