Zelal Tunç

 

WAN - 7ine qetilkerdişê Ekîn Wane de, sîyasetmedara Kurde Tugba Hezer derheqê şîdetê cinsî yê serê bedenê cinî de ercnayîş kerd û vat: “O fotografo ke ame teşhîrkerdiş, bedenê cinî bi yan zî dişminîyê dewlete yê hemverê Kurdan de bi? Tu çîyêkê ke dewlete sey serkewtişî xo rê binusa çin o.  Tu hêrişî cinî û Kurdan rayîrê înan ra nêkerd.”

 

10ê Tebaxa 2015ine de Gimgimê Mûşî ke qedexeyê tebervejîyayîşê kuçeyan bajaranê Kurdan de dewam kerdêne, pêro rayapêroyî yê dinya bi şahid ke şero ke yeno kerdiş de, bedenê cinî senî yeno şuxilnayîş. Kevser Elturka YJA STARije (Ekîn Wan) ke Gimgim de bi îşkence amebî qetilkerdiş, cenazeya aye ame teşhîrkerdiş.

 

Hişmendîyê cinî emrê qijî de dest pêkeno

 

Ekîne dewa Navre ya Ebexî ya Wanî de 1986ine de yena dinya. Keyeyê aye koçê taxa Karşiyakayê Îpekyolî ya Wanî keno. Ekîne emrê qijî de bena wayîrê hişmendîyê cinî û hemverê serdestîyê camêrdan de sere wedarnena. Ekîne kitaban wanena û cigêrayîş kena. Ekîne 2008ine de verê xo dana koyan û tewrê YJA-STARî bena.

 

Ekîne dimayê têkoşînêkê 9 serran ê bi heybet, yena qetikerdiş û bedenê aye yeno teşhîrkerdiş. Cinî hemverê nê de vejîyayî meydanan û reaksîyonê pîlî mojnayî. Walîyê Mûşî eşkerayîya ewilî da û vat, na rewşe nêeşkena bêro qebûlkerdiş û vat, do cipersayîş bêro destpêkerdiş. Midûrê Emnîyetê Mûşî yê demî zî eşkerayîye ke da, hewl da ke serê îşkenceyî pado û vat, ekîbê ke Erzirom û Wan ra ameyê nê îşkenceyî kerdê. Pêwa 7 serrî mabêne ra derbaz bîyo zî hukmê camêrdan polîtîkaya xo ya bêcezaverdayîşî reyke bîn mojna ra.

 

Parlamentera HDPyî ya Wanî Tugba Hezer ke destnêdayîş û parlamenterîya aye ame wedaritiş, derheqê babete de ercnayîş kerd. 

 

‘Teşhîr destpêkê şerê neweyî bi’

 

Tugba da zanayîş ke bi teşhîrkerdişê bedenê Ekîne dir prosesê şerê newe ame destpêkerdiş û vat: “Bi 7 serrî yo serê şarê Kurdî de xeylêk nimûneyê ci ameyê vînayîş. Walîyê Mûşî yê demî eşkerayîya xo de sûc qebûl kerd la tu çîyêkê nêame kerdiş. Eksê nê serê serebûtî padayî. Xirakerdişê bajaranê Kurdan dewamîyê prosesê bi Ekîne dir dest pêkerd. Ma prosesê ke merdimî gane ameyê veşayîş ciwîyayî. Bi sîyasetê tasfîyekerdişê HDPyî dir qeyûmî ameyî tayînkerdiş, bi hezaran sîyasetmedarê Kurdî ameyî tepiştiş. Rixmê bedenê zitî yê Ekîne hîrê camêrdê ke cil û belgê sivîlî pira bîyê estbîyê. Cizîr de zî teşhîrkerdişê bedenê di cinîyan de zî camêrdo bi maske ca girewtî. Bi destê dewlete nê hêrîşî bi eşkera hemverê Kurdan de ameyîne kerdiş.”

 

‘Problemê Kurdî vindîkerdişê îqtîdarî amade keno’

 

Tugba dewam de wina vat: “Êlih de Îpek Ere hetê çawîşê pisporî Musa Orhan ra ameye tecawuzkerdiş û Îpeke ver bi mergî berd. Gama ke babete bena cinîyê Kurdî sûcî eynî yê. Musa Orhan ame veradayîş. Yew amancêkê dewlete est o; çinkerdişê Kurdan. Problemê Kurdî ke çin yeno hesibnayîş, nika vindîkerdişê îqtîdarî amade keno.Teşhîrkerdişê bedenê Ekîne zî tersê înan yê hemverê cinîyanê Kurdan bi. Îqtîdar tewr zêde cinîyê Kurdan hedef gêno. Cinîyê Kurdî tarîxê dinya de ewnîyayîşêk awan kerdo. Serkewtişê cinîyanê Kurdan bêguman çimsûrî û hêrsê înan pîl keno.”

 

Tugba qiseykerdişê xo wina qedêna: “Sîyasetê Tirkîya bi destê îqtîdarî vînî keno û sebebê nê zî seba  têkoşînê Kurdan û cinîyê Kurdan o. Ma reyna şêrê roja ke bedenê Ekîn Wane ame teşhîrkerdiş. Bi rastî çîyo ke ame teşhîrkerdiş bedenê cinîya Kurde bi? Yan zî ame teşhîrkerdiş dişminîyê hemverê şarê kurdî bi? Gelo dişminîyê hemverê cinî bi? Tu çîyêkê ke  dewlete sey serkewtişê seba xo binuso çin o. Tu hêrişî cinî û Kurdan înan rayîra nêkerd .”

 

Ma xebera xo bi cumleyêke şîîra ke Ekîn Wane rojaneya xo de nuşta, peynî kenê.

 

“Her kêna û lajêkê Kurdistanî, parçeyêkê adirî ra yê. Ê raywanê heqîqetî yê.”

 

Sembola azadiya bêdawî ne