Sema Çaglak 

 

ŞIRNEX - Cinîyê Şirnexijî bale antî serê teda û hêrişê hemverê sîyaset û siyasetmedarê kurdî û dîyar kerdî ke hemverê şerî de aştî û têduştî wazenê.

 

Îqtîdarê AKP û MHPyî hêrişê xo yê hemverê kurdan de her ke şinê zêde kenê. No îqtîdar teberê welatî de  bi hêrişê xo yê serê Rojawanî û Herêma Federe ya Kurdîstanî, herême de zî bi hêrişê serê HDPyî de hemverê kurdan de şerêkê topyekûn dayo destpêkerdiş. HDP hemverê nê hêrişan de demêk derg o ware de yo, tewir bi tewir xebatan keno û çalakîyan keno.

 

Cinîyê Şirnexîjî yê ke reaksîyon vera nê hêrişanê  îqtîdarê tirkî yê hemverê sîyaset û siyasetmedarê kurdî mojnenê, dîyar kerdî ke HDP çareserîya şaran o.

 

Cinîyan ra Behiye Naîle vat, HDP tena heqê kurdan ney, pawitişê pêro şaranê bindestan keno û vat: “HDP vengê şaran o û seba nê sebeban serê HDPyî de her tim hêriş û teda yenê kerdiş. Ganî heq, huqûq û edalet Tirkîya de bibo û her kes heqê xo ra feyde bigîro. Ma wazenê bi ziwanê xo heqê xo bipawê. Çareserîya problemê Tirkîya HDP yo. HDP mîyanê  Tirkîya de partîya hêrîne yo. Xelasîya pêro şarê bindestan ê Tirkîya HDP yo.”

 

‘HDP seba aştî û serkewtişî xebatan keno’

 

Behîye, dewam de wina vat: “HDP seba berjewendîyê xo sîyaset nêkeno. Seba kurdî zî bieşkê sîyaset bikerê, nika bi seyan sîyasetmedarê ma zîndanan de yê. Mîyanê înan de tepişteyê nêweşî zî estê. Ne înan tahliye kenê, ne zî înan serbest vera danê. HDP seba aştî û serkewtişê şaran xebityena. Ewro mîyanê Tirkîya de gama problemêk û alozîyêk virazêno, HDP seba çareserkerdişî û metodê newe dano vernî. La ê HDPyî bi vatişanê xo îlegalîze kenê.”

 

‘Kurdî estê û do bibê’

 

Besna Yildirim zî vat: “Ma zî pey heq û dewaya xo yê. Ma vanê Kurdî estê û sîyasetê kurdan zî esto. Xebatê HDPyî  xoverdayîş o. Ma bi mîlyonan ê û her ca de vila bîyê. Ê wazenê kurdî biqedîyê. Tarîx ra heta nika amancê înan yewin no bi. La pêwa nê çîyan zî kurdan sereyê xo nêtewêna û hema zî xo ver danê. Kurdî bi tepiştiş û kiştişî xilas nêbenê û do xilas nêbê.”

 

‘Ma hemverê şerî de pawitişê aştî û têduştî kenê’

 

Tewr peyîn Emîne Ozek zî qisey kerd û vat: “HDP îradeyê Şarê Kurdî yo. Bi mîlyonan kurdî rayanê xo danê HDP. Labelê hemverê HDPyî de sîyasetêkê eksê ci yeno kerdiş. Birêz Ocalan ewro mîyanê tecrîdêk giran de yo. Nê dir şar zî binê tecrîdî de yo. Şikinayîşê tecrîdî zî bi çareserî mimkûn o. Heta ke tecrîd nêro wedaritiş, HDP nê tedayan ra xilas nêbeno. Ma 50 mîlyon zêdeyêr kurd ê, Aştî û têduştî wazenê. Ma azadiya birêz Ocalanî wazenê. Sewbîna ma azadîya heme sîyasetmedaranê xo û Aysel Tugluk ke nêweşa wazenê. Her çiqas hêriş serê HDPyî de bêro kerdiş zî do HDP çin nêbo û şar do reyna partîya xo rê wayîr vejîyo. Ganî ma destê xo bidê yewbînan û hemverê nê kiştişan û qetlîaman vejîyê.”