ANQARA - Sîbel Balaç û Gokhan Yildirim bi mengan o rojeyê mergî de yê û rewşa înan her ke şina xira bena. Avûkate Ceren Yilmaze seba muvekîlê xo venga hîsgêrîye kerd.

 

Sîbel Balaç û Gokhan Yildirim yê ke bi KHKyî kar ra ameyî eştiş û çalakiya ‘ez karê xo peyser wazena’ de ameyî destbendkerdiş û bi îfadeyê şahidan ameyî tepiştiş, bi amancê binpaykerdişê vera înan peynî bibê, muhakemeyêkê adîlane bibo û tepişteyê nêweşî bêrê veradayîş, kewtibî rojeyê mergî û çalakîya înan dewam kena. Sîbel Balaçe zîndanê Sîncanî de tepişte ya û çalakîya xo roja 236ine de dewam kena û Gokhan Yildirim zî zîndanê Hûmara Yewî ê Tekîrdagî de roja 230ine de çalakîya xo dewam keno. Rewşa înan her ke şina giran bena. Sîbele hetê rayîra şîyayîşî de probleman ciwîyena û Gokan zî bi kursîya tekelêke eşkeno têbigêro.

 

Wezaret çîyêkê nêkeno

 

Rewşa her di tepişteya her ke şina giran bena. Pêwa reaksîyonê rayapêroyî, hetê wezaretê dade ra tu game nêameya eştiş. Derheqê paştdayîşî de seba Sîbel û Gokan çalakîyê paştdayîşî bi ca yenê. Avûkata Buroya Huqûqî yê Şarî Seda Şaraldi zî seba paştdayîşê muvekîlanê xo kewte greva vêşanîye ya 5 rojan. Avûkata Sîbel Balaç û Gokhan Yildirimî, Ceren Yilmaze derheqê rewşa peyîn ya muvekîlanê xo de ercnayîş kerd.

 

‘Sîbel Balaç vejîya 45 kîloyan,  Gokhan Yildirim zî vejîya 41î’

 

Cerene dîyar kerd ke muvekîlê aye Sîbel û Gokhan bi aşman o rojeyê mergî de yê û rojêke verê şîya serdayîşê Sîbele û vejîyaya 45 kîloyan. Cerene derheqê rewşa înan de wina vat: “Wexto ke Sîbele kewte rojeyê mergî 85 kîlo bî. Nika lingê aye veşenê û fekê aye de birînî virazyayê. Gokhan zî vajîya 41 kîloyî. Dest, mil, zince û rîyê Gokhanî de zî sîyabîyayîş virayayo û girêdayê nê de zî birînî vejîyayê. Hewteyo vîyarte de serê waştişê Gokhanî de roja çarşeme ma muracatê ATKyî kerd. Gokhanî roja paşeme berdî Nêweşxaneyê Bajarî yê Tekîrdagî. Nika ma heyetê weşîya Nêweşxaneyê Bajarî yê Tekîrdagî ra pawenê ke sewqê ey seba ATKyî kerdî yan ney. Rewşa Gokhanî ma keno endîşe. Ganî heyet qerarê sewqkerdişê ATKyî bido. Ganî ATK zî qerarê ke muvekîlî ma bêrê veradayîş, bido. Ma nê pawenê.”

 

Muhakemekerdişêkê adîlane û veradayîşê tepişteyê nêweşan

 

Cerene dewam de wina vat: “Rewşa Gokhanî roje bi roje xira bena. Ma heyetê weşîye qerarêkê pozîtîf pawenê. Waştişê herdiyan zî heqê muhakemeyêkê adîlane yo. Waştişê şaran zî waştişê edeletî yo. Ewro welatê ma serê îfadeyê şahidanê nimite û îtîrafkaran de muhakeme yeno kerdiş. Dosya Sîbele de bi delîlê bêqanûnî muhakeme yeno kerdiş. Nê rojeyê mergî de zî dosyaya herdi muvekîlanê ma hetê 3ine Daîreyê Cezaya Dadgerî ra ame tesdîqkerdiş. Ma derheqê nê de muracatê DDByî kerd. Ma vat, ganî no muhakemekerdişê bêhuqûqî bêro vînayîş û vajê ke  binpaykerdişê heqan ê muhakemeyê adîlane est o. Heto bîn ra waştişo bîn veradayîşê tepişteyê nêweşan o. Ewro welat de zîndanan de xeylêk tepişteyê nêweşî estê. Yew înan ra zî Aysel Tugluk a. Zîndanê Tekîrdagî de nêweşo kanser Alî Osman Kose est o. Seba tahlîyekerdişê ey waştiş est o. Sewbîna waştişêk bîn zî o yo ke cezaya kêfî yenê dayîş, bêrê wedaritiş.”

 

‘Wa edalet bi ca bêro’

 

Cerene heto bîn ra dîyar kerd ke ê sey avûkat û keyeyê Sîbele û Gokhanî qesawet de yê û Sîbele û Gokhanî xêrcê doktorî nêwazenê hetê doktorê bînî ra bêrê dermankerdiş û wina qedêna: “Ganî waştişê muvekîlê ma lezabez bêrê qebûlkerdiş. Wa peynî nê muhakemeyê sîyasî yê bêperwa bêrê. Waştişê edeletî yê Sîbele û Gokhanî seba her kesê ke welat de ciwîyayê. Hewl danê qîrînayîşê heme kesî bidê eşnawitiş.”