AMED - Pêwa ke sîyasetmedara kurde Aysel Tugluke nêweşa demansî ya û zîndan ra nêna veradayîş. Reaksîyonê hemverê nê de ke şinê pîl benê. Komeleya Cinîyan a Rosa ra Neslîhan Çobane derheqê babete de qisey kerd û vat, no yeno manaya ke cinîya kurde ra heyf yeno girewtene.

 

Sîyasetmedara kurde Aysel Tugluk ke zîndanê Asayîşê Berzî yê Hûmara 1yê Kandirayî de tepişte ya, pêwa nêweşîya demansî ya nêna veradayîş. Rojê vîyarte de Sazgehê Tipê Edlî (ATK) reya hîrêne seba Aysele raporê ‘eşkena tepişte bimana’ da. Roja vîyarte de Dadgeha Destûrê Bingehîn (AYM) derheqê waştişê ke ceza bêra taloqkerdiş û bêra tehliyekerdiş de qerarê redî da.

 

Hemverê nêtehliyekerdişê Aysele de reaksîyonî dewam kenê. Endama Heyetê Îdarekarîya Komeleya Cinîyan a Rosa Neslîhan Çoban derheqê babete de ercnayîş kerd.

 

‘Rewşa Aysele xeylêk binpaykerdişan hewênena’

 

Neslîhane wina qal kerd: “Pêwa Aysele nêweşa demansî ya, hema yena tepiştiş. Sey tepişteyanê bînan Aysele zî bi binpaykerdişan dir yena rî bi rî û nêna dermankerdiş. Heqê ciwîyayîşê Aysele yeno binpaykerdiş. Rewşa Aysele esas de xeylêk binpaykerdişî hewênena. Bi zulmê hemverê dayîka aye ame kerdiş, bi Aysele dir vînîbîyayîşê hişî peyda bi. Pêwa nê caardişan nêameye dermankerdiş û hema zî tepişte ya. Ma wazenê Aysele bêra veradayîş, seba rewşa aye zaf krîtîk a. Ma do Aysele û tepişteyanê bînan yê ke rewşa înan giran a, her tim bîyarê rojeve. Seba bi têkoşînê înan ma ameyê a sewîya.”

 

‘Ma her platformî de rewşa Aysele anê ziwan’

 

Neslîhane dewam de wina vat: “Aysele babeta heqê merdiman de fîgurêkê pîl a. Ma her platform de ca gênê û rewşa aye anê ziwan. Nêtehliyekerdişê Aysele sûc o. Ma do nê her ca de bîyarê ziwan. Ma do sîstemê camêrdan her tim teşhîr bikerê. Bi serrêke û nêm o ma her ca de çalakîyan bi ca anê. La pêwa  heme hewldayîşan nêna veradayîş. Ma nê sey heyfgirewtişî gênê dest.”

 

‘Do cinî her tim xo ver bidê’

 

Neslîhane vat, nêtehliyekerdişê Aysele yeno manaya ke îqtîdar wazeno heyf bigîro û nê çî ercna: “Çevîk Bîr ke sey Aysel Tugluk nêweşê demansî yo, ame veradayîş. Seba nê çîyê ke yenê kerdiş, dîrî yê. Çira  hemverê kurdan polîtîkaya dîrîtî yena kerdiş? Îqtîdar hemverê  hetê muxalîf de dişminî keno. La ma cinî heta peynî xo ver bidê. Sloganê, ‘Ma hişê Aysel Tugluke yê’ xeylêk manayên o. Têkoşînê Aysele hişê caardiş û mendedebîyayîşê sîstemê hemserekî, têkoşînê azadî û komela Elewîyan a. Seba nê zî ma berpirsyar ê ke nê têkoşînî pîl bikerê, berz bikerê. Ganî sere de Aysele û pêro tepişteyê nêweşî bêrê veradayîş.”